ଓଟାୱା,୨୯ ।୧୧: କରୋନା ଭାଇରସର ନୂଆ ରୂପ ‘ଓମିକ୍ରନ’ ଏବେ ସାରା ବିଶ୍ୱର ନିଦ ହଜାଇ ଦେଇଛି । ସବୁ ଭାରିଏଣ୍ଟଠାରୁ ଏହା ମାରାତ୍ମକ ବୋଲି ବିଶେଷଜ୍ଞମାନେ କହିବା ପରେ ଲୋକେ ଆତଙ୍କିତ ହୋଇଯାଇଛନ୍ତି । ଦକ୍ଷିଣ ଆଫ୍ରିକାରୁ ପ୍ରଥମେ ଚିହ୍ନଟ ହୋଇଥିବା ‘ଓମିକ୍ରନ’ ଏବେ କିଛି ଦେଶରେ ପହଞ୍ଚିଲାଣି । କରୋନା ଭାଇରସର ଏହି ନୂଆ ରୂପ ଏବେ କାନାଡାରେ ପହଞ୍ଚିଥିବା ଜଣାପଡିଛି । ଏଠାରେ ୨ ବ୍ୟକ୍ତି ଓମିକ୍ରନ ଭାଇରସ ଦ୍ୱାରା ସଂକ୍ରମିତ ହୋଇଛନ୍ତି । ନାଇଜେରିଆରୁ ଫେରିଥିବା ଏହି ଦୁଇ ବ୍ୟକ୍ତି କରୋନାର ନୂଆ ଭାରିଏଣ୍ଟ ‘ଓମିକ୍ରନ’ ଦ୍ୱାରା ସଂକ୍ରମିତ ହୋଇଥିବା ସୂଚନା ରହିଛି । ସୂଚନାଯୋଗ୍ୟ, ବିଭିନ୍ନ ଦେଶରୁ କରୋନା ସଂକ୍ରମଣ ଧୀରେ ଧୀରେ କମି ଆସୁଥିବା ବେଳେ ଏବେ ଏହି ନୂଆ ଭାରିଏଣ୍ଟ ପୁଣିଥରେ ଚିନ୍ତାର କାରଣ ପାଲଟିଛି । ଏହା ଡେଲ୍ଟାଠାରୁ ବି କ୍ଷତିକାରକ ବୋଲି ଜଣାପଡିଛି । ତେଣୁ ପୂର୍ବାପେକ୍ଷା ଆମକୁ ଅଧିକ ସତର୍କ ରହିବା ଜରୁରୀ ବୋଲି ବିଶେଷଜ୍ଞମାନେ କହିଛନ୍ତି ।