ସୋନପୁର,୩୦।୫(ନି.ପ୍ର.): ଗତ ମାର୍ଚ୍ଚରେ ସୋନପୁର ଆସିଥିଲେ ଅଶୋକ। ହସଖୁସିରେ ବୁଲାବୁଲି କରି ଫେରି ଯାଇଥିଲେ। ୪ଦିନ ତଳେ ଅଶୋକ ତାଙ୍କ ସହିତ ଫୋନରେ କଥା ହୋଇଥିଲେ। ପରିବାର ସହ ନେପାଳ ବୁଲିବାକୁ ଯିବେ ବୋଲି କହିଥିଲେ। ହେଲେ ରବିବାର ଗଣମାଧ୍ୟମରୁ ସେମାନଙ୍କ ନିଖୋଜ ହୋଇଥିବା ଖବର ଶୁଣି ନିଜକୁ ବିିଶ୍ୱାସ କରିପାରୁନାହାନ୍ତି ବୋଲି କହିଛନ୍ତି ଅଶୋକଙ୍କ ଭାଉଜ କଲ୍ୟାଣୀ। ୧୯୯୫ ମସିହାରୁ ଅଶୋକ ଭୁବନେଶ୍ୱର ଜୟଦେବ ବିହାରରେ ଘର କରି ରହୁଛନ୍ତି। ସ୍ତ୍ରୀ ଓ ପୁଅ ମୁମ୍ବାଇରେ ଚାକିରି କରୁଥିବାରୁ ଅଶୋକ ଏବେ ପରିବାର ସହ ମୁମ୍ବାଇରେ ରହୁଥିଲେ। ଅଶୋକଙ୍କ ବଡଭାଇ ଦେବବ୍ରତ ଓ ସୁବ୍ରତଙ୍କ ମୃତ୍ୟୁ ହୋଇସାରିଛି। ଅନ୍ୟ ଦୁଇ ଭାଇ ସତ୍ୟବ୍ରତ ଓ ରାଜେନ ବାହାରେ ରହୁଛନ୍ତି। ସୋନପୁରରେ କେବଳ ଅଶୋକଙ୍କ ଭାଉଜ ତଥା ବଡଭାଇ ସୁବ୍ରତଙ୍କ ସ୍ତ୍ରୀ କଲ୍ୟାଣୀ ରହୁଛନ୍ତି। ସୁବର୍ଣ୍ଣପୁର ସହର ପ୍ୟାଲେସ ଗାର୍ଡେନର ବରିଷ୍ଠ ଆଇନଜୀବୀ ସ୍ବର୍ଗତ କୃଷ୍ଣଚନ୍ଦ୍ର ତ୍ରିପାଠୀଙ୍କ ଚତୁର୍ଥ ପୁତ୍ର ହେଉଛନ୍ତି ଅଶୋକ। ଏଭଳି ଏକ ଦୁଃଖଦ ଦୁର୍ଘଟଣାକୁ ନେଇ ସୁବର୍ଣ୍ଣପୁରରେ ଶୋକର ଛାୟା ଖେଳିଯାଇଛି। ଉଲ୍ଲେଖନୀୟ, ସୁବର୍ଣ୍ଣପୁର ସହରର ମୂଳ ବାସିନ୍ଦା ଅଶୋକ ତ୍ରିପାଠୀ ପରିବାର ସହ ନେପାଳ ବୁଲିବାକୁ ଯାଇଥିଲେ। ସେ ପରିବାର ସହିତ ରବିବାର ସକାଳେ ବିମାନରେ ଯାତ୍ରା କରୁଥିବା ବେଳେ ଉକ୍ତ ବିମାନଟି ଦୁର୍ଘଟଣାଗ୍ରସ୍ତ ହୋଇଛି। ନେପାଳର କୋଓ୍ବାଙ୍ଗରୁ ବିମାନର ଭଗ୍ନାବଶେଷ ମିଳିଛି। ଏହି ଦୁର୍ଘଟଣାରେ ଅଶୋକ(୫୦)ଙ୍କ ସମେତ ସ୍ତ୍ରୀ ବୈଭବୀ(୪୫), ଝିଅ ରିତିକା(୧୫) ଓ ପୁଅ ଧନୁଶ(୨୩) ନିଖୋଜ ହୋଇଥିବା ଭାରତର ବୈଦେଶିକ ବିଭାଗ ପକ୍ଷରୁ ସ୍ପଷ୍ଟ କରାଯାଇଛି।
