ଫୁଲବାଣୀ ଅଫିସ, ୩ା୯: ସମସ୍ତଙ୍କୁ ଉତ୍ତମ ସ୍ବାସ୍ଥ୍ୟ ସେବା ମିଳିବ। ଚିକିତ୍ସାରେ କାହାରିକୁ ଅବହେଳା କରାଯିବ ନାହିଁ। ମେଡିକାଲରେ ମାଗଣା ଚିକିତ୍ସା ସହ ଅସ୍ତ୍ରୋପଚାର କରାଯିବ। ଏଥିପାଇଁ ବିଜୁ ସ୍ବାସ୍ଥ୍ୟ କାର୍ଡ ପ୍ରଦାନ କରିଛନ୍ତି ସରକାର। ହେଲେ ସବୁଥିଲେ ବି ଏହି ସେବା ମିଳିପାରୁନାହିଁ। ଏହାର ବାସ୍ତବ ଚିତ୍ର କନ୍ଧମାଳ ଜିଲା ଚକାପାଦ ବ୍ଲକରେ ଦେଖିବାକୁ ମିଳିଛି ା ଜନ୍ମ ହେଲା ପରଠାରୁ ମଳଦ୍ୱାର ନ ଥିବା ଜଣେ ପିଲାର ଅସ୍ତ୍ରୋପଚାର ଆଜି ପର୍ଯ୍ୟନ୍ତ କରାଯାଇ ପାରୁନାହିଁ।
ଚକାପାଦ ବ୍ଲକ ବେହେରାଗାଁ ପଞ୍ଚାୟତ ପଡାମାହା ଗ୍ରାମ। ୨୦୧୭ ଜୁଲାଇ ୧୮ ତାରିଖରେ ଗ୍ରାମର ପ୍ରକାଶ କହଁର ଓ ସ୍ତ୍ରୀ ଜାନକୀଙ୍କ କୋଳ ମଣ୍ଡନ କରିଥିଲେ ଚିଣ୍ଟୁ। ପୁଅ ଟିଏ ଜନ୍ମ ହୋଇଥିବାରୁ ଉଭୟଙ୍କ ମଧ୍ୟରେ ଖୁସିର ସୀମା ନ ଥିଲା ା ହେଲେ କିଛି ଘଣ୍ଟା ପରେ ଏହି ଖୁସି ପାଣି ଫୋଟକା ପରି ମିଳାଇ ଯାଇଥିଲା। କାରଣ ପିଲାଟି ଜୋରରେ କନ୍ଦା କଟା କରିଥିଲା ା ଡାକ୍ତର ଆସି ପରୀକ୍ଷା କଲାବେଳକୁ ମଳଦ୍ୱାର ନ ଥିବା ଜଣାପଡିଥିଲା।ପିଲାଟି ମଳ ତ୍ୟାଗ କରି ପାରୁ ନ ଥିବାରୁ ଡାକ୍ତର ବାଇପାସ କରି ନାଭି ପାଖରେ ମଳ ଯାଉଥିବା ନାଡ଼କୁ ବାହାର କରି ଛାଡି ଦେଇଥିଲେ। ପିଲା ବଡ ହେଲେ ତାହାର ଅସ୍ତ୍ରୋପଚାର କରାଯିବ ବୋଲି କହିଥିଲେ ା ସେହିଦନଠାରୁ ଆଜି ପର୍ଯ୍ୟନ୍ତ ଡାକ୍ତରଙ୍କ ପାଖକୁ ଦୌଡି ଦୌଡି ପ୍ରକାଶ ଏବଂ ସ୍ତ୍ରୀ ଜାନକୀ ନୟାନ୍ତ ହୋଇପଡିଲେଣି ା ତଥାପି ଅପରେଶନ ହୋଇପାରୁ ନାହିଁ। ଚିଣ୍ଟୁ ଏବେ ୫ ବର୍ଷରେ ପାଦ ଥାପିଛି ା ଘର ସମ୍ମୁଖରେ ଅନ୍ୟ ପିଲାମାନେ ପ୍ରତ୍ୟେକ ଦିନ ସ୍କୁଲ ଯାଉଥିବା ଦେଖି ମନ ଦୁଃଖ କରୁଛି। କାରଣ ସେ ଅସୁସ୍ଥତା ଯୋଗୁ ଯାଇ ପାରୁନାହିଁ ା ନାଭି ପାଖରେ ବାହାରିଥିବା ନାଡ଼ରେ ମଳ ଆପେ ଆପେ ବାହାରୁଛି। ଦୁର୍ଗନ୍ଧରେ ରହି ହେଉନାହିଁ। ପେଟ ଉପରେ ଏକ କପଡା ଦେଇ ତାଙ୍କୁ ସବୁ ବେଳେ ରଖାଯାଉଛି ା ପରିବାରର ଜଣେ ଲୋକ ଏଥିପାଇଁ ବନ୍ଧା। ଏପଟେ ପ୍ରକାଶ ଗରୀବ ଶ୍ରେଣୀର ଲୋକ। ଦିନ ମଜୁରି ନ ଗଲେ ପରିବାର ଚଳାଇବା କଷ୍ଟ। ଫୁଲବାଣୀ ଜିଲା ମୁଖ୍ୟ ଚିକିତ୍ସାଳୟରେ ଯେତେବେଳେ ଚିଣ୍ଟୁଙ୍କୁ ଭର୍ତ୍ତି କରାଯାଇଥିଲା ସେତେବେଳେ ତାଙ୍କୁ ବ୍ରହ୍ମପୁର ମେଡିକାଲ ସ୍ଥାନାନ୍ତରିତ କରାଯାଇଥିଲା। ପୁଣି ଡାକ୍ତର କଟକ ରେଫର କରିଥିଲେ। ସେଠାରେ ଡାକ୍ତର ଆଜି ପର୍ଯ୍ୟନ୍ତ ଅପରେଶନ ଆଳ ଦେଖାଇ ଦିନ ଗଡାଇ ଚାଲୁଛନ୍ତି। ଏପଟେ ଚିଣ୍ଟୁ ବଡ ହେଉଥିବାରୁ ମଳ ତ୍ୟାଗ କରିବାରେ ଅକଥନୀୟ ଯନ୍ତ୍ରଣା ଅନୁଭବ କରୁଛି। ସରକାରଙ୍କ ଏତେ ସବୁ ସୁବିଧା ଥାଇ ଚିଣ୍ଟୁର ଅବସ୍ଥା କେବେ ସୁଧୁରିବ ଏବଂ ତାର ଅସ୍ତ୍ରୋପଚାର କରାଯିବ ତାହାକୁ ନେଇ ପ୍ରଶ୍ନ ଉଠିଛି। ପଇସା ପତ୍ର ଆମ ପାଖରେ ନାହିଁ। ଡାକ୍ତର ଖାଲି ଆର ମାସରେ ଆସ କହୁଛନ୍ତିା ସରକାର ସାହାର୍ଯ୍ୟ କଲେ ଆମ ପୁଅ ଭଲ ହୋଇପାରନ୍ତା ବୋଲି ମା’ ଜାନକୀ ଏବଂ ବାପା ପ୍ରକାଶ କହିଛନ୍ତି।