ଭୁବନେଶ୍ୱର,୧।୧୧(ବ୍ୟୁରୋ)-ରାଜ୍ୟର ୨ ବିଧାନସଭା ନିର୍ବାଚନ ମଣ୍ଡଳୀ ବାଲେଶ୍ୱର ଓ ତିର୍ତ୍ତୋଲରେ ଉପନିର୍ବାଚନ ପାଇଁ ସରିଛି ପ୍ରଚାର। ୩ ତାରିଖରେ ଅନୁଷ୍ଠିତ ହେବ ଭୋଟ ଗ୍ରହଣ। ଯଦି କେହି ନିୟମ ଉଲ୍ଲଙ୍ଘନ କରନ୍ତି ତେବେ କଡା କାର୍ଯ୍ୟାନୁଷ୍ଠାନ ନିଆଯିବ ବୋଲି ମୁଖ୍ୟ ନିର୍ବାଚନ ଅଧିକାରୀ ସୁଶୀଲ କୁମାର ଲୋହାନୀ କହିଛନ୍ତି। ଏକ ଖବରଦାତା ସମ୍ମିଳନୀରେ ରବିବାର ଲୋହୀନୀ କହିଛନ୍ତି, ସ୍ବଚ୍ଛ, ଅବାଧ ଓ ମୁକ୍ତ ଉପନିର୍ବାଚନ କରିବା ନିମନ୍ତେ ବାଲେଶ୍ୱରରେ ୫ଟି ଓ ତିର୍ତ୍ତୋଳରେ ୪ଟି ଲେଖାଏ ଷ୍ଟାଟିକ ସର୍ଭିଲାନ୍ସ ଟିମ୍, ବାଲେଶ୍ୱର ଓ ତିର୍ତ୍ତୋଳରେ ୩ଟି ଲେଖାଏ ଭିଡିଓ ସର୍ଭିଲାନ୍ସ ଟିମ୍, ବାଲେଶ୍ୱରରେ ୫ଟି ଓ ତିର୍ତ୍ତୋଳରେ ୪ଟି ଲେଖାଏ ଫ୍ଲାଇଙ୍ଗ ସ୍କ୍ବାର୍ଡ, ବାଲେଶ୍ୱରରେ ୫୬ ଜଣ ଏବଂ ତିର୍ତ୍ତୋଳରେ ୬୫ ଜଣ ଲେଖାଏ ସ୍ବତନ୍ତ୍ର ଏକଜୁକ୍ୟୁଟିଭ ମାଜିଷ୍ଟ୍ରେଟଙ୍କୁ ନିଯୁକ୍ତ କରାଯାଇଛି। ସେହିପରି ବାଲେଶ୍ୱର ଉପନିର୍ବାଚନ ପାଇଁ ମୋଟ୍ ୩୪୬ଟି ପୋଲିଂ ପାର୍ଟିକୁ ବୁଥ୍ଗୁଡିକୁ ପଠାଯାଇଛି। ୧୦୪ଟି ପୋଲିଂ ପାର୍ଟି ଅର୍ଥାତ୍ ୧୮୦୦ ଜଣ ପୋଲିଂ କର୍ମଚାରୀଙ୍କୁ ସଂରକ୍ଷିତ ଭାବେ ରଖାଯାଇଛି। ତିର୍ତ୍ତୋଳ ଉପନିର୍ବାଚନ ଲାଗି ୩୭୩ ଟି ପୋଲିଂ ପାର୍ଟି ଅର୍ଥାତ୍ ୧୯୪୦ ଜଣ ପୋଲିଂ କର୍ମଚାରୀଙ୍କୁ ବୁଥ୍କୁ ପଠାଯାଇଛି। ୧୧୨ ପୋଲିଂ ପାର୍ଟିକୁ ସଂରକ୍ଷିତ ଭାବେ ରଖାଯାଇଛି। ଏଥିସହିତ ବାଲେଶ୍ୱରରେ ୩୨ଜଣ ଓ ତିର୍ତ୍ତୋଲ ବିଧାନସଭା ନିର୍ବାଚନମଣ୍ଡଳୀରେ ୨୦ ସେକ୍ଟର ଅଧିକାରୀଙ୍କୁ ନିଯୁକ୍ତ କରାଯାଇଥିବା ଲୋହାନୀ ପ୍ରକାଶ କରିଛନ୍ତି।