ନୂଆଦିଲ୍ଲୀ,୧୫।୭: କରୋନା ମହାମାରୀ ପାଇଁ ବଜାର ପ୍ରଭାବିତ ହୋଇଛି। ସଂକ୍ରମଣକୁ ରୋକିବା ପାଇଁ ସରକାର ୨ ମାସରୁ ଅଧିକ ସମୟ ଦେଶକୁ ଲକ୍ଡାଉନ କରିବା ଫଳରେ ଦେଶର ଅର୍ଥ ବ୍ୟବସ୍ଥାରେ କାରବାର ଠପ୍ ହୋଇଯାଇଛି। ବର୍ତ୍ତମାନ ସଂକ୍ରମଣର ମାତ୍ରା ଅଧିକ ରହିଛି। ଫଳରେ ବଜାର ସ୍ବାଭାବିକ ସ୍ଥିତିକୁ ଫେରିପାରିନାହିଁ। ଦେଶର ଅଟୋମୋବାଇଲ ବଜାର ଗତ କିଛି ମାସ ଧରି ଲଗାତର କ୍ଷତି ସହି ଚାଲିଛି। ଜୁନ ମାସରେ ମଧ୍ୟ ଯାନ ବିକ୍ରି କ୍ଷତିଗ୍ରସ୍ତ ହୋଇ ରହିଛି। ଜୁନରେ ଯାତ୍ରୀବାହୀ ଯାନ ବିକ୍ରି ୪୯.୫୯% ଖସିଥିବା ଜଣାପଡିଛି। ଚଳିତ ବର୍ଷ ଜୁନରେ ୧.୦୫ ଲକ୍ଷ ଯାନ ବିକ୍ରି ହୋଇଛି। ଗତ ବର୍ଷ ସମାନ ସମୟରେ ୨.୦୯ ଲକ୍ଷ ୟୁନିଟ ଯାନ ବିକ୍ରି ହୋଇଥିଲା। ବର୍ତ୍ତମାନ କଟକଣା କୋହଳ ହେଉଥିବାରୁ ବଜାର ଧୀରେ ଧୀରେ ସ୍ଥିତାବସ୍ଥାକୁ ଫେରିବ ବୋଲି ଅଟୋ ଉଦ୍ୟୋଗ ସଂଘ ସୋସାଇଟି ଅଫ୍ ଇଣ୍ଡିଆନ ଅଟୋମୋବାଇଲ ମାନୁଫାକଚର୍ସ (ସିଆମ୍)ପକ୍ଷରୁ ସୂଚନା ପ୍ରଦାନ କରାଯାଇଛି।
ସୂଚନା ମୁତାବକ, ଦୁଇଚକିଆ ଯାନ ବିକ୍ରି ୩୮.୫୬% କମିଛି। ଗତ ବର୍ଷ ଜୁନ୍ରେ ୧୬.୪୯ ଲକ୍ଷ ୟୁନିଟ ଯାନ ବିକ୍ରି ହୋଇଥିବା ବେଳେ ଏହା ଚଳିତ ବର୍ଷ ସମାନ ସମୟରେ ୧୦.୧୩ ଲକ୍ଷ ୟୁନିଟକୁ ହ୍ରାସ ଘଟିଛି। ଗତ ବର୍ଷ ଏହି ସମୟରେ ୧୦.୮୪ ଲକ୍ଷ ୟୁନିଟ ମୋଟର ସାଇକେଲ ବିକ୍ରି ହୋଇଥିବା ବେଳେ ଚଳିତ ବର୍ଷ ଜୁନ୍ରେ ଏହା ୭.୦୨ ଲକ୍ଷ ୟୁନିଟକୁ ଖସିଛି। ସେହିଭଳି ସ୍କୁଟର ବିକ୍ରି ୪୭.୩୭ ଲକ୍ଷ ୟୁନିଟ ହ୍ରାସ ଘଟି ୨.୨୬ ଲକ୍ଷ ୟୁନିଟ ରହିଛି, ଯାହା ଗତ ବର୍ଷ ୫.୧୨ ଲକ୍ଷ ୟୁନିଟ ରହିଥିବା ଜଣାପଡିଛି। ବଜାର ପ୍ରଭାବିତ ହୋଇ ରହିଥିବାରୁ ଏହା ଲୋକଙ୍କ କ୍ରୟ ବ୍ୟବହାର ଉପରେ ପଡିଛି। ଲୋକମାନେ ନଗଦ ଅର୍ଥ ସେମାନଙ୍କ ନିକଟରେ ରଖିବାକୁ ଗୁରୁତ୍ୱ ଦେଉଛନ୍ତି। ଗ୍ରାହକ ଅତି ଜରୁରୀ ସାମଗ୍ରୀ କ୍ରୟକୁ ପ୍ରାଥମିକତା ଦେଉଛନ୍ତି। ବଜାରରେ ମୋଟାମୋଟି ଭାବେ ଚାହିଦା ଫେରିନାହିଁ। ଏହାର ପ୍ରଭାବ କମ୍ପାନୀଗୁଡିକର ବିକ୍ରି ଉପରେ ପଡୁଛି। ପ୍ରାୟ ସବୁ କମ୍ପାନୀ କୋଭିଡ୍ ଯୋଗୁ କ୍ଷତି ସାମ୍ନା କରୁଥିବା ନଜରକୁ ଆସିଛି।
