ବେଳେବେଳେ କେତେକ କୌଣସି ସ୍ଥାନରେ ସ୍ଥିର ରହିପାରନ୍ତି ନାହିଁ। ଏଭଳି ସମସ୍ୟାରେ ଚୁପ୍ଚାପ୍ ବସିବା ଏକ ପ୍ରକାର ଅସମ୍ଭବ ହୋଇଥାଏ। ଏହାକୁ ଡାକ୍ତରୀଭାଷାରେ ଆକାଥିସିଆ ବା ଚଳନ ସମସ୍ୟା କୁହାଯାଇଥାଏ। ଏହା ଶରୀର କେତେକ ଆଭ୍ୟନ୍ତରୀଣ ଅସ୍ଥିରତା ଯୋଗୁ ସୃଷ୍ଟି ହୋଇଥାଏ। ସମସ୍ୟା ରହିଥିବା ବ୍ୟକ୍ତି, ପିଲା ଅବା ବୟସ୍କଙ୍କ ମନ ଶାନ୍ତ ରୁହେନା। ଗୋଡ଼ ଅଧିକ ପ୍ରଭାବିତ ହୁଏ। ଫଳରେ ସ୍ଥିର ହୋଇ ରହିନ ପାରିବା ସମ୍ପୃକ୍ତ ବ୍ୟକ୍ତି ଏପାଖ ସେପାଖ, ଆଗପଛ ହୋଇ ଚାଲନ୍ତି। ମନ ଅଶାନ୍ତ ରୁହେ । ସମସ୍ୟା ଅଧିକ ଜଟିଳ ହେଲେ ଲୋକେ ଆତ୍ମହତ୍ୟା କରିଥାନ୍ତି ।
ଆଣ୍ଟିସାଇକୋଟିକ ଔଷଧ ବ୍ୟବହାର କରୁଥିବାଙ୍କ କ୍ଷେତ୍ରରେ ଏହି ସମସ୍ୟା ଦେଖାଯିବାର ଆଶଙ୍କା ଅଧିକ ରହିଥାଏ। ସିଲେକ୍ଟିଭ ସେରୋଟୋନିନ ଇନହିବିଟର, ମେଟୋକ୍ଲୋପ୍ରାମାଇଡ, ରିସର୍ପିନ, ପାର୍କିନ୍ସନ ରୋଗ, ସିଜୋଫ୍ରେନିଆ ଯୋଗୁ ମଧ୍ୟ ଏହି ସମସ୍ୟା ସୃଷ୍ଟି ହୋଇଥାଏ ବୋଲି ଡାକ୍ତର କହିଥାନ୍ତି। ଏହି ସମସ୍ୟାରେ ଖୁସି ହରମୋନ୍ ଡୋପାମାଇନର କ୍ଷରଣରେ ଅନିୟମିତତା ଗୁରୁତ୍ୱପୂର୍ଣ୍ଣ ସାବ୍ୟସ୍ତ ହୋଇଥାଏ। ଡୋପାମାଇନ୍ କ୍ଷରଣ ସ୍ବାଭାବିକ ହେଲେ ସମସ୍ୟା ବନ୍ଦ ହୋଇଯାଇଥାଏ। ଏହି ସମସ୍ୟାରେ ଡାଇଫେନହାଇଡ୍ରାମିନ, ଟ୍ରାଜୋଡନ, ବେଞ୍ଜଟ୍ରୋପିନ, ମିର୍ତାଜାପିନ, ବିଟା ବ୍ଲକର ଆଦି ଔଷଧ ବ୍ୟବହାର କରିବାକୁ ଡାକ୍ତର ପରାମର୍ଶ ଦେଇଥାନ୍ତି। ସେହିପରି ଭିଟାମିନ୍ ବି-୬, ଲୌହ ଅଂଶର ଅଭାବର ଚିକିତ୍ସା କଲେ ମଧ୍ୟ ଉପକାର ମିଳେ । ନ୍ୟୁରୋସାଇକାଟ୍ରିଷ୍ଟ୍ ଲାଡିସ୍ଲାଭ ହାସ୍କୋଭେକ ୧୯୦୧ରେ ପ୍ରଥମେ ଏହି ସମସ୍ୟା ସମ୍ପର୍କରେ ଜାଣି ପାରିଥିଲେ। ଏହାପରେ ସେ ଏହାର ଚିକିତ୍ସା ସମ୍ପର୍କରେ ଗବେଷଣା କରିଥିଲେ।