ନୂଆଦିଲ୍ଲୀ,୪।୨: ଅଷ୍ଟ୍ରେଲିଆ ବିପକ୍ଷ ସିରିଜରେ ଭାରତର କାମଚଳା ଅଧିନାୟକ ଦାୟିତ୍ୱ ସମ୍ଭାଳିଥିବା ଅଜିଙ୍କ୍ୟ ରାହାନେ ବେଶ୍ ପ୍ରଶଂସିତ ହୋଇଥିଲେ। ନିଜର ଶାନ୍ତ ସ୍ବଭାବ ସାଙ୍ଗକୁ ଖେଳାଳି ଚୟନରେ ଉତ୍କୃଷ୍ଟ ପ୍ରଦର୍ଶନକୁ ନେଇ ଦଳ ୨-୧ରେ ସିରିଜ ଜିତିଥିଲା। ଏବେ ବିରାଟ କୋହଲି ପୁଣିଥରେ ଦଳକୁ ଫେରୁଥିବାରୁ ସେ ଉପଅଧିନାୟକ ପଦ ତୁଲାଇବେ। ପଛରେ ରହି ସାହାଯ୍ୟ କରି ସେ ଖୁସି ଅନୁଭବ କରିବେ ବୋଲି ପ୍ରକାଶ କରିଥିଲେ। ଏବେ କୋହଲି ରାହାନେଙ୍କୁ ନେଇ ପ୍ରତିକ୍ରିୟା ଦେଇଛନ୍ତି।
ରାହାନେଙ୍କ ସହ ସମ୍ପର୍କକୁ ନେଇ କୋହଲି କହିଛନ୍ତି, ଜିକ୍ସ(ରାହାନେ) ଏବଂ ମୋର ମଧ୍ୟରେ ନୁହେଁ ବରଂ ପୁରା ଟିମ୍ର ସମ୍ପର୍କ ବିଶ୍ୱାସ ଉପରେ ନିର୍ଭର କରୁଛି। ଆମେ ସବୁ ଗୋଟିଏ ଲକ୍ଷ୍ୟ ନେଇ କାମ କରୁଛୁ। ତାହା ହେଲା ଭାରତକୁ ବିଜେତା ଭାବେ ଦେଖିବା। ରାହାନେ ଅଷ୍ଟ୍ରେଲିଆରେ ନିଜର କର୍ତ୍ତବ୍ୟ ବେଶ ଭଲ ଭାବେ ସମ୍ପନ୍ନ କରିଛନ୍ତି। ତାଙ୍କ ନେତୃତ୍ୱରେ ଦଳ ଜିତିବା ମୂହୁର୍ତ୍ତକୁ ଦେଖିବା ସୁନ୍ଦର ଅନୁଭୂତିଟିଏ ଥିଲା ବୋଲି କୋହଲି କହିଛନ୍ତି।
ରାହାନେଙ୍କ ସହ ମଇଦାନ ବାହାରେ ଥିବା ତାଳମେଳ ପଡ଼ିଆ ଭିତରେ ମଧ୍ୟ ସମାନ ଥାଏ। ଆମେ ପରସ୍ପର ସହ ଖେଳିବାକୁ ପସନ୍ଦ କରୁ। ଆମେ ପରସ୍ପରର ସମ୍ମାନ କରିଥାଉ। ସବୁଠାରୁ ମଇଦାନ ବାହାର ସମ୍ପର୍କ ଗୁରୁତ୍ୱପୂର୍ଣ୍ଣ ଥାଏ। ଆମେ ବହୁତ କଥା ହୋଇଥାଉ। ପରସ୍ପର ସହ ବୁଝାବଣା କରିଥାଉ। ସେ ଏଭଳି ଜଣେ ଖେଳାଳି, ଯିଏ କୌଣସି ପରିସ୍ଥିତିରେ ଉପଦେଶ ଦେବାର କ୍ଷମତା ରଖିଛନ୍ତି। ଆମେ ମଇଦାନରେ ମ୍ୟାଚ୍ ସମ୍ପର୍କରେ ଅନେକ କିଛି ବିଷୟରେ ଅନେକ ଚର୍ଚ୍ଚା କରିଥାଉ। ଏହି ସମ୍ପର୍କ ବିଶ୍ୱାସର ବୋଲି ମଧ୍ୟ କୋହଲି କହିଛନ୍ତି।