କଳିଙ୍ଗନଗର,୨ା୬(ଡି.ଏନ.ଏ.): କଳିଙ୍ଗନଗର ଶିଳ୍ପାଞ୍ଚଳକୁ ସଂଯୋଗ କରୁଥିବା ମୁଖ୍ୟ ରାସ୍ତା ଚୋରଦା-ଡୁବୁରିରେ ଟ୍ରାଫିକ ସମସ୍ୟା ବଢ଼ିଚାଲିଛି। ଏହି ରାସ୍ତା ପୂର୍ତ୍ତ ଓ ଗୃହ ନିର୍ମାଣ ବିଭାଗ ଅଧୀନରେ ଥିବାବେଳେ ରାସ୍ତାର ମାନପୁରଠାରେ ପୂର୍ବତଟ ରେଳପଥ ଅତିକ୍ରମ କରୁଛି। ପୂର୍ବରୁ ଏହି ରେଳପଥ ଉପରେ ଏକ ଓଭର ବ୍ରିଜ ନିର୍ମାଣ ହୋଇଥିଲା। ମାତ୍ର ସେ ପୋଲ ନିର୍ମାଣରେ ବହୁ ତ୍ରୁଟି ହେବାରୁ ଏବେ ତାହା ବିପର୍ଯ୍ୟସ୍ତ ହୋଇପଡ଼ିଛି। ପୋଲ ଉପରେ ଶିଳ୍ପାଞ୍ଚଳରୁ ଯାତାୟାତ କରୁଥିବା ଅତ୍ୟଧିକ ଭାରିଯାନ ଚଳାଚଳବେଳେ ଅତ୍ୟଧିକ ଚାପ ହେତୁ କମ୍ପନ ହେଉଥିବାରୁ ଯେ କୌଣସି ମୁହୂର୍ତ୍ତରେ ପୋଲରେ ଅଘଟଣ ଘଟିବା ଆଶଙ୍କା ରହିଛି। ଏହାକୁ ଆଖି ଆଗରେ ରଖି ୪ ବର୍ଷ ତଳେ ତୁରନ୍ତ ଦ୍ୱିତୀୟ ଓଭରବ୍ରିଜ ନିର୍ମାଣ ପାଇଁ ଯୋଜନା ହୋଇଥିଲା। ଏଥିପାଇଁ ଦୁଇଥର ମାଷ୍ଟର ପ୍ଲାନ ହୋଇସାରିଛି। ବାରମ୍ବାର ପ୍ଲାନ ବଦଳିବା କାରଣରୁ ଦୁଇଥର ଅର୍ଥ ବୃଦ୍ଧି ମଧ୍ୟ କରାଯାଇଛି। ଶେଷ ଅଟକଳ ମୁତାବକ ଜିଲା ଖଣିଜ ନ୍ୟାସ ପାଣ୍ଠିରୁ ନୂତନ ବ୍ରିଜ ନିର୍ମାଣ ପାଇଁ ଆବଶ୍ୟକ ୫୧ କୋଟି ଟଙ୍କା ଯୋଗାଇ ଦିଆଯାଇଛି। ୩୦ କୋଟି ଟଙ୍କା ରେଲ୍ଓ୍ବେ ମଞ୍ଜୁର କରିଥିବା ଜଣାପଡିଛି। ରେଳପଥର ଦୁଇ ପାର୍ଶ୍ୱରେ ମୋଟ ୩୨ଟି ସ୍ପାନ ନିର୍ମାଣ କରାଯିବାକୁ ଥିବାବେଳେ ଏଯାଏ ୩୧ ସ୍ପାନର କାମ ଶେଷ ହୋଇଛି। ପୋଲର ଦାନଗଦି ପଟରେ ଏକ ବ୍ୟକ୍ତିଗତ ଜମିରେ ସମସ୍ୟା ରହିଥିବା କାରଣରୁ ତାହା ଅଦ୍ୟାବଧି ଅଧିଗ୍ରହଣ ହୋଇ ପାରିନାହିଁ। ସମ୍ପୃକ୍ତ ଜମି ମାଲିକ ଜାଗା ନ ଛାଡ଼ିବାରୁ କୌଣସି ପ୍ରକାର ଗୋଟିଏ ସ୍ପାନ କାମ ପାଇଁ ମୂଳରୁ ଖୁଣ୍ଟ ଉଠି ପାରୁନାହିଁ। ଏହି ଅଡୁଆ ପାଇଁ ପୋଲ ନିର୍ମାଣ ଅଧିକ ବିଳମ୍ବିତ ହେଉଛି।
ଅନ୍ୟପକ୍ଷରେ ପ୍ରତିଦିନ ୫୦ ହଜାର ଗାଡ଼ି ଚଳାଚଳ କରୁଥିବା ଏହି ବ୍ୟସ୍ତବହୁଳ ରାସ୍ତାର ପୁରୁଣା ପୋଲରେ ଗାଡ଼ିଗୁଡିକ ଧାଡ଼ି ବାନ୍ଧି ଯାଉଛନ୍ତି। ଭିଡ଼ ପାଇଁ ଶ୍ରମିକ, କର୍ମଚାରୀ ଓ ସାଧାରଣ ଜନତା ନାକେଦମ ହେଉଛନ୍ତି। ସ୍କୁଲ ବସ୍, ଅଗ୍ନିଶମ ସେବା ଗାଡ଼ି ଓ ଆମ୍ବୁଲାନ୍ସ ସେବା ମଧ୍ୟ ଏଠାରେ ପ୍ରତ୍ୟହ ବ୍ୟାହତ ହେଉଛି। ସକାଳେ ଓ ସାରେ ବ୍ରିଜ୍ରେ ଏମିତି ଅସମ୍ଭାଳ ଭିଡ ଜମୁଛି ଯେ ତା’କୁ ନିୟନ୍ତ୍ରଣ କରିବା ପାଇଁ ପୋଲିସ ମଧ୍ୟ ହଇରାଣ ହେଉଛି। ପୋଲର ଗୋଟିଏ ପଟରେ ଯୁଦ୍ଧକାଳୀନ ଭିତ୍ତିରେ କାମ ଚାଲିଥିବାବେଳେ ଅନ୍ୟପଟେ ଆଦୌ କାମ ହୋଇ ପାରୁନାହିଁ। ତେଣୁ ଜମି ସମସ୍ୟା ସମାଧାନ ପାଇଁ ଜିଲା ପ୍ରଶାସନ ଶୀଘ୍ର ପଦକ୍ଷେପ ନେବାକୁ ଦାବି ହୋଇଛି।