କାନ୍ସ,୨୫ା୫(ପି.ଟି.): ୭୭ତମ କାନ୍ସ ଫିଲ୍ମ ଫେଷ୍ଟିଭାଲ୍ରେ ଭାରତକୁ ବଡ଼ ସଫଳତା ମିଳିଛି। ମହୀଶୂରର ଫିଲ୍ମ ନିର୍ମାତା ଚିଦାନନ୍ଦ ଏସ୍ ନାଏକଙ୍କ କ୍ଷୁଦ୍ର ଚଳଚ୍ଚିତ୍ର ‘ସନ୍ଫ୍ଲାଓ୍ବାର୍ସ ଓ୍ବେୟାର ଦି ଫାଷ୍ଟ ଓ୍ବାନ୍ସ ଟୁ ନୋ’ ଗୁରୁବାର ଲା ସିନେଫ ପ୍ରଥମ ପୁରସ୍କାର ପାଇଛି। ପୁଣେର ଫିଲ୍ମ ଆଣ୍ଡ ଟେଲିଭିଜନ ଇନ୍ଷ୍ଟିଚ୍ୟୁଟ୍ର ଟେଲିଭିଜନ ବିଭାଗରେ ନିଜର ବର୍ଷିକିଆ ପାଠ୍ୟକ୍ରମ ଶେଷ କରିବା ପରେ ଚିଦାନନ୍ଦ ଉକ୍ତ ଚଳଚ୍ଚିତ୍ର ନିର୍ମାଣ କରିଥିଲେ। କୁକୁଡ଼ା ଚୋରି କରିଥିବା ଜଣେ ବୃଦ୍ଧାଙ୍କ ଉପରେ ରହିଥିବା କନ୍ନଡ଼ ଲୋକକଥା ଆଧାରରେ ଉକ୍ତ ଫିଲ୍ମ ପ୍ରସ୍ତୁତ ହୋଇଛି। ଲା ସିନେଫ୍ ତୃତୀୟ ପୁରସ୍କାର ମାନସୀ ମାହେଶ୍ୱରୀଙ୍କ ଆନିମେଶନ ଫିଲ୍ମ ‘ବୁନିଉଡ୍’କୁ ମିଳିଛି। ମିରଟରେ ଜନ୍ମିତ ଏବଂ ଦିଲ୍ଲୀ ଏନ୍ଆଇଏଫ୍ଟିରେ ପଢ଼ିଥିବା ମାହେଶ୍ୱରୀ ବ୍ରିଟେନ ନ୍ୟାଶନାଲ ଫିଲ୍ମ ଆଣ୍ଡ ଟେଲିଭିଜନ ସ୍କୁଲ୍ର ଛାତ୍ରୀ ଭାବେ ଏହି ଚଳଚ୍ଚିତ୍ର ନିର୍ମାଣ କରିଛନ୍ତି। ଦ୍ୱିତୀୟ ପୁରସ୍କାର ଦୁଇଟି ଫିଲ୍ମ ମଧ୍ୟରେ ଭାଗ କରାଯାଇଛି। କଲମ୍ବିଆ ୟୁନିଭର୍ସିଟିର ଅସ୍ୟା ସେଗାଲୋଭିଚ୍ଙ୍କ ନିର୍ଦ୍ଦେଶିତ ‘ଆଉଟ୍ ଅଫ୍ ଦି ଓ୍ବାଡୋ ଥ୍ରୁ ଦି ଓ୍ବାଲ୍’ ଏବଂ ଆରିଷ୍ଟଟଲ ୟୁନିଭର୍ସିଟିର ନିକୋସ୍ କୋଲିଉକୋସଙ୍କ ’ ଦି ଚାଓସ ଶି ଲେଫ୍ଟ ବିହାଇଣ୍ଡ’ ମିଳିତ ଭାବେ ଏହି ପୁରସ୍କାର ପାଇଛନ୍ତି। ପ୍ରଥମ ପୁରସ୍କାର ବିଜେତାଙ୍କୁ ୧୫,୦୦୦ ୟୁରୋ ମିଳିବାକୁ ଥିବାବେଳେ ଦ୍ୱିତୀୟ ପୁରସ୍କାର ବାବଦରେ ୧୧,୨୫୦ ଏବଂ ତୃତୀୟ ପୁରସ୍କାର ବିଜେତାଙ୍କୁ ୭,୫୦୦ ୟୁରୋ ମିଳିବ।
