ଶିଶୁର ଉତ୍ତମ ସ୍ବାସ୍ଥ୍ୟ ତଥା ବିଭିନ୍ନ ସମସ୍ୟା ଦୂର କରିବା ନିମନ୍ତେ କଙ୍ଗାରୁ କେୟାର ବା କେଏମ୍ସି ଏକ ସୁନ୍ଦର ବିକଳ୍ପ। ନବଜାତ ଶିଶୁକୁ କଙ୍ଗାରୁ ଭଳି ନିଜ ତ୍ୱଚା ସହ ଲଗାଇ ରଖିବାକୁ ହୋଇଥାଏ। ମାଆମାନଙ୍କୁ ପରିଷ୍କାର ପରିଚ୍ଛନ ଉପରେ ଅଧିକ ଧ୍ୟାନ ଦେବାକୁ ହେବ। ମା’କୁ କୌଣସି ପ୍ରକାରର ରୋଗ ହୋଇ ନ ଥିବ, ସେ ପୋଷାକ ବଦଳାଉଥିବେ ଏବଂ ହାତକୁ ସଫା ରଖିବାକୁ ହେବ। ଯଦି ମାଆଟିଏ କେଏମ୍ସି ଦେବାକୁ ଅକ୍ଷମ ତେବେ ଶିଶୁର ପିତା କିମ୍ବା ଦାଦା ଅଥବା ପରିବାରର ଅନ୍ୟ ସଦସ୍ୟ ବି ଶିଶୁକୁ କେଏମ୍ସି ଦେଇପାରିବେ।
କିପରି ଦେବେ କେଏମ୍ସି
କେଏମ୍ସି ଦେବା ସମୟରେ ଆଗପଟରୁ ଖୋଲା ହୋଇପାରୁଥିବା ପୋଷାକ ପିନ୍ଧନ୍ତୁ। ଶିଶୁକୁ ମଧ୍ୟ ନ୍ୟାପକିନ୍ ପିନ୍ଧାଇବା ସହିତ ଆଗପଟରୁ ଖୋଲା ଥିବା ପୋଷାକ ପିନ୍ଧାନ୍ତୁ। ଶିଶୁକୁ କେଏମ୍ସି ଦେଉଥିବା ବ୍ୟକ୍ତି ପୋଷାକ ଖୋଲି ଛାତିରେ ଜାକି ଧରନ୍ତୁ। ଏହି ପ୍ରକ୍ରିୟା ବସିବାବେଳେ କିମ୍ବା ଶୋଇବାବେଳେ ଦେଇପାରିବେ। ପ୍ରଥମେ ଅତିକମରେ ୧ଘଣ୍ଟା ଏବଂ ପରେ ସମୟ ବଢାଇ ପୂରା ଦିନ ଶିଶୁକୁ କେଏମ୍ସି ଦେବା ଉଚିତ। ଶିଶୁର ଓଜନ ଅଢେଇ କିଲୋଗ୍ରାମରୁ ଅଧିକ ହେଲେ କେଏମ୍ସି ବନ୍ଦ କରି ଦିଆଯାଇପାରେ।
କେଏମ୍ସିର ଲାଭ:କଙ୍ଗାରୁ କେୟାର ପଦ୍ଧତି ଦ୍ୱାରା ଶିଶୁର ଶୀଘ୍ର ଓଜନ ବୃଦ୍ଧି ହୋଇଥାଏ। ମା’ର କ୍ଷୀର ବଢ଼ିଥାଏ। ଶିଶୁର ତାପମାତ୍ରା ଠିକ୍ ରହିଥାଏ ଏବଂ ଇନ୍ଫେକସନରୁ ମୁକ୍ତି ମିଳିଥାଏ। ଠିକ୍ଭାବେ ପ୍ରକ୍ରିୟା କରିଲେ ମାତ୍ର ୩ ଦିନରେ ନବଜାତ ଶିଶୁର ବିକାଶ ହୋଇଥାଏ। ନବଜାତ ଶିଶୁର ମୃତ୍ୟୁହାର ବି କମ୍ ହୋଇଥାଏ।ବିଶେଷଜ୍ଞଙ୍କ କହିବା ଅନୁସାରେ ଇନ୍କ୍ୟୁବେଟର ତୁଳନାରେ କେଏମ୍ସି ଅତ୍ୟନ୍ତ ଫଳପ୍ରଦ।