ରଘୁନାଥପୁର,୧୭।୫(ଡି.ଏନ୍.ଏ.): ରଘୁନାଥପୁର ବ୍ଲକ ଛପଡା ପଞ୍ଚାୟତ ଦେଇ ଯାଇଥିବା ଜଇପୁର- ନୂଆପଡ଼ା ୧୧ ନଂ. କେନାଲର ରକ୍ଷଣାବେକ୍ଷଣ ହେଉନାହିଁ। ଏହାର ନୂଆପଡା ୮ ନଂ.ୱାର୍ଡ ଓମ୍ଫେଡ ପ୍ଲାଣ୍ଟ ନିକଟରୁ ପଶ୍ଚିମକୁ ଏକ କି.ମି. ପର୍ଯ୍ୟନ୍ତ ଜଙ୍ଗଲରେ ପରିପୂର୍ଣ୍ଣ ହୋଇଯାଇଛି। ଏହି କେନାଲର ଦୁଇ ପାର୍ଶ୍ୱରେ ଥିବା ପାଦଚଲା ବନ୍ଧ ରାସ୍ତାରେ ମଧ୍ୟ ସମାନ ଅବସ୍ଥା ହୋଇଛି।
ଫଳରେ ଖରିଫ ଚାଷ ସମୟରେ କେନାଲରେ ଜଳ ପ୍ରବାହରେ ବାଧା ଉପୁଜିବା ନେଇ ଆଶଙ୍କା ରହିଛି।
ଏହି କେନାଲ ବନ୍ଧ ଦେଇ ପାଦଚଲା ରାସ୍ତାରେ ଯାତାୟାତ କରିବା ପାଇଁ ସ୍ଥାନୀୟ ଦଳିତ ସାହିର ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି। ପ୍ରତିବର୍ଷ ଉକ୍ତ କେନାଲର ରକ୍ଷଣାବେକ୍ଷଣ ପାଇଁ ସଫେଇ ବାବଦରେ ଲକ୍ଷାଧିକ ଟଙ୍କା ବ୍ୟୟ କରାଯାଉଛି। ଦାୟିତ୍ୱରେ ଥିବା ଯନ୍ତ୍ରୀଙ୍କ ତଦାରଖ ଅଭାବରୁ ନିୟୋଜିତ ଠିକାଦାର ଉପର ଠାଉରିଆ ଭାବେ କାର୍ଯ୍ୟକରି ଲକ୍ଷାଧିକ ଟଙ୍କା ଚଳୁ କରିଦେଉଛନ୍ତି ବୋଲି ସ୍ଥାନୀୟ ଅଧିବାସୀ ପ୍ରଶାନ୍ତ ଦାସ ଓ ଶକୁନ୍ତଳା ଦାସ ଅଭିଯୋଗ କରିଛନ୍ତି। ପ୍ରଚଣ୍ଡ ରୌଦ୍ରତାପରେ ଜମିବାଡି ଶୁଖି ଆଁ କରିଥିବାବେଳେ କେନାଲ ଓ ଦୁଇ ପାର୍ଶ୍ୱ ବନ୍ଧ ଜଙ୍ଗଲରେ ପରିଣତ ହେବା ଜଳସେଚନ ବିଭାଗର ଦାୟିତ୍ୱହୀନତାକୁ ପଦାରେ ପକାଇଛି ବୋଲି ଗ୍ରାମବାସୀ କହିଛନ୍ତି।
ଉକ୍ତ କେନାଲ ବନ୍ଧ ରାସ୍ତା ଦେଇ ଦଳିତସାହି ଲୋକେ ମୁଖ୍ୟରାସ୍ତାକୁ ବାହାରିଥାନ୍ତି। ଦୀର୍ଘଦିନରୁ ଏହି ବନ୍ଧ ରାସ୍ତାକୁ ସୁଦୃଢ କରି ଯାତାୟତ ଉପଯୋଗୀ କରିବା ପାଇଁ ଗ୍ରାମବାସୀ ଦାବିକରି ଆସୁଥିଲେ ମଧ୍ୟ କୌଣସି ସୁଫଳ ମିଳୁ ନ ଥିବା ଦିବାକର ଦାସ ଓ ମନୋରମା ଦାସ କହିଛନ୍ତି। ଏ ସମ୍ପର୍କରେ ସ୍ଥାନୀୟ ସରପଞ୍ଚ ସାହେଦା ତବସୁମଙ୍କୁ ଯୋଗାଯୋଗ କରିବାରେ, ଏହା ଜଳସେଚନ ବିଭାଗ ଅଧୀନରେ ରହିଛି, ଏଥିରେ ପଞ୍ଚାୟତ କୌଣସି ଅନୁଦାନ ଦେଇପାରିବ ନାହିଁ ବୋଲି କହିଛନ୍ତି। ତେବେ ସେ ମଣିଜଙ୍ଗାସ୍ଥିତ ବିଭାଗୀୟ ଏସ୍ଡିଓଙ୍କୁ ରାସ୍ତା ସମସ୍ୟା ସମ୍ପର୍କରେ ଜଣାଇଥିବା କହିଛନ୍ତି। ମୌସୁମୀ ବର୍ଷା ଆସିବା ପୂର୍ବରୁ ଯଥାଶୀଘ୍ର ଉକ୍ତ କେନାଲ ଓ ଦୁଇପାର୍ଶ୍ୱ ବନ୍ଧକୁ ସଫେଇ କରିବା ସହ ଡାହାଣ ପାର୍ଶ୍ୱ ପାଦଚଲା ବନ୍ଧ ରାସ୍ତାକୁ ମୋରମ ମେଟାଲ ପକାଇ ସାଧାରଣଜନତାଙ୍କ ଯାତାୟାତ ଉପଯୋଗୀ କରିବାକୁ ନିରୂପମା ଦାସ, ଅମିତା ଦାସ, ଭାରତୀ ଦାସ, କନକ ଦାସ, ନୀଳମଣି ଦାସ, ବାସନ୍ତୀ ଦାସ ପ୍ରମୁଖ ଜିଲାପାଳ, ଜଳସମ୍ପଦ ମନ୍ତ୍ରୀ ଓ ସଚିବଙ୍କୁ ଅନୁରୋଧ କରିଛନ୍ତି। ଏ ସମ୍ପର୍କରେ ଏସ୍ଡିଓ ପୂର୍ଣ୍ଣଚନ୍ଦ୍ର ସ୍ବାଇଁ କୁହନ୍ତି, ନିର୍ଦ୍ଧାରିତ ସମୟରେ କେନାଲ ସଫେଇ କରାଯିବ। ଏହାଛଡା ସେ ନିଜେ ଉକ୍ତ ସ୍ଥାନରେ ପହଞ୍ଚତ୍ ସ୍ଥିତି ଅନୁଧ୍ୟାନ କରିବେ ବୋଲି ପ୍ରକାଶ କରିଛନ୍ତି।