ଭଦ୍ରକ ଅଫିସ୍,୨୯।୩: ବହୁ ଚର୍ଚ୍ଚିତ କ୍ୟାମେରାମ୍ୟାନ ମାନସ ସ୍ବାଇଁ ହତ୍ୟା ମାମଲାର ମୁଖ୍ୟ ଅଭିଯୁକ୍ତ ତଥା ଏକ ୱେବ ପୋର୍ଟାଲର ମୁଖ୍ୟ ଶର୍ମିଷ୍ଠା ରାଉତଙ୍କ ସମେତ ୪ ଅଭିଯୁକ୍ତଙ୍କୁ ମଙ୍ଗଳବାର ୫ ଦିନିଆ ରିମାଣ୍ଡରେ ନେଇଛି କ୍ରାଇମବ୍ରାଞ୍ଚ। ଭଦ୍ରକ ସବ୍ଜେଲ୍ରୁ ଅଣାଯାଇ କଟକ କ୍ରାଇମ୍ବ୍ରାଞ୍ଚ ଅଫିସ୍ରେ ସେମାନଙ୍କୁ ପଚରାଉଚରା କରାଯିବ। ଏହାସହ ଭୁବନେଶ୍ୱର ଦୟାଲ ଆଶ୍ରମକୁ ମଧ୍ୟ ନିଆଯିବାର ସୂଚନା ମିଳିଛି। ଭଦ୍ରକ ଜିଲା ନଳାଙ୍ଗରୁ ସୋମବାର କ୍ରାଇମବ୍ରାଞ୍ଚ ଟିମ ଓ ଭଦ୍ରକ ପୋଲିସ ଶର୍ମିଷ୍ଠା ଏବଂ ତାଙ୍କ ସହଯୋଗୀ ଝୁନା ଭୋଇଙ୍କୁ ଗିରଫ କରିଥିଲେ।
ସୂଚନାଯୋଗ୍ୟ, ନୟାଗଡ଼ ଜିଲା ରଣପୁର ଥାନା ଗୋଡିପୋଖରୀ ଗାଁର ମାନସ ସ୍ବାଇଁ ଭୁବନେଶ୍ୱରରେ ଏକ ୱେବ ପୋର୍ଟାଲରେ କ୍ୟାମେରା ମ୍ୟାନ ଭାବେ କାମ କରୁଥିଲେ। ସେଠାରେ କାମ କରିବାର କିଛି ଦିନ ପରେ ଚାକିରି ଛାଡି ଦେଇଥିଲେ। ଚାକିରି ଛାଡିବା ବେଳେ ମାନସ ୱେବ ପୋର୍ଟାଲର କିଛି ଗୁପ୍ତ ତଥ୍ୟ ଥିବା ମେମୋରୀ ଚିପ ନେଇଯାଇଥିଲେ। ଏତତ୍ରେ ବିଚଳିତ ହୋଇପଡିଥିଲେ ୱେବ ପୋର୍ଟାଲ ମାଲିକାଣୀ ଶର୍ମିଷ୍ଠା ରାଉତ। ଚୋରି କରିଥିବା ମେମୋରୀ ଚିପ ଦେବାକୁ ମାନସ ଧରାଛୁଆଁ ନ ଦେବାରୁ ତାଙ୍କୁ ହତ୍ୟା କରାଯାଇଥିଲା। ଏହି ଘଟଣାରେ ସମ୍ପୃକ୍ତ ଅଭିଯୋଗରେ ପୂର୍ବତନ ଓଆଇଏସ ନିରଞ୍ଜନ ସେଠୀ, ଶର୍ମିଷ୍ଠାଙ୍କ ଭାଇଙ୍କ ସମେତ ୫ ଅଭିଯୁକ୍ତଙ୍କୁ ପୂର୍ବରୁ ଗିରଫ କରାଯାଇଥିଲା।
