ସାକ୍ଷୀଗୋପାଳ,୯।୧(ଡି.ଏନ୍.ଏ.): ପୁରୀ ସାକ୍ଷୀଗୋପାଳସ୍ଥିତ ଶ୍ରୀ ଗୋପାଳ ଜୀଉଙ୍କ ପଶ୍ଚିମ ପାର୍ଶ୍ୱ ରାସ୍ତାରେ ଛିଡା ହୋଇଥିବା ଏକ ବସ୍ରେ ସୋମବାର ଅଗ୍ନିକାଣ୍ଡ ଘଟିଛି। ବସ୍ରେ ନିଆଁ ଲାଗିଥିବା ଖବର ପାଇ ତୁରନ୍ତ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛନ୍ତି। ଯାତ୍ରୀମାନେ ସ୍ନାନଶୌଚ ଓ ମନ୍ଦିର ବୁଲିବାକୁ ଯାଇଥିବା ସମୟରେ ଏଭଳି ଅଘଟଣ ଘଟିଥିବାରୁ ଯାତ୍ରୀମାନେ ସୁରକ୍ଷିତଥିବା ସୂଚନାମିଳିଛି। ମାତ୍ର ସେମାନେ ସାଙ୍ଗରେ ଆଣିଥିବା ସମସ୍ତ ଆସବାବପତ୍ର ଟଙ୍କା, ଆଧାର କାର୍ଡ, ଏଟିଏମ୍ କାର୍ଡ ଆଦି କିଛି ଦରକାରୀ କାଗଜପତ୍ର ସମ୍ପୂର୍ଣ୍ଣ ଜଳିଯାଇଛି।
ସୂଚନାଯୋଗ୍ୟ, ମଧ୍ୟପ୍ରଦେଶ ଗୋଆଲିୟର ଅଞ୍ଚଳରୁ ୩ଟି ବସ୍ରେ ତୀର୍ଥଯାତ୍ରୀମାନେ ଗଙ୍ଗାସାଗର ଓ ଚାରିଧାମ ଯାତ୍ରାରେ ବାହାରିଥିଲେ। ପୁରୀରେ ଶ୍ରୀଜଗନ୍ନାଥଙ୍କ ଦର୍ଶନ ପରେ ତୀର୍ଥଯାତ୍ରାର ସାକ୍ଷୀଦେବାକୁ ଶ୍ରୀସାକ୍ଷୀଗୋପାଳ ଠାକୁରଙ୍କ ଦର୍ଶନ ପାଇଁ ପହଞ୍ଚିଥିଲେ। ପରେ ସେମାନେ ରାମେଶ୍ବର ତୀର୍ଥ ଭ୍ରମଣ କରିବାକୁ ଲକ୍ଷ୍ୟ ରଖିଥିଲେ। ଅଳ୍ପ କିଛି ଯାତ୍ରୀ ଓ ବସ୍ କର୍ମଚାରୀ ବସ୍ ପଛପଟୁ ଧୁଆଁ ବାହାରୁଥିବା ଦେଖିବାମାତ୍ରେ ପାଣିପକାଇ ନିଆଁ ଲିଭାଇାକୁ ଚେଷ୍ଟା କରିଥିଲେ। ମାତ୍ର ବସ୍ର ସିଟ ଓ ଅନ୍ୟ ପ୍ଲାଷ୍ଟିକ ଜିନିଷପତ୍ର ନିଆଁଲାଗି ଜଳିଥିଲା। ଖବରପାଇ ସାକ୍ଷୀଗୋପାଳ ଅଗ୍ନିଶମ କର୍ମଚାରୀ ପହଞ୍ଚି ନିଆଁ ଲିଭାଇଥିଲେ। ଭାଜପା ରାଷ୍ଟ୍ରୀୟ ପ୍ରବକ୍ତା ଡ. ସମ୍ବିତ ପାତ୍ର, ଓମ୍ପ୍ରକାଶ ମିଶ୍ର, ପଞ୍ଚାୟତ ସମିତି ଅଧ୍ୟକ୍ଷ ସୁନିଲ ପଣ୍ଡା, ବିଡିଓ ଲୋଚନ ଦାସ, ଆଇଆଇସି ବିଜୟ କେତନ ବେହେରା, ସ୍ଥାନୀୟ ସରପଞ୍ଚ ସମିତିସଭ୍ୟ ପ୍ରମୁଖ ଘଟଣାସ୍ଥଳରେ ପହଞ୍ଚି ତୀର୍ଥଯାତ୍ରୀମାନଙ୍କୁ ସହଯୋଗ ପାଇଁ ଆଲୋଚନା ଜାରି ରଖିଛନ୍ତି।