କୋଲକାତା,୧୦।୪ : ଏକ ଛାଡ଼ପତ୍ର ମାମଲାର ଶୁଣାଣି ବେଳେ କଲିକତା ହାଇକୋର୍ଟ କହିଛନ୍ତି ଯେ ମାନସିକ ନିର୍ଯାତନା ଆଧାରରେ ଜଣେ ସ୍ବାମୀ ତାଙ୍କ ସ୍ତ୍ରୀଙ୍କଠାରୁ ଛାଡପତ୍ର ପାଇପାରିବେ। ଯଦି ସ୍ତ୍ରୀ ତାଙ୍କ ସ୍ବାମୀଙ୍କୁ ମାତାପିତାଙ୍କଠାରୁ ଅଲଗା ହେବାକୁ ବାଧ୍ୟ କରନ୍ତି କିମ୍ବା ତାଙ୍କୁ ଡରୁଆ ଏବଂ ବେକାର ବୋଲି କୁହନ୍ତି, ତେବେ ସ୍ବାମୀ ମଧ୍ୟ ଛାଡପତ୍ର ଦେଇପାରନ୍ତି । ସୁଷମା ପାଲ ମଣ୍ଡଳଙ୍କର ଛାଡପତ୍ର ମାମଲାର ଶୁଣାଣି ବେଳେ ହାଇକୋର୍ଟ କହିଛନ୍ତି ସ୍ବାମୀଙ୍କୁ ତାଙ୍କ ପିତାମାତାଙ୍କୁ ଛାଡ଼ି ଅନ୍ୟ କୌଣସି ସ୍ଥାନରେ ରହିବାକୁ କହିବା ମଧ୍ୟ ମାନସିକ ନିର୍ଯାତନା। ଏହିପରି କାର୍ଯ୍ୟକଳାପ କ୍ରୁରତା ଏବଂ ଆଇନଗତ ଛାଡ଼ପତ୍ରର ଆଧାର ହୋଇ ପାରିବ।
ଛାଡପତ୍ର ମାମଲାରେ ରାୟ ପ୍ରଦାନ କରୁଥିବାବେଳେ କଲିକତା ହାଇକୋର୍ଟର ଜଷ୍ଟିସ ସୋମେନ ସେନ ଏବଂ ଜଷ୍ଟିସ ଉଦୟ କୁମାରଙ୍କ ଏକ ଡିଭିଜନ ବେଞ୍ଚ ସ୍ପଷ୍ଟ ଭାବରେ କହିଛନ୍ତି, ଜଣେ ବ୍ୟକ୍ତି କେବଳ ତାଙ୍କ ସ୍ତ୍ରୀଙ୍କ ଦ୍ୱାରା ମାନସିକ ନିର୍ଯାତନା ଦିଆଯାଉଥିବାର ପ୍ରମାଣ ଦର୍ଶାଇ ଛାଡପତ୍ର ମାମଲା ଦାଖଲ କରିପାରିବେ। ବେଞ୍ଚ କହିଛନ୍ତି ଯେ ଘରୋଇ ସମସ୍ୟା ଏବଂ ଆର୍ଥିକ ଆବଶ୍ୟକତା ପୂରଣ କରିବାରେ ବିବାଦ ବ୍ୟତୀତ ସ୍ବାମୀ-ସ୍ତ୍ରୀଙ୍କ ମଧ୍ୟରେ ଅନ୍ୟ କୌଣସି ପ୍ରକାର ସମ୍ପର୍କ ନାହିଁ। ଅନ୍ୟପକ୍ଷରେ ସ୍ବାମୀ ତାଙ୍କ ପିତାମାତାଙ୍କ ଘରୁ ଶାନ୍ତିପୂର୍ଣ୍ଣ ଜୀବନ ପାଇଁ ଅନ୍ୟ ଏକ ଭଡା ଘରକୁ ଯାଇଥିଲେ। ଏନେଇ ସ୍ତ୍ରୀ ତାଙ୍କୁ ବାଧ୍ୟ କରିଥିଲେ। ସ୍ବାମୀ ଏନେଇ ଛାଡ଼ପତ୍ର ପାଇଁ ଆବେଦନ କରିପାରିବେ ବୋଲି କୋର୍ଟ କହିଛନ୍ତି।