ମୁମ୍ବାଇ ଉପକୂଳରେ ଏକ କ୍ରୁଜ୍ ଶିପ୍ରେ ଡ୍ରଗ୍ସ ପାର୍ଟି କରୁଥିବାବେଳେ ସୁପରଷ୍ଟାର୍ ଶାହରୁଖ ଖାନ୍ଙ୍କ ପୁଅ ୨୩ ବର୍ଷୀୟ ଆର୍ୟନଙ୍କ ସହ ଅନ୍ୟ ୭ଜଣଙ୍କୁ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ(ଏନ୍ସିବି) ଗିରଫ କରିଥିଲା। ପରେ ଗିରଫ ସଂଖ୍ୟା ବଢ଼ିଛି ହେଲେ ଏହି ଘଟଣାରେ ଆର୍ୟନଙ୍କୁ ନେଇ ଚର୍ଚ୍ଚା ଜୋର୍ ଧରିଛି। କୋର୍ଟରେ ହାଜର କରାଯିବା ପରେ ଆର୍ୟନଙ୍କ ରିମାଣ୍ଡ ଅବଧିକୁ ୭ ଅକ୍ଟୋବର ପର୍ଯ୍ୟନ୍ତ ବଢ଼ାଇ ଦିଆଯାଇଛି। ଡ୍ରଗ୍ସ ବେପାରୀଙ୍କ ସହ ନିୟମିତ ଚାର୍ଟିଂର ପ୍ରମାଣ ଥିବାରୁ ଅଧିକ ତଦନ୍ତ ଆବଶ୍ୟକ ବୋଲି କୋର୍ଟକୁ ଏନ୍ସିବି ଅବଗତ କରିଛି। ତେବେ ଏନ୍ସିବି ତଦନ୍ତ ତୀବ୍ର କରି ଏହାର ଖିଅ ଖୋଜିବ, ଯାହା କରୁଛି ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁତଙ୍କ ଘଟଣାରେ। ହେଲେ ନିକଟରେ ମୁନ୍ଦ୍ରା ବନ୍ଦରରୁ ଜବତ କରାଯାଇଥିବା ୨୧,୦୦୦ କୋଟି ଟଙ୍କାର ୩,୦୦୦ କେ.ଜି. ହେରୋଇନର ରହସ୍ୟ ସାମ୍ନାକୁ ଆସୁନାହିଁ। ଏଥିରେ ଏନ୍ସିବି ଓ ଅନ୍ୟ ତଦନ୍ତକାରୀ ଟିମ୍ ସମ୍ପୂର୍ଣ୍ଣ ନୀରବ ଥିବା ମନେହେଉଛି। ଏଠାରେ ଉଲ୍ଲେଖଯୋଗ୍ୟ ଯେ, ମୁନ୍ଦ୍ରା ବନ୍ଦର ଗୌତମ ଆଦାନୀଙ୍କ କମ୍ପାନୀ ଦ୍ୱାରା ପରିଚାଳିତ। ତେବେ ସବୁ ଘଟଣାକୁ ଗୁରୁତ୍ୱର ସହ ନେଇ ଭାରତରେ ନିରପେକ୍ଷ ଡ୍ରଗ୍ସ କାରବାରର ରହସ୍ୟ ପଦାକୁ ଆଣିିଲେ ବହୁ ସମସ୍ୟାର ସମାଧାନ ହୋଇପାରିବ। ବିଶେଷକରି ଭାରତର ଯୁବପିଢ଼ିଙ୍କୁ ଏହା କବଳରୁ ଅନେକାଂଶରେ ମୁକ୍ତ କରାଯାଇପାରିବ।
ପୂର୍ବରୁ ପଞ୍ଜାବ, ଜମ୍ମୁ ଓ କଶ୍ମୀର ବାଟ ଦେଇ ଭାରତକୁ ସବୁଠୁ ବେଶି ଡ୍ରଗ୍ସ ଆଫଗାନିସ୍ତାନ ଓ ପାକିସ୍ତାନରୁ ଆସୁଥିଲା। ଏବେ ଜଳପଥରେ ସହଜରେ ଓ ଅଧିକ ପରିମାଣରେ ଆସୁଛି। ଏହା ସହ ଉତ୍ତରପୂର୍ବାଞ୍ଚଳ ସୀମା ଦେଇ ଡ୍ରଗ୍ସ କାରବାର ହେଉଛି। ତେବେ ମୁନ୍ଦ୍ରା ବନ୍ଦରରୁ ଧରାପଡ଼ିଥିବା ହେରୋଇନରୁ ଅନୁମାନ ହେଉଛି ଗୁଜରାଟ ଅନ୍ୟତମ ପେଣ୍ଠ ପାଲଟିଛି। ତେବେ ଏବକାର କ୍ରୁଜ୍ ଶିପ୍ ଘଟଣା ଏକ ସଙ୍କେତ ମାତ୍ର। କେବଳ ସେଲିବ୍ରିଟିଙ୍କ ପିଲା ନୁହନ୍ତି, ସବୁ ବର୍ଗର ଯୁବକ ଏହା କବଳରେ ପଡ଼ୁଛନ୍ତି। ଗରିବ ପିଲାମାନେ ହେରୋଇନ ସେବନ କରୁଥିବାବେଳେ ଧନୀ ପିଲାଙ୍କ ପସନ୍ଦ କୋକେନ୍। ବିପୁଳ ପରିମାଣର ଡ୍ରଗ୍ସ ଭାରତକୁ ଆସୁଥିଲେ ମଧ୍ୟ ବହୁଦିନରୁ ଏହାକୁ ଅଣଦେଖା କରାଯାଉଛି। ଏବେ ମନେହେଉଛି ଭାରତ ଯେପରିି ଡ୍ରଗ୍ସ କାରବାରର ବାଟ ହୋଇଛି। ଏହି ମାଧ୍ୟମ ଦେଇ ପୃଥିବୀବ୍ୟାପୀ ମାରାତ୍ମକ ଡ୍ରଗ୍ସ ଚାଲାଣ ହେଉଛି। ଏଠାରେ ସ୍ବୀକାର କରିବାକୁ ହେବ ଯେ ଡ୍ରଗ୍ସ ସ୍ଥିତିକୁ କୌଣସି ଆଇନ ମଧ୍ୟରେ କବଳିତ କରାଯାଇପାରିବ ନାହିଁ। ଏଭଳି ମାଦକଦ୍ରବ୍ୟର ବ୍ୟବହାର ଭାରତରେ ସୀମିତ ନୁହେଁ। ସମଗ୍ର ପୃଥିବୀ ଏହି ସମସ୍ୟାକୁ ସମ୍ମୁଖୀନ ହେଉଛି। ଅନ୍ୟ ଦେଶଗୁଡ଼ିକରେ ଏଭଳି ଦ୍ରବ୍ୟର ବ୍ୟବହାରକାରୀଙ୍କୁ ଡାକ୍ତରଖାନାରେ ରଖି ଚିକିତ୍ସା କରାଯାଇଥାଏ ଏବଂ ଏହି ବ୍ୟବସାୟରେ ସମ୍ପୃକ୍ତ ଲୋକଙ୍କୁୁ ଗିରଫ କରି ଦଣ୍ଡିତ କରାଯାଏ। ଆମ ଦେଶରେ କେବଳ ଟିଆର୍ପି ଓ ରାଜନୀତିକୁ ଦୃଷ୍ଟିରେ ରଖି ବ୍ୟବହାରକାରୀଙ୍କୁ ଗିରଫ କରାଯାଉଥିବାବେଳେ ମୂଳ ସମସ୍ୟା ଅର୍ଥାତ୍ ମାଦକଦ୍ରବ୍ୟ ବ୍ୟବସାୟୀଙ୍କୁ ଛାଡ଼ି ଦିଆଯାଉଛି। ସେଥିପାଇଁ ଭାରତରେ ଏହି ସମସ୍ୟା ଶୀଘ୍ର ସମାଧାନ ହେବ ବୋଲି ବିଶ୍ୱାସ ହେଉନାହିଁ।