ଖୋର୍ଦ୍ଧା ଅଫିସ,୧୬ା୧: ରାଜ୍ୟ ସରକାରଙ୍କ ନଗର ଉନ୍ନୟନ ବିଭାଗ ପକ୍ଷରୁ ସମସ୍ତ ପୌରାଞ୍ଚଳ ଚେୟାରମ୍ୟାନ ପଦବୀ ପାଇଁ ସଂକ୍ଷଣ ଚିଠା ତାଲିକା ପ୍ରକାଶ ପାଇଛି। ଖୋର୍ଦ୍ଧା ଓ ଜଟଣୀ ପୌରାଞ୍ଚଳ ଯଥାକ୍ରମେ ମହିଳା ଏବଂ ଏସ୍ସି ପାଇଁ ସଂରକ୍ଷିତ ରହିଛି। ବାଣପୁର ଓ ବାଲୁଗଁା ଏନ୍ଏସି ଯଥାକ୍ରମେ ଅଣସଂରକ୍ଷିତ ଓ ମହିଳାଙ୍କ ପାଇଁ ସଂରକ୍ଷିତ ରହିଛି। ତାଲିକା ପ୍ରକାଶ ପରେ ବହୁ ଆଶାୟୀ ପ୍ରାର୍ଥୀଙ୍କ ଆଶା ମଉଳି ଯାଇଛି। ୨୨ଓ୍ବାର୍ଡ ବିଶିଷ୍ଟ ଖୋର୍ଦ୍ଧା ସହରରେ ବିଜେଡି ପକ୍ଷରୁ ୪ଜଣ ଦାବିଦାର ରହିଥିବା ବେଳେ କଂଗ୍ରେସ ଏବଂ ଭାଜପା ପକ୍ଷରୁ ଜଣେ ଆଶାୟୀ ପ୍ରାର୍ଥୀ ରହିଥିଲେ। ଆଶାୟୀ ପ୍ରାର୍ଥୀ ଭୋଟରଙ୍କୁ ମନାଇବା ପାଇଁ ନିଜ ଅଞ୍ଚଳର ଓ୍ବାର୍ଡ ବୁଲିବା ସହ ଭୋଟରଙ୍କୁ ମନାଇବା ପାଇଁ ଲାଗି ପଡିଥିଲେ। ସାହି ଗଳିକନ୍ଦିରେ ଆଶାୟୀଙ୍କ ପୋଷ୍ଟର ବ୍ୟାନର ଲଗାଯାଇଥିଲା। ଶାସକ ଦଳ ପକ୍ଷରୁ ଦୀର୍ଘ ଦିନ ଧରି ଦାବିଦାର ରହିଥିବା ପ୍ରାର୍ଥୀ ଡିଜିଟାଲ ପ୍ଲାଟଫର୍ମରେ ପ୍ରଚାର ଆରମ୍ଭ କରି ଦେଇଥିଲେ। ଏପରି କି କେତେକ ପ୍ରାର୍ଥୀ ଦଳୀୟ ମନ୍ତ୍ରୀ, ନେତା, ପର୍ଯ୍ୟବେକ୍ଷକଙ୍କ ନିକଟତର ହେବାକୁ ଲାଗିଥିଲେ। ତେବେ ଶାସକ ଦଳର ବହୁ ଆଶାୟୀଙ୍କୁ ନିରାଶ ହେବାକୁ ପଡିଛି। ଅନ୍ୟପଟେ କଂଗ୍ରେସ ସଭାପତି ରଣଜିତ ମହାପାତ୍ର ଦୀର୍ଘ ଦିନ ଧରି ପ୍ରଚାର ଅଭିଯାନ ଚଳାଇ ଆସିଥିବା ବେଳେ ଅଧ୍ୟକ୍ଷ ପଦବୀ ମହିଳାଙ୍କ ପାଇଁ ସଂରକ୍ଷଣ ରହିଥିବା ଜଣାପଡ଼ିବା ପରେ ନିରାଶ ହେବାକୁ ପଡ଼ିଛି। ତେବେ ରଣନୀତି ଜାରି ରହିବ ବୋଲି ସେ କହିଛନ୍ତି। ଗତ ପୌର ନିର୍ବାଚନରେ ଖୋର୍ଦ୍ଧା ପୌରାଧ୍ୟକ୍ଷ ଭାବେ ବେଗୁନିଆ ବିଧାୟକଙ୍କ ସହଧର୍ମିଣୀ ସଞ୍ଜୁକ୍ତା ସାହୁ ରହିଥିଲେ। ତେବେ ଚଳିତ ବର୍ଷ ପୁଣି ଥରେ ଏହି ପଦବୀ ମହିଳାଙ୍କ ପାଇଁ ସଂରକ୍ଷିତ ରହିଥିବାରୁ ଏହି ଆସନରେ ପୁଣି ଥରେ ସେ ପୌରାଧ୍ୟକ୍ଷ ପାଇଁ ଲଢ଼ିବା ନେଇ ଚର୍ଚ୍ଚା ଜୋର ଧରିଛି। ଅନ୍ୟପଟେ ଖୋର୍ଦ୍ଧା ବିଧାୟକଙ୍କ ପରିବାରରୁ କେହି ଜଣେ ପୌରାଧ୍ୟକ୍ଷ ପଦବୀ ପାଇଁ ଲଢିବେ ବୋଲି ଚର୍ଚ୍ଚା ହେଉଛି। ନୂତନ ବର୍ଷକୁ ସ୍ବାଗତ ଜଣାଇ ବେଗୁନିଆ ବିଧାୟକଙ୍କ ପକ୍ଷରୁ ସହରରେ ଲାଗିଥିବା ଏକାଧିକ ହୋଡିଂରେ ସଞ୍ଜୁକ୍ତାଙ୍କ ମଧ୍ୟ ପୋଷ୍ଟର ଲାଗିଥିଲା। ଗୋଟିଏ ପଟେ ସଞ୍ଜୁକ୍ତା ପୁଣି ଥରେ ପ୍ରାର୍ଥୀ ହେବା ନେଇ ସ୍ଥିର ହୋଇଥିବା ବେଳେ ବିଧାୟକ ମିତ୍ର କାହାକୁ ପ୍ରାର୍ଥୀଭାବେ ଛିଡ଼ା କରୁଛନ୍ତି ତାକୁ ନେଇ ଉତ୍କଣ୍ଠା ଦେଖିବାକୁ ମିଳିଛି। ପ୍ରତି ଓ୍ବାଡର୍ର୍ରେ ଉଭୟ ବିଧାୟକଙ୍କ ସମର୍ଥକ ରହିଛନ୍ତି। ଉଭୟଙ୍କ ସମର୍ଥତ୍ତ ପ୍ରାର୍ଥୀ ନିର୍ବାଚନ ରଣାଙ୍ଗନା ପାଇଁ ପ୍ରସ୍ତୁତି ଆରମ୍ଭ କରି ଦେଇଛନ୍ତି।