ବ୍ରହ୍ମପୁର ଅଫିସ,୧୨ା୫: ଅବକାରୀ ଗୋଇନ୍ଦା ଟିମ୍ ଶୁକ୍ରବାର ଏକ ଗଞ୍ଜେଇ ଭର୍ତ୍ତି ଅଟୋ ଜବତ କରିଛି। ଜଣେ ଚାଲାଣକାରୀଙ୍କୁ ଗିରଫ କରିଛି। ସେ ହେଉଛନ୍ତି ବଡ଼ଗଡ଼ ଥାନା ଅନ୍ତର୍ଗତ ବଡ଼ଚିକିଲି ଗ୍ରାମର ପ୍ରମୋଦ କୁମାର ନାୟକ(୩୪)। ଫୁଲବାଣୀରୁ ଗଞ୍ଜେଇ ଆସ୍କା ଦେଇ ବ୍ରହ୍ମପୁର ଚୋରାଚାଲାଣ ହେଉଥିବା ନେଇ ଅବକାରୀ ବିଭାଗକୁ ଖବର ମିଳିଥିଲା। ଅବକାରୀ ଗୋଇନ୍ଦା ଉପଅଧୀକ୍ଷକ କୁବେର ସେଠୀଙ୍କ ନେତୃତ୍ୱରେ ଏକ ଟିମ୍ ଶୁକ୍ରବାର ଆସ୍କା କାଳଷଣ୍ଢପୁର ଛକରେ ଯାନବାହନ ଚେକିଂ କରୁଥିଲା। ସେହି ରାସ୍ତା ଦେଇ ଆସୁଥିବା ଏକ ଅଟୋ ନମ୍ବର ଓ ୩୨ସି-୯୬୩୯କୁ ଅଟକାଇ ଯାଞ୍ଚ କରାଯାଇଥିଲା। ସେଥିରେ ଦୁଇଟି ଜରି ବସ୍ତାରେ ୧୫୦ କେଜି ରହିଥିବା ଜଣାପଡ଼ିଥିଲା। ଚାଲାଣକାରୀ ଜଣଙ୍କ ପ୍ରମୋଦ କୁମାର ନାୟକ ହୋଇଥିବା ବେଳେ ସେ ଉକ୍ତ ଗଞ୍ଜେଇ ଫୁଲବାଣୀରୁ ବେଆଇନ ଭାବେ ଚାଲାଣ କରୁଥିବା ଅବକାରୀ ଟିମ୍ ପକ୍ଷରୁ ସୂଚନା ମିଳିଛି। ଜବତ ଗଞ୍ଜେଇ ଓ ଅଟୋର ମୂଲ୍ୟ ୧୬ଲକ୍ଷ ୫୦ହଜାର ଟଙ୍କା ହେବ ବୋଲି ସେଠୀ କହିଛନ୍ତି। ମାମଲା ନମ୍ବର ୭୩/୨୩-୨୪ରେ ପ୍ରମୋଦଙ୍କୁ ଶୁକ୍ରବାର କୋର୍ଟ ଚାଲାଣ କରାଯାଇଛି। ଏହି ଚଢ଼ାଉରେ ଅବକାରୀ ଗୁଇନ୍ଦା ଇନ୍ସପେକ୍ଟର ଡା.ଅଶୋକ ସାହୁ, ହୃଦୟ ଚନ୍ଦ୍ର ସାମନ୍ତ, ଏଏସ୍ଆଇ ବ୍ରଜ ବିହାରୀ ନାୟକ, କନଷ୍ଟେବଳ କପିଳାସ ଭତ୍ରା, ବଳରାମ ଜେନା, ସନ୍ତୋଷ ନାୟକ, କୁମୁଦ ପ୍ରଧାନ ପ୍ରମୁଖ ସାମିଲ ଥିଲେ।