ଯୋଧପୁର – ରାଜସ୍ଥାନ ଯୋଧପୁର ଅଞ୍ଚଳର ଜଣେ ତଥାକଥିତ ବାବା ଏକ ସଙ୍ଗୀନ ଅଭିଯୋଗ ଆଣିଛନ୍ତି। ଜଣେ ଯୁବତୀ ଘରକୁ ଜଳଖିଆ ଖାଇବାକୁ ଡାକି ପରିବାର ଲୋକଙ୍କ ସହ ମିଶି ଜବରଦସ୍ତି ତାଙ୍କର ଅଶ୍ଳୀଳ ଭିଡିଓ ବନାଇଛନ୍ତି। ଏଥିସହ ତାଙ୍କୁ ବ୍ଲାକମେଲ୍ କରି ୧୦ ଲକ୍ଷ ଟଙ୍କା ଦାବି କରୁଥିବା ବାବା ଥାନାରେ ଅଭିଯୋଗ କରିଛନ୍ତି। ଏହି ଘଟଣାରେ ଯୋଧପୁର ପୋଲିସ କମିଶନର ସିଏଚ୍ବି ଥାନାରେ ଏକ ମାମଲା ରୁଜୁ କରିଛନ୍ତି। ଘଟଣାରୁ ଜଣାପଡ଼ିଛି ଯେ ନିଜକୁ ବାବା ବୋଲାଉଥିବା ଏହି ବ୍ୟକ୍ତି ଜଣଙ୍କ ବାରମରାସ୍ଥିତ ନିଜ ଆଶ୍ରମରେ ରୁହନ୍ତି। ବାବାଙ୍କ ଆଶ୍ରମକୁ ସେହି ଯୁବତୀ ନିୟମିତ ଯିବା ଆସିବା କରନ୍ତି। ଦିନେ ବାବା ଆଶ୍ରମରେ ଥିବା ଜାଣି ଯୁବତୀଜଣଙ୍କ ତାଙ୍କ ନିକଟକୁ ଯାଇଥିଲେ। ଯୁବତୀ ଜଣଙ୍କ ବାବାଙ୍କୁ ଜଳଖିଆ ଖାଇବା ପାଇଁ ଘରକୁ ନିମନ୍ତ୍ରଣ କରିବା ସହ ପରିବାର ଲୋକଙ୍କ ସହିତ ପରିଚିତ କରାଇବାକୁ ଚାହୁଁଥିବା କହିଥିଲେ। ଏହାପରେ ବାବା ପାଲ ବାଲାଜୀ ଅଞ୍ଚଳରେ ଥିବା ଯୁବତୀଙ୍କ ଘରକୁ ଯାଇଥିଲେ। ବାବାଙ୍କ ଅଭିଯୋଗ ମୁତାବକ, ‘ସେଠାରେ ପହଞ୍ଚତ୍ବା ପରେ ଯୁବତୀ ଜଣଙ୍କ ତାଙ୍କ ରୁମ୍କୁ ନେଇଯାଇଥିଲେ। ଯେଉଁଠାରେ କି ପୂର୍ବରୁ ଯୁବତୀଙ୍କ ଘରଲୋକ ଉପସ୍ଥିତ ଥିଲେ। ଏହାପରେ ଯୁବତୀଜଣଙ୍କ ଏକ ବିୟର ବୋତଲ ଧରି ଆସିଥିଲା ଏବଂ ତାଙ୍କୁ ପିଇବା ଲାଗି ବାଧ୍ୟ କରିଥିଲା। ସିଏ ମନା କରିବାରୁ ପରିବାର ଲୋକେ ଜବରଦସ୍ତି ତାଙ୍କୁ ବିୟର ପିଆଇବାକୁ ଚେଷ୍ଟା କରିଥିଲେ। ଏଥିସହ ତାଙ୍କ ଲୁଗାପଟା ଭିଡ଼ି ଚିରି ଦେଇଥିଲେ। ଏହି ସମୟରେ ଯୁବତୀ ଜଣଙ୍କ ମୋବାଇଲ ଧରି ତାଙ୍କର ଅଶ୍ଳୀଳ ଭିଡିଓ ତିଆରି କରିଥିଲେ। ପରେ ସେହି ଭିଡିଓକୁ ଦେଖାଇ ବ୍ଲାକମେଲ କରିବା ଆରମ୍ଭ କରିଦେଇଥିଲେ। ୧୦ ଲକ୍ଷ ଟଙ୍କା ନ ଦେଲେ ଏହି ଭିଡିଓକୁ ଭାଇରାଲ କରିଦେବାକୁ ଧମକ ଦେଇଥିଲେ’ ବୋଲି ବାବା ଥାନାରେ ଅଭିଯୋଗ କରିଛନ୍ତି। ବାବାଙ୍କ ଅଭିଯୋଗ ଆଧାରରେ ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।