ନୟାଗଡ଼ ଅଫିସ/ରଣପୁର,୬ା୫(ସ୍ବ.ପ୍ର.): ବଲାଙ୍ଗୀର-ଖୋର୍ଦ୍ଧା ୫୭ନଂ. ଜାତୀୟ ରାଜପଥର ନୟାଗଡ଼ ଜିଲା ରଣପୁର ଥାନା ଅନ୍ତର୍ଗତ ରାଜସୁନାଖଳା ନିକଟ ବିନୋଦପଡ଼ା ଛକରେ ଗୁରୁବାର ରାତି ପ୍ରାୟ ସାଢ଼େ ୧୦ଟାରେ ଏକ ଅଙ୍ଗାରକାମ୍ଳ ଗ୍ୟାସ୍ ବୋଝେଇ ଟ୍ୟାଙ୍କର ଦୁର୍ଘଟଣାଗ୍ରସ୍ତ ହୋଇଥିଲା। ଫଳରେ ଟ୍ୟାଙ୍କରରୁ ବହୁ ପରିମାଣର ଅଙ୍ଗାରକାମ୍ଳ ଗ୍ୟାସ୍ ଲିକ୍ ହୋଇଥିଲା। ସେହି ଗ୍ୟାସ୍ ଯୋଗୁ ଜାତୀୟ ରାଜପଥରେ ଗାଡ଼ିମୋଟର ଯାତାୟାତରେ ବାଧା ସୃଷ୍ଟି ହୋଇଥିଲା। ଲୋକେ ଅଣନିଃଶ୍ୱାସୀ ହୋଇପଡିଥିଲେ। ଗ୍ୟାସ୍ ଲିକ୍ ଖବର ଜଣାପଡ଼ିବା ପରେ ସ୍ଥାନୀୟ ଲୋକଙ୍କ ମଧ୍ୟରେ ଆତଙ୍କ ଖେଳିଯାଇଥିଲା। ବୌଦ୍ଧରୁ ଭୁବନେଶ୍ୱର ଅଭିମୁଖେ ଯାଉଥିବା ଏକ ହାଇୱାକୁ ପଛପଟୁ ଏହି ଗ୍ୟାସ୍ ଟ୍ୟାଙ୍କର ଧକ୍କା ଦେବାରୁ ଦୁର୍ଘଟଣା ଘଟିଛି। ଦୁର୍ଘଟଣାଗ୍ରସ୍ତ ଟ୍ୟାଙ୍କରରେ ପ୍ରାୟ ୧୩ ହଜାର ଲିଟର ଗ୍ୟାସ୍ ରହିଛି ବୋଲି ସୂଚନା ମିଳିଛି। ଯଦି ଗ୍ୟାସ୍ ଟାଙ୍କିଟି ଫାଟିଯିବ ପରିସ୍ଥିତି ଗୁରୁତର ହେବ ବୋଲି ପ୍ରଚାରିତ ହେବା ପରେ ଲୋକମାନେ ସେହି ସ୍ଥାନ ଛାଡ଼ି ପଳାଇଥିଲେ। ଦୁର୍ଘଟଣାର ପ୍ରାୟ ୧ ଘଣ୍ଟା ପରେ ରଣପୁର ଫାଣ୍ଡି ପୋଲିସ ଘଟଣାସ୍ଥଳରେ ପହଞ୍ଚତ୍ ପରିସ୍ଥିତି ପ୍ରତି ନଜର ରଖିଛି। ଏହି ଖବର ଲେଖାହେବା ପର୍ଯ୍ୟନ୍ତ ଦମକଳ ବାହିନୀ ଘଟଣାସ୍ଥଳରେ ପହଞ୍ଚତ୍ ନ ଥିବା ସୂଚନା ମିଳିଛି।