ନୂଆଦିଲ୍ଲୀ,୧୧।୧୧: କ୍ରିକେଟରେ ସବୁକିଛି ସମ୍ଭବ। ଏହି ଖେଳରେ ଭାଗ୍ୟ ବେଳେବେଳେ ଅସମ୍ଭବକୁ ମଧ୍ୟ ସମ୍ଭବ କରିଦେଇଥାଏ। ସେଭଳି କିଛି ଆଇପିଏଲ୍୨୦୨୦ରେ ଦେଖିବାକୁ ମିଳିଛି। ୧୨ ବର୍ଷର ଅପେକ୍ଷା ପରେ ଦିଲ୍ଲୀ କ୍ୟାପିଟାଲ୍ସ ଆଇପିଏଲ୍ ଫାଇନାଲରେ ପ୍ରବେଶ କରିଥିଲା। ଭଲ ଫର୍ମରେ ଥିଲେ ହେଁ ଫାଇନାଲରେ ଦଳ ମୁମ୍ବାଇ ଇଣ୍ଡିଆନ୍ସଠାରୁ ୫ ଓ୍ବିକେଟ୍ରେ ହାରି ଯାଇଛି। ମ୍ୟାଚ୍ ପରେ ଦିଲ୍ଲୀ ଅଧିନାୟକ ଶ୍ରେୟସ ଆୟର ନିରାଶ ଦେଖାଯାଉଥିଲେ। ମାତ୍ର ଟୁର୍ନାମେଣ୍ଟରେ ସର୍ବକନିଷ୍ଠ ଅଧିନାୟକ ହେବା ସତ୍ତ୍ୱେ ଫାଇନାଲରେ ପ୍ରବେଶ କରିବାର ଯାତ୍ରା ବେଶ ପ୍ରଶଂସନୀୟ ଥିଲା। ଏପରିକି ସେ ତାଙ୍କ ବିବୃତ୍ତିରେ ହୃଦୟ ଜିତିଥିଲେ।
ଶ୍ରେୟସ ନିଜର ପ୍ରତିକ୍ରିୟାରେ କହିଥିଲେ, ଆଇପିଏଲ୍ ସର୍ବଦା ଆପଣଙ୍କୁ ଚକିତ କରିଥାଏ। ଏହା ସବୁଠାରୁ କଠିନ ଲିଗ୍। ଏଥିରେ ଖେଳି ମୁଁ ବହୁତ ଖୁସି। ଏହା ଏକ ଭଲ ଯାତ୍ରା ଥିଲା। ମୁଁ ମୋ ଖେଳାଳିମାନଙ୍କ ପାଇଁ ଗର୍ବିତ। ଫାଇନାଲରେ ପହଞ୍ଚିବା ସହଜ ନୁହେଁ। ଏହା ଏକ ଭଲ ଉପଲବ୍ଧି। ଆଇପିଏଲ୍ ଜିତିଥିଲେ ଆହୁରି ଭଲ ହୋଇଥାନ୍ତା, ଗୋଟିଏ ପାଦ ଆଗରେ ରହିଥାନ୍ତୁ। ଦଳ ଆସନ୍ତା ସିଜନ୍ରେ ଦୃଢ଼ ଭାବେ ଫେରିବ। ଦିଲ୍ଲୀର ପ୍ରଶଂସକମାନେ ସମଗ୍ର ସିଜନରେ ଆମକୁ ସମର୍ଥନ କରିଥିବାରୁ ଆୟର ଧନ୍ୟବାଦ ଜଣାଇଥିଲେ।
ଏହାଛଡ଼ା ଶ୍ରେୟସ କୋଚ୍ ରିକି ପଣ୍ଟିଂଙ୍କୁ ମଧ୍ୟ ପ୍ରଶଂସା କରିଛନ୍ତି। ଯେତେ ଲୋକଙ୍କ ସହ ସେ କାମ କରିଛନ୍ତି, ସମସ୍ତଙ୍କଠାରୁ ପଣ୍ଟିଂ ସର୍ବୋତ୍ତମ। ସେ ଖେଳିବାକୁ ସମ୍ପୂର୍ଣ୍ଣ ସ୍ବାଧିନତା ଦେଇଥିଲେ। ସେ ବେଶ ଆତ୍ମବିଶ୍ୱାସୀ। ବୈଠକ କରିବା ସହ ଖେଳାଳିମାନଙ୍କୁ ଉତ୍ସାହିତ କରିଥାନ୍ତି ତାହା ପ୍ରଶଂସନୀୟ ବୋଲି ସେ କହିଛନ୍ତି।