ମୁଜାଫରପୁର,୨୦ ।୨: ବିହାରର ମୁଜାଫରପୁର ଜିଲାରେ ଏମ୍ଡିଡିଏମ୍ ପରୀକ୍ଷା କେନ୍ଦ୍ରରେ ଜଣେ ଛାତ୍ରୀ ଶାନ୍ତି ଦେବୀ ପରୀକ୍ଷା ଦେଉଥିବା ସମୟରେ ଗର୍ଭଯନ୍ତ୍ରଣା ପାଇଥିଲେ । ଆମ୍ବୁଲାନ୍ସ ଯୋଗେ ତୁରନ୍ତ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ସନ୍ଧ୍ୟାରେ ସେ ଏକ ପୁତ୍ର ସନ୍ତାନ ଜନ୍ମ ଦେଇଥିଲେ । ଉକ୍ତ ଶିଶୁର ପିତା ବିରଜୁ ଶହନି ପିଲାଟିର ନାମ ରଖିଛନ୍ତି ‘ପରୀକ୍ଷା’ । ଏବେ ଉଭୟ ମା’ ଓ ଶିଶୁ ସୁସ୍ଥ ଥିବା ଜଣାପଡିଛି । ଶାନ୍ତି କହିଛନ୍ତି ସେ ପାଠପଢି ଆଗକୁ ବଢିବାକୁ ଚାହୁଁଛନ୍ତି । ତେଣୁ ଆଗାମୀ ଦିନରେ ଦେବାକୁ ଥିବା ପରୀକ୍ଷା ମଧ୍ୟ ସେ ଦେବେ ବୋଲି କହିଛନ୍ତି । ତେବେ ପୁତ୍ର ସନ୍ତାନ ଜନ୍ମ ହେବା ଦିନ ସେ ଯେଉଁ ପରୀକ୍ଷା ଦେଇଛନ୍ତି ସେଥିରେ ସେ ଅବଜେକ୍ଟିଭ ପ୍ରଶ୍ନର ଉତ୍ତର ଦେଇଥିବା ବେଳେ ସବଜେକ୍ଟିଭ ପ୍ରଶ୍ନର ଉତ୍ତର ଦେଇପାରି ନାହାନ୍ତି । ତେବେ ଗର୍ଭ ଯନ୍ତ୍ରଣା ହେବା ଜାଣିବା ପରେ ତାଙ୍କ ନିକଟରେ ଥିବା ଅନ୍ୟ ଛାତ୍ରୀଛାତ୍ରମାନେ କେନ୍ଦ୍ର ଅଧିକ୍ଷକଙ୍କୁ ସୂଚନା ଦେବା ପରେ ତୁରନ୍ତ ତାକୁ ହସ୍ପିଟାଲରେ ଭର୍ତ୍ତି କରାଯାଇଥିଲା ।
