ଭୁବନେଶ୍ୱର,୨୨।୪ (ବ୍ୟୁରୋ): ଭଡା ଅଟୋରେ ଆସୁଥିଲେ। ଆଉ ବାଇକ ଚୋରି କରିବା ପରେ ସେହି ବାଇକ ଯୋଗେ ଘରକୁ ଫେରୁଥିଲେ। ଏହାପରେ ଉକ୍ତ ଚୋରା ବାଇକକୁ ବନ୍ଧକ ରଖି ସୁଧରେ ଟଙ୍କା ଆଣୁଥିଲେ। ଏମିତି ନୂଆ ତରିକାରେ ପୁଣି ଦ୍ୱୈତ ନଗରୀରେ ଦୀର୍ଘଦିନ ଧରି ବାଇକ ଚୋରି ର଼୍ୟାକେଟ୍ ଚଳାଇଥିବା ଚତୁର ଚୋରଙ୍କୁ ଶହୀଦନଗର ଥାନା ପୋଲିସ ଧରିବାରେ ସଫଳ ହୋଇଛି। ଅଭିଯୁକ୍ତ ଜଣକ ହେଲେ ପୁରୀ ଜିଲା ପିପିଲି ଥାନା ଅଞ୍ଚଳର ଦିଗ୍ବିଜୟ ପଟ୍ଟନାୟକ। ତାଙ୍କଠାରୁ ୯ଟି ଚୋରା ବାଇକ ଜବତ କରାଯାଇଛି। ଏନେଇ ପୋଲିସ ଏକ ମାମଲା(ନଂ.୧୫୬/୨୩) ରୁଜୁ କରି ଅଭିଯୁକ୍ତ ଦିଗ୍ବିଜୟଙ୍କୁ କୋର୍ଟ ଚାଲାଣ କରିଥିଲା। ଜାମିନ ନ ମିଳିବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଏହି ଘଟଣାରେ ସମ୍ପୃକ୍ତ ସହଯୋଗୀ ଫେରାର ଥିବାରୁ ପୋଲିସ ସେମାନଙ୍କୁ ଧରିବା ଲାଗି ଉଦ୍ୟମ ଜାରି ରଖିଛି ।
ସୂଚନାନୁସାରେ, ଅଭିଯୁକ୍ତ ଦିଗ୍ବିଜୟ ଓ ସହଯୋଗୀମାନେ ଅଟୋ ଭଡା କରି ଚୋରି କରୁଥିବା ସ୍ଥାନକୁ ଯାଇ ସେଠାରୁ ପାର୍କିଂ କରାଯାଇଥିବା ବାଇକ୍ଗୁଡିକୁ ମାଷ୍ଟର ଚାବି ଦ୍ୱାରା ଖୋଲି ଚୋରାଇ ନେଉଥିଲେ। ବିଶେଷକରି ହେଲ୍ମେଟ୍ ଥିବା ଗାଡିକୁ ଟାର୍ଗେଟ କରୁଥିଲେ। ଅନ୍ୟମାନଙ୍କ ନଜରରୁ ବର୍ତ୍ତିବା ଲାଗି ଉକ୍ତ ହେଲ୍ମେଟ୍କୁ ପିନ୍ଧି ଦେଇଥା’ନ୍ତି। ଏମିତି ଢଙ୍ଗରେ କଟକ-ଭୁବନେଶ୍ୱରର ବିଭିନ୍ନ ସ୍ଥାନରୁ ବାଇକ ଚୋରି କରିବା ପରେ ତାହାକୁ ନିଜ ଗାଁ ତଥା ପାଖ ଗାଁର କିଛି ଲୋକଙ୍କ ନିକଟରେ ବନ୍ଧକ ରଖି ଗାଡି ପିଛା ୫ ହଜାରରୁ ୮ ହାଜର ଟଙ୍କା ଆଣୁଥିଲେ। କିନ୍ତୁ ପରେ ସେ ଆଉ ଟଙ୍କା ଫେରାଉ ନ ଥିଲେ କି ଗାଡି ମଧ୍ୟ ଆଣୁ ନ ଥିଲେ। ଗତ ୧୭ ତାରିଖରେ ଇଡ୍କୋ ଟାୱାର ନିକଟରୁ ଏକ ବାଇକ ଚୋରି ହୋଇଥିବା ନେଇ ଶହୀଦନଗର ଥାନାରେ ଅଭିଯୋଗ ହୋଇଥିଲା। ଅଭିଯୋଗ ପରେ ପୋଲିସ ଏକ ମାମଲା ରୁଜୁ ସହ ଏକ ଟିମ୍ ଗଠନ କରିଥିଲା।