କ.ନୂଆଗାଁ/ଫୁଲବାଣୀ ଅଫିସ,୧୬ା୧: କନ୍ଧମାଳ ଜିଲା ସାରଙ୍ଗଡ ଥାନା ଅନ୍ତର୍ଗତ ବନାଙ୍ଗିଆ ଡ୍ୟାମ ନିକଟ ପୋଲରେ ସୋମବାର ଏକ କାର୍ ଭାରସାମ୍ୟ ହରାଇ ପ୍ରାୟ ୧୫ ଫୁଟ ତଳକୁ ଖସିପଡ଼ିଛି। ଏଥିରେ ୩ ବର୍ଷୀୟା ଏକ ଶିଶୁକନ୍ୟାର ମୃତ୍ୟୁ ଘଟିଥିବା ବେଳେ ଡ୍ରାଇଭରଙ୍କ ସମେତ ୪ ଜଣ ଗୁରୁତର ଆହତ ହୋଇଛନ୍ତି। ମୃତା ଶିଶୁକନ୍ୟା ଜଣକ ହେଲେ ସାରଙ୍ଗଡ଼ ପଦାସାହିର ଅଶୋକ ବେହେରାଙ୍କ ଝିଅ ଅମ୍ରିତା।
ପ୍ରକାଶ ଯେ, ଅଶୋକଙ୍କ ପରିବାରର ୪ ଜଣ ଭଞ୍ଜନଗରରୁ କାର୍ (ଓଡ଼ି୦୨ଏଓ୍ବାଇ୫୧୬୪) ଯୋଗେ କାର୍ ଯୋଗେ ସାରଙ୍ଗଡ଼ ଫେରୁଥିଲେ। ବନାଙ୍ଗିଆ ଡ୍ୟାମ ନିକଟରେ ଡ୍ରାଇଭର ଭାରସାମ୍ୟ ହରାଇବାରୁ କାର୍ଟି ପୋଲ ତଳକୁ ଖସି ପଡ଼ିଥିଲା। ଫଳରେ କାରରେ ଥିବା ସମସ୍ତେ ଗୁରୁତର ହୋଇଥିଲେ। ସ୍ଥାନୀୟ ଲୋକଙ୍କଠାରୁ ଖବରପାଇ ସାରଙ୍ଗଡ଼ ପୋଲିସ ଓ ଅଗ୍ନିଶମବାହିନୀ କାରରୁ ସମସ୍ତଙ୍କୁ ଉଦ୍ଧାର କରି ସାରଙ୍ଗଡ଼ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ। ସେଠାରେ ଶିଶୁକନ୍ୟା ଅମ୍ରିତାଙ୍କୁ ଡାକ୍ତର ମୃତ ଘୋଷଣା କରିଥିଲେ। ଡ୍ରାଇଭର ପଦାସାହିର ଡ୍ରାଇଭର କାଳିଆ ନାଏକଙ୍କ ସମେତ ସୁକାନ୍ତି ବେହେରା, ଦମୟନ୍ତି ବେହେରା ଏବଂ ନାବାଳକ ରାକେଶ ବେହେରାଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ ଫୁଲବାଣୀସ୍ଥିତ ଜିଲା ମୁଖ୍ୟ ଚିକିତ୍ସାଳୟକୁ ପଠାଯାଇଥିଲା । ଦୁର୍ଘଟଣାସ୍ଥଳରେ ସାରଙ୍ଗଡ଼ ଥାନା ଅଧିକାରୀ ବିଦୁଲିକା ବିଶ୍ୱାଳ ଏବଂ ଏଏସଆଇ କେଶବ ଭାତ୍ରା ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଏ ନେଇ ନଂ. ୮/୨୩ରେ ଏକ ମାମଲା ରୁଜୁ ହୋଇଛି।
