ଇସ୍ଲାମାବାଦ,୧୩ ।୧୧: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ନୱାଜ ଶରିଫଙ୍କ ଝିଅ ମରିୟମ ନୱାଜ ଇମ୍ରାନ ଖାଁ ସରକାରଙ୍କ ଉପରେ ସଙ୍ଗିନ ଅଭିଯୋଗ ଆଣିଛନ୍ତି । ସେ କହିଛନ୍ତି ଯେତେବେଳେ ସେ ଜେଲ୍ରେ ବନ୍ଦି ଥିଲେ ସେତେବେଳେ ତାଙ୍କ ବାରାକର ବାଥରୁମରେ କ୍ୟାମେରା ଲଗାଯାଇଥିଲା । ପ୍ରଶାସନ ପକ୍ଷରୁ ଉକ୍ତ କ୍ୟାମେରା ଲଗାଯାଇଥିବା ସେ ଅଭିଯୋଗ କରିଛନ୍ତି । ତେଣୁ ଏହା ଜଣେ ମହିଳାଙ୍କ ପ୍ରତି ଅପମାନ ବୋଲି ମରିୟମ କହିଛନ୍ତି । ସୂଚନାଯୋଗ୍ୟ, କିଛିଦିନ ପୂର୍ବରୁ ପାକିସ୍ତାନର କେତେଜଣ ଆଇଏସ୍ଆଇ ଅଧିକାରୀ ଓ ସେନା ମିଶି ସେ ରହୁଥିବା କରାଚି ସ୍ଥିତ ହୋଟେଲରେ ପଶି ତାଙ୍କ ସ୍ୱାମୀଙ୍କୁ ଗିରଫ କରିଥିଲେ । ଇମ୍ରାନ ଖାଁ ସରକାର ତାଙ୍କୁ ଦୁଇଥର ଜେଲ୍ ପଠାଇଥିବା କଥା ମଧ୍ୟ ସେ କହିଛନ୍ତି । ତେବେ ଜେଲ୍ର ବାତାବରଣକୁ ନେଇ ମରିୟମ କହିଛନ୍ତି ଯଦି ଏହାର ସତ୍ୟତା ସେ କହିବେ ତେବେ ପ୍ରଶାସନ ଓ ସରକାର କାହାକୁ ମୁହଁ ଦେଖାଇ ପାରିବେ ନାହିଁ । ଏମିତି ଭାବେ ମରିୟମ ଇମ୍ରାନ ସରକାରଙ୍କ ଉପରେ ଖୁବ୍ ବର୍ଷିଛନ୍ତି । ଏମିତିକି ଇମ୍ରାନ ସରକାରଙ୍କର ଇସ୍ତଫା ଦାବି କରିଛନ୍ତି ମରିୟମ । ସୂଚନାଯୋଗ୍ୟ, ଏବେ ମରିୟମଙ୍କ ପିତା ନୱାଜ ଶରିଫ ଲଣ୍ଡନରେ ଚିକିତ୍ସିତ ହେଉଥିବା ବେଳେ ଭିଡିଓ କନଫରେସିଂ ଜରିଆରେ ସେନାର ନାମ ନେଇ ସଙ୍ଗିନ ଅଭିଯୋଗ ଆଣୁଛନ୍ତି ।