ବାଲେଶ୍ୱର ଅଫିସ,୨୨ା୫: ଦିନକୁ ଦିନ ବଢୁଛି ରେଳ ଲାଇନ୍ ଉପରେ ଦୁର୍ଘଟଣା। ରେଳ ବିଭାଗ ତରଫରୁ ନିଆଯାଇଥିବା ନିୟମ କାନୁନ୍କୁ ମାନୁନାହାନ୍ତି ଲୋକମାନେ। ରେଳ ଫାଟକ ପଡ଼ିଥିବାବେଳେ କାନରେ ମୋବାଇଲ୍ ଲଗାଇ ପାର୍ ହେବା ଏବଂ ରେଳ ଲାଇନ ଡେଇଁ ପ୍ଲାଟଫର୍ମ ପାର ହେଉଥିବା ବେଳେ ବାଲେଶ୍ୱର ଜିଲାରେ ୨ଦିନରେ ୨ଟି ଘଟଣାରେ ୨ଜଣଙ୍କ ମୃତ୍ୟୁ ଘଟିଛି। ରବିବାର ପୂର୍ବାହ୍ନରେ ଦକ୍ଷିଣ ପୂର୍ବ ରେଳପଥର ଖଡ଼ଗପୁର ଡିଭିଜନ ଅନ୍ତର୍ଗତ ବାଲେଶ୍ୱର ଜିଲା ଜଳେଶ୍ୱର ନିକଟସ୍ଥ ରାଜଘାଟ ରେଳ ଷ୍ଟେଶନରେ ଜଣେ ୬୦ ବର୍ଷୀୟ ଲୋକ ରେଳ ଧାରଣାରେ ଛିଡ଼ା ହୋଇଥିବା ମାଲବାହୀ ଟ୍ରେନ୍ ତଳ ଦେଇ ଷ୍ଟେଶନ ଆଡ଼କୁ ଆସୁଥିବାବେଳେ ଅପ୍ଲାଇନରେ ଜଳେଶ୍ୱର ପୁରୀ ମେମୋ ଟ୍ରେନ୍ରେ ବାଡ଼େଇ ହୋଇଥିଲେ। ଫଳରେ ଘଟଣାସ୍ଥଳରେ ତାଙ୍କର ଜୀବନ ଯାଇଥିଲା। ବାଲେଶ୍ୱର ଜିଆର୍ପି ଥାନା ପୋଲିସ ପହଞ୍ଚତ୍ ମୃତଦେହ ଜବତ କରି ଏକ ଅପମୃତ୍ୟୁ ମାମଲା (ନଂ. ୪୫/୨୩) ରୁଜୁ କରି ତଦନ୍ତ ଜାରି ରଖିଛି। ଅଦ୍ୟାବଧି ମୃତକଙ୍କ ପରିଚୟ ମିଳିପାରିନାହଁି। ସେହିପରି ଶନିବାର ଅପରାହ୍ନ ପ୍ରାୟ ୩ଟାରେ ଟାଉନ୍ ଥାନା ଅଧୀନ ସୁନହଟ୍ ଗ୍ରାମର ସମିମା ବିବି (୫୦) ନାମ୍ନୀ ମହିଳା ସାଇକେଲ ଧରି ବାଲେଶ୍ୱର ସହର ଅଙ୍ଗାରଗଡ଼ିଆସ୍ଥିତ ରେଳ ଫାଟକ ନିକଟରେ ପହଞ୍ଚତ୍ଥିଲେ। ଫାଟକ ପଡ଼ିଥିବା ବେଳେ ଅପେକ୍ଷା ନ କରି ବେପରୁଆ ଭାବେ ପାର ହେଉଥିଲେ। ଏହି ସମୟରେ ନିୟୁ ଜଲପାଇଗୁଡ଼ି ଏକ୍ସପ୍ରେସ୍ ଟ୍ରେନ୍ ତାଙ୍କୁ ଧକ୍କା ଦେଇଥିଲା। ଘଟଣାସ୍ଥଳରେ ରକ୍ତ ଜୁଡୁବୁଡୁ ଅବସ୍ଥାରେ ପଡ଼ିଥିବା ବେଳେ ସ୍ଥାନୀୟ ଲୋକେ ତାଙ୍କୁ ଆମ୍ବୁଲାନ୍ସ ଯୋଗେ ଜିଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏନେଇ ବାଲେଶ୍ୱର ଜିଆର୍ପି ଥାନାରେ ମାମଲା (ନଂ. ୪୪।୨୩) ରୁଜୁ କରାଯାଇଛି। ଏହିଭଳି ପ୍ରାୟ ପ୍ରତିମାସ ୧୦ରୁ ଅଧିକ ଜୀବନ ଯାଉଛି।
ଏନେଇ ବାଲେଶ୍ୱର ଜିଆର୍ପି ଥାନା ଅଧିକାରୀ ପପୁ କୁମାର ନାୟକ କହନ୍ତି, ସର୍ବଦା ରେଳ ଫାଟକ ପଡ଼ିଥିବା ବେଳେ ରେଳଲାଇନ୍ ପାର ନ ହେବା କିମ୍ବା ଷ୍ଟେଶନରେ ଗୋଟିଏ ପ୍ଲାଟଫର୍ମରୁ ଅନ୍ୟ ଏକ ପ୍ଲାଟଫର୍ମକୁ ଯିବା ପାଇଁ ଶିଡ଼ି ବ୍ୟବହାର କରିବା ସହିତ ପ୍ରତ୍ୟେକ ସମୟରେ ରେଳ କର୍ମଚାରୀଙ୍କ ଦ୍ୱାରା ଡାକବାଜି ଯନ୍ତ୍ର ଯୋଗେ ଘୋଷଣା କରାଯାଉଥିବା ନିୟମକୁ ମାନିବା ପାଇଁ ଲୋକମାନଙ୍କୁ ସଚେତନ କରାଯାଉଛି। କିନ୍ତୁ କେତେକ ଲୋକ ବିଭିନ୍ନ କାରଣବଶତଃ ଏହାକୁ ଅବମାନନା କରିବା ଫଳରେ ଅକାଳରେ ଜୀବନ ଯାଉଥିବା କହିଛନ୍ତି।