ମୁମ୍ବାଇ,୧୯।୧୧: ଭାରତ ଯୋଡ଼ୋ ଯାତ୍ରା ଅବସରରେ କଂଗ୍ରେସ ନେତା ରାହୁଲ ଗାନ୍ଧୀ ହିନ୍ଦୁତ୍ୱବାଦୀ ନେତା ବିନାୟକ ଦାମୋଦର ସାବରକରଙ୍କ ସମ୍ପର୍କରେ ଦେଇଥିବା ବିବାଦୀୟ ମନ୍ତବ୍ୟ ମହାବିକାଶ ଅଘାଡ଼ି ମେଣ୍ଟରେ ଫାଟ ସୃଷ୍ଟି କରିଛି। ଶିବସେନା ଏହି ମେଣ୍ଟରେ ରହି ନ ପାରେ ବୋଲି ଏହାର ଏମ୍ପି ସଞ୍ଜୟ ରାଉତ ଶୁକ୍ରବାର କହିଛନ୍ତି। ଏନେଇ ଦଳର ନେତା ଉଦ୍ଧବ ଠାକ୍ରେ ଖୁବ୍ଶୀଘ୍ର ମନ୍ତବ୍ୟ ଦେବେ। ସାବରକର ବ୍ରିଟିଶ ସରକାରଙ୍କୁ ସହଯୋଗ କରୁଥିଲେ ବୋଲି ରାହୁଲ ଏକ ଖବରଦାତା ସମ୍ମିଳନୀରେ କହିବା ସହ ତାଙ୍କ ଲିଖିତ ଏକ ଚିଠି ଦେଖାଇଥିଲେ। ଏହାକୁ ନେଇ ଶିବସେନା ପକ୍ଷରୁ ଗମ୍ଭୀର ପ୍ରତିକ୍ରିୟା ପ୍ରକାଶ ପାଇଛି। ସାବରକର ଆମ ପାଇଁ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଏବଂ ଆମେ ତାଙ୍କ ନୀତି ଆଦର୍ଶରେ ବିଶ୍ୱାସ କରୁ। କଂଗ୍ରେସ ଏହା ଉପରେ ପ୍ରଶ୍ନ ଉଠାଇବା ଉଚିତ ନୁହେଁ ବୋଲି ଉଦ୍ଧବଙ୍କ ପୁଅ ତଥା ଶିବସେନା ବିଧାୟକ ଆଦିତ୍ୟ ଠାକ୍ରେ କହିଛନ୍ତି। ଶିବସେନା ଉଦ୍ଧବ ଗୋଷ୍ଠୀର ପ୍ରତିକ୍ରିୟା ପରେ ସ୍ଥିତି ସୁଧାରିବାକୁ ଜୟରାମ ରମେଶ ଉଦ୍ୟମ କରିଛନ୍ତି। ରାହୁଲ ଏକ ଐତିହାସିକ ତଥ୍ୟ ଉପସ୍ଥାପନ କରିଛନ୍ତି, ସାବରକରଙ୍କୁ ସେ ଟାର୍ଗେଟ କରି ନ ଥିବା ଜୟରାମ କହିଛନ୍ତି। ୨୦୧୯ ମହାରାଷ୍ଟ୍ର ବିଧାନସଭା ନିର୍ବାଚନ ପରେ ମୁଖ୍ୟମନ୍ତ୍ରୀ ପଦକୁ ନେଇ ଭାଜପା ଏବଂ ଶିବସେନା ମଧ୍ୟରେ ମତଭେଦ ପରେ ଉଦ୍ଧବଙ୍କ ଦଳ କଂଗ୍ରେସ ଏବଂ ଜାତୀୟତାବାଦୀ କଂଗ୍ରେସ ପାର୍ଟି (ଏନ୍ସିପି) ସହ ମିଶି ମହାବିକାଶ ଅଘାଡ଼ି ମେଣ୍ଟ ଗଠନ କରିଥିଲେ। ରାଜ୍ୟରେ ମେଣ୍ଟ ସରକାର ଗଢ଼ାହେବା ସହ ଉଦ୍ଧବ ମୁଖ୍ୟମନ୍ତ୍ରୀ ହୋଇଥିଲେ। ଶିବସେନାର ଏକନାଥ ଶିନ୍ଦେଙ୍କ ନେତୃତ୍ୱରେ ଗୋଟିଏ ଗୋଷ୍ଠୀ ବିଦ୍ରୋହ କରିବାରୁ ସରକାର ଭାଙ୍ଗିଯାଇଥିଲା।
