Canada Elections: ନୂଆ ପ୍ରଧାନମନ୍ତ୍ରୀଙ୍କ ଘୋଷଣା, ଏପ୍ରିଲରେ ହେବ ଭୋଟିଂ

ଓଟାଓ୍ବା,୨୪।୩: କାନାଡାର ନୂଆ ପ୍ରଧାନମନ୍ତ୍ରୀ ମାର୍କ କାର୍ନି ସାଧାରଣ ନିର୍ବାଚନ ଘୋଷଣା କରିଛନ୍ତି। ଏବେ କାନାଡାରେ ୨୮ ଏପ୍ରିଲରେ ଭୋଟ ଗ୍ରହଣ କରାଯିବ। ଏହାର ଅର୍ଥ ହେଉଛି ଆଜିଠାରୁ ଠିକ ଗୋଟିଏ ମାସ ପରେ କାନାଡାରେ ଏକ ନୂତନ ସରକାର ନିର୍ବାଚିତ ହେବ। ନିର୍ବାଚନ କରାଇବାର ନିଷ୍ପତ୍ତି ଏପରି ସମୟରେ ନିଆଯାଇଛି ଯେତେବେଳେ ମାର୍କ କାର୍ନି ସମ୍ପ୍ରତି କାନାଡାର ପ୍ରଧାନମନ୍ତ୍ରୀ ହୋଇଛନ୍ତି, ଜଷ୍ଟିନ ଟ୍ରୁଡୋ ଦୀର୍ଘ ସମୟ ପରେ ପଦରୁ ଇସ୍ତଫା ଦେଇଛନ୍ତି ଏବଂ ଡୋନାଲ୍ଡ ଟ୍ରମ୍ପ କାନାଡା ଉପରେ ଶୁଳ୍କ ଲାଗୁ କରିବାକୁ ନିରନ୍ତର ଧମକ ଦେଉଛନ୍ତି।
କାନାଡିୟ ପ୍ରଧାନମନ୍ତ୍ରୀ କହିଛନ୍ତି ଯେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ସୃଷ୍ଟି ହୋଇଥିବା ବିପଦର ମୁକାବିଲା କରିବା ପାଇଁ ଆମକୁ ଏକ ଦୃଢ଼ ଜନାଦେଶ ଆବଶ୍ୟକ। କାନାଡା ପ୍ରଧାନମନ୍ତ୍ରୀଙ୍କ ବୟାନ ସ୍ପଷ୍ଟ ଭାବରେ ଦର୍ଶାଉଛି ଯେ ଆମେରିକା ଏବଂ କାନାଡା ମଧ୍ୟରେ ସମ୍ପର୍କ କେତେ ଖରାପ ହୋଇଛି। କିଛି ସମୟ ପୂର୍ବରୁ ଉଭୟ ଦେଶ ପୁରୁଣା ସହଯୋଗୀ ଏବଂ ବାଣିଜି୍ୟକ ଅଂଶୀଦାର ଥିଲେ। ସୂଚନାଯୋଗ୍ୟ, ଟ୍ରମ୍ପ ନିକଟରେ କାନାଡାକୁ ୫୧ତମ ରାଜ୍ୟ କରିବାକୁ ଧମକ ଦେଇଥିଲେ। କୁହାଯାଉଛି ଯେ ଟ୍ରମ୍ପଙ୍କ ଏହି ଧମକ ଯୋଗୁଁ ଦୁଇ ଦେଶ ମଧ୍ୟରେ ସମ୍ପର୍କରେ ଫାଟ ସୃଷ୍ଟି ହୋଇଛି।
ସୂଚନା ଅନୁଯାୟୀ, କାର୍ନି ମାର୍ଚ୍ଚ ୧୪ ତାରିଖରେ ହିଁ କାନାଡାର ପ୍ରଧାନମନ୍ତ୍ରୀ ଭାବରେ ଶପଥ ନେଇଥିଲେ। ସେ କହିଥିଲେ ଯେ ସେ ଟ୍ରମ୍ପଙ୍କୁ ସମ୍ମାନ କରନ୍ତି ଏବଂ ତାଙ୍କ ସହିତ କାମ କରିପାରିବେ। ରବିବାର କାର୍ନି ଏକ ସାମ୍ବାଦିକ ସମ୍ମିଳନୀ କରି ନିର୍ବାଚନ ଘୋଷଣା କରିଥିଲେ। ସେ କହିଛନ୍ତି ଯେ ଟ୍ରମ୍ପଙ୍କ କାର୍ଯ୍ୟ ଏବଂ ଆମର ସାର୍ବଭୌମତ୍ୱକୁ ଚ୍ୟାଲେଞ୍ଜ କରିବାର ଧମକ ଯୋଗୁଁ ଆମେ ଏପର୍ଯ୍ୟନ୍ତ ସବୁଠାରୁ ବଡ଼ ସଙ୍କଟର ସମ୍ମୁଖୀନ ହେଉଛୁ। କାନାଡିୟ ପ୍ରଧାନମନ୍ତ୍ରୀ କହିଛନ୍ତି ଯେ ମୁଁ ରାଜ୍ୟପାଳ ଜେନେରାଲଙ୍କୁ ସଂସଦ ଭଙ୍ଗ କରି ଏପ୍ରିଲ ୨୮ରେ ନିର୍ବାଚନ କରିବାକୁ ଅନୁରୋଧ କରିଥିଲି। ଏବେ ସେ ରାଜି ହୋଇଗଲେ।