ଖୋର୍ଦ୍ଧା ଅଫିସ,୧୭ା୯: ବ୍ରାଉନ୍ସୁଗାର ପରେ ଗଞ୍ଜେଇ କାରବାର ବଢ଼ିବାରେ ଲାଗିଛି। ବ୍ରାଉନ୍ସୁଗାର କାରବାର ଉପରେ ଏସ୍ଟିଏଫ୍ ପକ୍ଷରୁ ବାରମ୍ବାର ଚଢ଼ାଉ ଯୋଗୁ ମାଫିଆମାନଙ୍କ ନଜର ଏବେ ଗଞ୍ଜେଇ ଉପରେ ରହିଛି। କନ୍ଧମାଳରୁ ଭୁବନେଶ୍ୱରକୁ ଜାତୀୟ ରାଜପଥ ଦେଇ ଗଞ୍ଜେଇ ଚୋରାଚାଲାଣ ଚାଲିଛି। ଯାତ୍ରୀବାହୀ ବସ୍ ଏବଂ କାର୍ରେ ଗଞ୍ଜେଇ ଚାଲାଣ କରୁଛନ୍ତି ମାଫିଆ। ଶୁକ୍ରବାର ଅପରାହ୍ନ ୨ଟାରେ ଖୋର୍ଦ୍ଧା ଜିଲା ବାଘମାରୀ ଥାନା ଅନ୍ତର୍ଗତ ବୋମାଢିହ ଛକରୁ ବାଘମାରୀ ପୋଲିସ ଏକ କାର (ଓଡି-୦୨-ଏଫ୍-୨୫୨୭) ସହ ୩୬ କେଜି ୩ ଶହ ଗ୍ରାମ୍ ଗଞ୍ଜେଇ ଜବତ କରିଛି। ଏଥିରେ ସମ୍ପୃକ୍ତି ନେଇ କନ୍ଧମାଳ ଜିଲା ବାଲିଗୁଡ଼ା ଥାନା କିଆମୁଣ୍ଡା ବରିଗୁଡ଼ାର ସୁଶାନ୍ତ ଦିଗାଲ(୩୫)ଙ୍କୁ ଗିରଫ କରାଯାଇଛି। ବାଲିଗୁଡ଼ାରୁ ଭୁବନେଶ୍ୱରକୁ ଗଞ୍ଜେଇ ଚାଲାଣ ହେଉଥିଲା ବୋଲି ପୋଲିସ କହିଛି।
ସୂଚନା ମୁତାବକ, ବାଲିଗୁଡ଼ାପଟୁ ଏକ କାର୍ରେ ଗଞ୍ଜେଇ ଚାଲାଣ ହେଉଥିବା ନେଇ ପୋଲିସକୁ ସୂଚନା ମିଳିଥିଲା। ଖୋର୍ଦ୍ଧା ଏସ୍ପି ସିଦ୍ଧାର୍ଥ କଟାରିଆଙ୍କ ନିର୍ଦ୍ଦେଶକ୍ରମେ ସଦର ଏସ୍ଡିପିଓ ଦିଲୀପ ଦାସଙ୍କ ତତ୍ତ୍ୱାବଧାନରେ ଆଇଆଇସି ପି.ଆର୍. କରଙ୍କ ନେତୃତ୍ୱରେ ଏକ ଟିମ୍ ବୋମାଢିହ ଛକରେ ସମ୍ପୃକ୍ତ କାରକୁ ଅଟକାଇ ଯାଞ୍ଚ କରିଥିଲା। କାରରେ ଦୁଇଟି ପ୍ଲାଷ୍ଟିକ୍ ଜରିରେ ଥିବା ଗଞ୍ଜେଇ ଜବତ କରିବା ସହ ଚାଳକ ସୁଶାନ୍ତଙ୍କୁ ପଚରାଉଚରା କରିଥିଲା। ତେବେ ସୁଶାନ୍ତଙ୍କଠାରୁ ପୋଲିସ ସନ୍ତୋଷଜନକ ଉତ୍ତର ନ ପାଇବାରୁ ତାଙ୍କୁ ଗିରଫ କରିଥିଲା। ଏନେଇ ଥାନାରେ ଏନ୍ଡିପିଏସ୍ ଆକ୍ଟ ୨୦(ବି)(ସି)/୨୫/୨୯ରେ ଏକ ମାମଲା(ନଂ .୧୧୯/୨୨) ରୁଜୁ ହୋଇଛି। ଗଞ୍ଜେଇ ଚାଲାଣ ର଼୍ୟାକେଟ ପଛରେ ଅନ୍ୟ କେଉଁମାନେ ରହିଛନ୍ତି, ଭୁବନେଶ୍ୱର କାହା ପାଖକୁ ଯାଉଥିଲା ସେ ସମ୍ପର୍କରେ ପୋଲିସ ଖୋଳତାଡ଼ ଚଳାଇଛି। ଏହି ଚଢ଼ାଉରେ ଏସ୍ଆଇ ଗାୟତ୍ରୀ ଗୋଚ୍ଛାୟତ, ଏଏସ୍ଆଇ ରଞ୍ଜିତ କୁମାର ନାୟକ, କନ୍ଷ୍ଟେବଲ ଏସ୍.କେ. ବେହେରା ଓ ଅନ୍ୟମାନେ ସାମିଲ ଥିଲେ। ସୂଚନାଯୋଗ୍ୟ, ଜାତୀୟ ରାଜପଥ ମାଫିଆଙ୍କ ପାଇଁ ଗଳାବାଟ ସାଜିଛି। ଗତ କିଛିମାସ ତଳେ ଖୋର୍ଦ୍ଧା ଅବକାରୀ ବିଭାଗ କନ୍ଧମାଳରୁ ଖୋର୍ଦ୍ଧାକୁ ଚାଲାଣ ହେଉଥିବା ଦୁଇଟି କାରରୁ ବିପୁଳ ପରିମାଣର ଗଞ୍ଜେଇ ଜବତ କରିଥିଲା। ଗତ ଏପ୍ରିଲ ମାସରେ ଭୁବନେଶ୍ୱର-ଚେନ୍ନାଇ ୧୬ ନମ୍ବର ଜାତୀୟ ରାଜପଥ ଛତ୍ରମା ଛକ ଏକ ଢାବା ନିକଟରୁ ଗଞ୍ଜେଇ ଭର୍ତ୍ତି ପିକ୍ଅପ ଭ୍ୟାନ୍ରୁ ୧ କୁଇଣ୍ଟାଲ ୨୫ କେଜି ଗଞ୍ଜେଇ ସହ ୫୬ ହଜାର ଟଙ୍କା ଜବତ ହୋଇଥିଲା। ଏଥିସହ ଦୁଇଜଣଙ୍କୁ ଗିରଫ କରାଯାଇଥିଲା। ଗତ ମଙ୍ଗଳବାର ପୂର୍ବାହ୍ନରେ ଖୋର୍ଦ୍ଧା ପୋଲିସ ନୂଆ ବସ୍ଷ୍ଟାଣ୍ଡରେ ଭୁବନେଶ୍ୱର ଅଭିମୁଖେ ଯାଉଥିବା ଏକ ଯାତ୍ରୀବାହୀ ବସ୍ରୁ ଦୁଇଟି ଗଞ୍ଜେଇ ପ୍ୟାକେଟ୍ ଜବତ କରିଥିଲା।
