ନୟାଗଡ଼ ଅଫିସ,୨୭।୫: ପ୍ରଧାନମନ୍ତ୍ରୀ ଆଦର୍ଶ ଗ୍ରାମ ଯୋଜନାର ଜିଲାସ୍ତରୀୟ ସମ୍ମିଳିତ କମିଟି ବୈଠକ ଜିଲାପାଳଙ୍କ ସଦ୍ଭାବନା କକ୍ଷରେ ଗୁରୁବାର ଅନୁଷ୍ଠିତ ହୋଇଛି । ଏହି ବୈଠକରେ ଯୋଗ ଦେବା ପାଇଁ ନୟାଗଡ଼ ଜିଲା ସୂଚନା ଲୋକ ସର୍ମ୍ପକ ଅଧିକାରୀଙ୍କ କାର୍ଯ୍ୟାଳୟ ପକ୍ଷରୁ ଗଣମାଧ୍ୟମକୁ କୁହାଯାଇଥିଲା। ବୈଠକ ଗୁରୁବାର ପୂର୍ବାହ୍ନ ୧୦ଟାରେ ଆରମ୍ଭ ହେବାର ଥିଲା । ବୈଠକ ଆରମ୍ଭ ହେବା ମାତ୍ରେ ଜିଲା ସୂଚନା ଲୋକ ସମ୍ପର୍କ ଅଧିକାରୀଙ୍କ କାର୍ଯ୍ୟାଳୟ ନିଜର ପ୍ରେସ ଗ୍ରୁପରେ ପୂର୍ବାହ୍ନ ୧୦ଟାରେ ମେସେଜ ପକାଇଥିଲେ ପୂର୍ବାହ୍ନ ୧୦ଟାରେ ବୈଠକ ହେବ । ଆପଣମାନେ ଆସନ୍ତୁ । ବୈଠକ ଆରମ୍ଭ ହେବା ମାତ୍ରେ ଗଣମାଧ୍ୟମର ପ୍ରତିନିଧିଙ୍କୁ ଦମକଳ ପରି ଡାକରାକୁ ଅନେକ ଖବରଦାତା ନାପସନ୍ଦ କରି ଅସନ୍ତୋଷ ବ୍ୟକ୍ତ କରିଛନ୍ତି ।
ଜିଲା ପ୍ରଶାସନ ପକ୍ଷରୁ ସରକାରୀସ୍ତରରେ ଅନେକ ବୈଠକ କରାଯାଉଛି । ହେଲେ ଗଣମାଧ୍ୟମର ପ୍ରତିନିଧିଙ୍କୁ ଏଥିପାଇଁ ଖୋଜାଯାଏ ନାହିଁ । ବୈଠକ ଶେଷ ପରେ ଜିଲା ସୂଚନା ଲୋକ ସମ୍ପର୍କ କାର୍ଯ୍ୟାଳୟ ପକ୍ଷରୁ ପ୍ରେସ ଗ୍ରୁପରେ କିଛି ସୂଚନା ଦିଆଯାଇଥାଏ । ଏହା ବୁଝିବା କଷ୍ଟ ହୋଇଥାଏ । ପଚାରିଲେ ଉତ୍ତର ମିଳେ ତଥ୍ୟ ଯେତିକି ମିଳିଛି ସେ ଅନୁସାରେ ରିପୋର୍ଟ ଦିଆଯାଇଛି । ସେହିପରି ଅନେକ ଗୁରୁତ୍ୱପୂର୍ଣ୍ଣ ବୈଠକ ନେଇ କିଛି କୁହାଯାଏନି । ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀଙ୍କୁ ପଚାରିଲେ ସେ ଜାଣି ନାହାନ୍ତି କୁହନ୍ତି । ଅନ୍ୟପକ୍ଷେ ୨୦୨୨ରେ ନିର୍ବାଚିତ ହୋଇଥିବା ଜିଲା ପରିଷଦ ସଭ୍ୟମାନଙ୍କର ପ୍ରଥମ ଜିଲା ପରିଷଦ ବୈଠକ ଡିଆରଡିଏ ସମ୍ମିଳନୀ କକ୍ଷରେ କିଛିଦିନ ତଳେ ହୋଇଥିଲା । ଏଥିରେ ଗଣମାଧ୍ୟମର ପ୍ରତିନିଧିଙ୍କୁ ଯୋଗ ଦେବାକୁ କୁହାଯାଇଥିଲା। କେତେଜଣ ଗଣମାଧ୍ୟମ ପ୍ରତିନିଧି ପହଞ୍ଚିବା ପରେ ଖରାପ ବ୍ୟବହାର ପ୍ରଦର୍ଶନ କରାଯାଇଥିଲା । ଏନେଇ ଜଣାପଡିବା ପରେ ନବନିର୍ବାଚିତ ଜିଲା ପରିଷଦ ଅଧ୍ୟକ୍ଷ ଦେବାଶିଷ ପଟ୍ଟନାୟକ ତ୍ରୁଟି ହୋଇଛି ଦର୍ଶାଇ ଆଗକୁ ଏପରି ହେବନି କହିଥିଲେ। ନିକଟରେ ଗଣମାଧ୍ୟମର ପ୍ରତିନିଧିମାନେ ଏନେଇ ଜିଲାପାଳଙ୍କୁ ଅବଗତ କରାଇବା ପରେ ଗଣମାଧ୍ୟମକୁ ସୂଚନା ଦେବା ପାଇଁ ଏକ ଚିଠି ଅତିରିକ୍ତ ଜିଲାପାଳ କରିଥିଲେ। ଅପରପକ୍ଷେ ନୟାଗଡ଼ ବିଧାୟକ ତଥା ମନ୍ତ୍ରୀ ଅରୁଣ ସାହୁ ମଧ୍ୟ ଗଣମାଧ୍ୟମର ପ୍ରତିନିଧିଙ୍କୁ ପ୍ରଶାସନ ପକ୍ଷରୁ ହେଉଥିବା ବିଭିନ୍ନ ବୈଠକକୁ ନିମନ୍ତ୍ରଣ କରିବାକୁ କହିଥିଲେ । ଏପରି କି ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀଙ୍କୁ ଏନେଇ ତାଗିଦ୍ କରିବା ସହ ଗଣମାଧ୍ୟମ ସହ ଟଚ୍ରେ ରହିବାକୁ ପରାମର୍ଶ ଦେଇଥିଲେ । ପରେ ଜିଲା ପ୍ରଶାସନ ପକ୍ଷରୁ କେତେକ ବୈଠକକୁ ଜିଲା ସୂଚନା ଓ ଲୋକ ସମ୍ପର୍କ କାର୍ଯ୍ୟାଳୟ ପକ୍ଷରୁ ପ୍ରେସ ଗ୍ରୁପରେ ମେସେଜ ଆସୁଛି । ଗତ ୧୮ ତାରିଖରେ ବଳରାମ ସ୍କିମ ଉପରେ ଏକ ବୈଠକ ପୂର୍ବାହ୍ନ ୧୦ଟାରେ ହେବାର ଥିଲା । ସେହିଦିନ ପୂର୍ବାହ୍ନ ୯.୪୭ରେ ପ୍ରେସ ଗ୍ରୁପରେ ମେସେଜ ପଡିଥିଲା ବଳରାମ ଯୋଜନାର ବୈଠକକୁ ଆସନ୍ତୁ । ଦୁଇ ଦୁଇଟା ବୈଠକର ସମୟକୁ ଅନୁଧ୍ୟାନ କଲେ ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀଙ୍କ କାର୍ଯ୍ୟାଳୟ ନିଆଁ ଲାଗିଲେ ଦମକଳକୁ ଯେପରି ଡକାଯାଏ ଗଣମାଧ୍ୟମ ପ୍ରତିନିଧିଙ୍କୁ ସେପରି ଡାକୁଥିବା ସ୍ପଷ୍ଟ ହୋଇଛି। ଅଧିକାଂଶ ସମୟରେ ଗଣମାଧ୍ୟମ ପ୍ରତିନିଧି ତାହା ଜାଣି ପାରୁ ନାହାନ୍ତି । ମେସେଜ ଦେଖି ଗଲାବେଳକୁ ବୈଠକ ଶେଷ ହୋଇ ଯାଉଛି ବୋଲି ଅଭିଯୋଗ ହୋଇଛି ।