ମୁମ୍ବାଇ,୧୪।୧୦: ଲଗାତାର ତୃତୀୟ ଦିନ ଲାଗି ଭାରତୀୟ ପୁଞ୍ଜି ବଜାରର କାରବାର ଉର୍ଦ୍ଧ୍ୱଗାମୀ ରହିଛି। ବୁଧବାର ବମ୍ବେ ଷ୍ଟକ ଏକ୍ସଚେଞ୍ଜ(ବିଏସ୍ଇ) ସେନ୍ସେକ୍ସ ୪୫୨ ପଏଣ୍ଟ ଉର୍ଦ୍ଧ୍ୱରେ ରହି ୬୦,୭୩୭ ପଏଣ୍ଟ ସ୍ତରରେ ବନ୍ଦ ହୋଇଛି। ସେହିଭଳି ନ୍ୟାଶନାଲ ଷ୍ଟକ ଏକ୍ସଚେଞ୍ଜ(ନିଫ୍ଟି) ୧୭୦ ପଏଣ୍ଟ ଉର୍ଦ୍ଧ୍ୱରେ ରହି ୧୮,୧୬୨ ପଏଣ୍ଟ ସ୍ତରରେ ବନ୍ଦ ହୋଇଛି। ବମ୍ବେ ଷ୍ଟକ ଏକ୍ସଚେଞ୍ଜ (ବିଏସ୍ଇ) ସୂଚୀଭୁକ୍ତ କମ୍ପାନୀଗୁଡ଼ିକର ବଜାର ପୁଞ୍ଜୀକରଣ ୨୭୧ ଲକ୍ଷ କୋଟି ଟଙ୍କା ଛୁଇଁଛି। ବୁଧବାର ସେନ୍ସେକ୍ସ ୬୦,୮୩୬ ପଏଣ୍ଟ ସ୍ତର ଛୁଇଁଥିବା ବେଳେ ନିଫ୍ଟି ୧୮,୨୩୭ ପଏଣ୍ଟ ସ୍ତର ଛୁଇଁବାକୁ ସକ୍ଷମ ହୋଇଥିଲା। ଲଗାତାର ୫ ଦିନ ହେବ ପୁଞ୍ଜି ବଜାର ଉଚ୍ଚରେ ରହୁଛି। ଏହା ପୂର୍ବରୁ ସେନ୍ସେକ୍ସ ୬୦,୬୧୯ ପଏଣ୍ଟ ଏବଂ ନିଫ୍ଟି ୧୮,୦୯୭ ପଏଣ୍ଟରେ ବନ୍ଦ ହୋଇଥିଲା।
ଶେୟାର ସୂଚକାଙ୍କ ବିଶିଷ୍ଟ ସେନ୍ସେକ୍ସରେ ୨୨ଟି ଶେୟାର ଭଲ କାରବାର ହାସଲ କରିଥିବା ବେଳେ ୮ଟି ଶେୟାରର କାରବାର ପ୍ରଭାବିତ ହୋଇଛି। ରିୟଲ ଇଷ୍ଟେଟ ସୁଚକାଙ୍କ ଶେୟାର କାରବାର ପ୍ରଭାବିତ ସ୍ତରରେ ରହି ବନ୍ଦ ହୋଇଛି।
ବଜାର ଉର୍ଦ୍ଧ୍ୱଗାମୀ ହେବା ଲାଗି କେତେକ ବିଶେଷ କାରଣ ଦାୟୀ ରହିଛି। ଏହା ମଧ୍ୟରେ ଆଗାମୀ ଆର୍ଥତ୍କ ବର୍ଷରେ ମଧ୍ୟ ଭାରତ ବିଶ୍ୱର ଦ୍ରୁତ ଅଭିବୃଦ୍ଧିଶୀଳ ବଜାର ମାନ୍ୟତା ବଜାୟ ରଖିବା ବୋଲି ଅନ୍ତର୍ଜାତୀୟ ମୁଦ୍ରା ପାଣ୍ଠି(ଆଇଏମ୍ଏଫ୍) କହିଛି। ଖୁଚୁରା ମୁଦ୍ରାସ୍ଫୀତି ୫ ମାସର ସର୍ବନିମ୍ନ ସ୍ତର, କମ୍ପାନୀଗୁଡ଼ିକର ତ୍ରୈମାସିକ ଫଳାଫଳରେ ଉନ୍ନତି ଆଶା, ଟିକାକରଣରେ ଉନ୍ନତି ଏବଂ ଶିଳ୍ପ ଜଗତକୁ ସହାୟତା ଦେବା ଲାଗି ସରକାରଙ୍କ ନିରନ୍ତର ଚେଷ୍ଟା ଭଳି କାରକ ବଜାରକୁ ଉର୍ଦ୍ଧ୍ୱଗାମୀ କରିବା ସହ ନିବେଶକଙ୍କ ମନୋବଳ ବଢ଼ାଉଛି।