କୋରାପୁଟ,୬ା୭(ଅମିତାଭ ବେହେରା): କୋରାପୁଟସ୍ଥିତ ଶାବର ଶ୍ରୀକ୍ଷେତ୍ରରେ ରବିବାର ରଥଯାତ୍ରା ପାଇଁ ରଥ ଓ ପଥ ପ୍ରସ୍ତୁତ ହୋଇରହିଛି। ଏପଟେ ଏହାକୁ ଦେଖିବା ପାଇଁ ଜିଲା ଓ ଜିଲା ବାହାରରୁ ହଜାର ହଜାର ଭକ୍ତ କୋରାପୁଟରେ ପହଞ୍ଚିଛି। ଜିଲା ପ୍ରଶାସନ ଓ ଶାବର ଶ୍ରୀକ୍ଷେତ୍ର ମନ୍ଦିର ପରିଚାଳନା କମିଟି ପକ୍ଷରୁ ଏଥିନିମନ୍ତେ ସମସ୍ତ ପ୍ରକାର ପ୍ରସ୍ତୁତି କାର୍ଯ୍ୟ ଶେଷ ହୋଇଛି। ଶାବର ଶ୍ରୀକ୍ଷେତ୍ର ମନ୍ଦିର ପରିଚାଳନା କମିଟି ପକ୍ଷରୁ ବଡ଼ଦାଣ୍ଡରେ ପ୍ରସ୍ତୁତ ହୋଇଥିବା ୩ ରଥକୁ ପାରମ୍ପରିକ ପୂଜାର୍ଚ୍ଚନା ହୋମ କାର୍ଯ୍ୟ କରାଯାଇ ରଥକୁ ପ୍ରତିଷ୍ଠା କରାଯାଇଛି। ସେହିପରି ୩ ରଥ ଉପରେ ପତାକା ଲଗାଯାଇଛି। ମନ୍ଦିରର ପୂଜକ ରଘୁନାଥ ଶତପଥୀଙ୍କ ତତ୍ତ୍ୱାବଧାନରେ ବହୁ ପୂଜକ ଉପସ୍ଥିତ ରହି ଏହି ପୂଜାର୍ଚ୍ଚନା କରିଥିଲେ। ଶ୍ରୀଜିଉମାନଙ୍କ ରତ୍ନସିଂହାସନକୁ ଶୁଦ୍ଧି କରାଯାଇଥିଲା।
ରବିବାର ଭୋର୍ ୩ଟା ୪୯ରୁ ୩ଟା ୫୦ ମଧ୍ୟରେ ଠାକୁରଙ୍କ ନେତ୍ରୋତ୍ସବ ଓ ନବଯୌବନ କାର୍ଯ୍ୟ ସମ୍ପନ୍ନ କରାଯିବା ପରେ ସକାଳ ୭ଟାରେ ଦ୍ୱାର ଫିଟା ଓ ନବଯୌବନ ଦର୍ଶନ ଅନୁଷ୍ଠିତ ହେବ। ମା’ ବିମଳାଙ୍କଠାରୁ ଆଜ୍ଞାମାଳ ଭିକ୍ଷା ଓ ମଙ୍ଗଳାରୋପଣ ଦିବା ୮ଟା ୩୦ରୁ ୯ଟା ମଧ୍ୟରେ କରାଯିବ। ପରେ ପୂର୍ବାହ୍ନ ୯.୩୦ରୁ ଶ୍ରୀଜିଉଙ୍କ ଧାଡ଼ିପହଣ୍ଡି ଆରମ୍ଭ କରାଯିବ। ମଧ୍ୟାହ୍ନ ୧୨ଟା ୩୦ ମିନିଟ୍ରେ ରଥଟଣା ଆରମ୍ଭ କରାଯିବ ବୋଲି ନୀତି ନିର୍ଘଣ୍ଟ କରାଯାଇଥିବା ମନ୍ଦିର ପରିଚାଳନା କମିଟିର ସମ୍ପାଦକ ଡ. ଜଗବନ୍ଧୁ ସାମଲ ପ୍ରକାଶ କରିଛନ୍ତି।