ଓଡ଼ଗାଁ,୧୦ା୧୨(ସ୍ବ.ପ୍ର.): ନୟାଗଡ଼ ଜିଲା ଓଡ଼ଗାଁ ଆଦର୍ଶ ଥାନା ଅନ୍ତର୍ଗତ କଦଳୀବନ୍ଧ ସ୍କୁଲ ନିକଟରେ ଗୁରୁବାର ସକାଳେ ଏକ କାର୍ ସହିତ ଦୁଇ ବାଇକ୍ ମୁହାଁମୁହିଁ ଧକ୍କା ହୋଇଛି। ଏଥିରେ ଜଣଙ୍କ ଜୀବନ ଯାଇଥିବା ବେଳେ ଆଉ ଜଣେ ଆହତ ହୋଇଛନ୍ତି। ମୃତକ ଜଣକ ହେଲେ ସ୍ଥାନୀୟ ଗୌଡ଼ପୁଟ ଗ୍ରାମର ଅଶୋକ ପୃଷ୍ଟି (୪୫)। ସେହିପରି ଆଉ ଜଣେ ବାଇକଆରୋହୀ ଜାମୁସାହିର ପ୍ରମୋଦ ନାୟକ (୩୦)। ସେ ସାମାନ୍ୟ ଆହତ ହୋଇ ସ୍ଥାନୀୟ ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ଘଟଣାସ୍ଥଳରୁ ଚାଳକ କାର୍ ଛାଡ଼ି ଚାଲିଯାଇଥିବା ବେଳେ ପୋଲିସ ଜେଏଚ୍ ୦୨ ବିଡି ୫୨୩୫ ନମ୍ବର ବିଶିଷ୍ଟ କାର୍ ସହିତ ଦୁଇଟି ବାଇକ୍ ଜବତ କରିଛି। ମୃତଦେହ ଜବତ କରିବା ସହ ଏକ ମାମଲା ରୁଜୁ କରି ପୋଲିସ ଅଧିକ ତଦନ୍ତ ଚଳାଇଛି।
