ବଲାଙ୍ଗୀର,୧୬ା୧୨(ବୀରେନ୍ଦ୍ର କୁମାର ଝାଙ୍କର): ଇଜିପ୍ଟର ଗିଜା ପ୍ରାନ୍ତରେ ଅବସ୍ଥିତ ପ୍ରସିଦ୍ଧ ଅହମଦ ସୌକି ମ୍ୟୁଜିୟମର କର୍ମା ଇବନ୍ ହେନୀ ସଂସ୍କୃତି କେନ୍ଦ୍ରଠାରେ ଆୟୋଜିତ ‘ସାଦି ଇନ୍ ଦ ଆଏଜ୍ ଅଫ୍ ଦ ୱାର୍ଲଡ୍’ ଅନ୍ତର୍ଜାତୀୟ କ୍ୟାରିକେଚର ଏକ୍ଜିବିଶନ୍ରେ ଓଡ଼ିଶାର କାର୍ଟୁନିଷ୍ଟ ଭ୍ରାତୃଦ୍ୱୟ ଅଶ୍ୱିନୀ ଓ ଅବନୀଙ୍କ ଏକ କୃତି ସ୍ଥାନ ପାଇବାର ସୌଭାଗ୍ୟ ଲାଭ କରିଛି। ଅଲ୍ ମୋମିଆ (ଦ ମମି) ପରି ବହୁଚର୍ଚ୍ଚିତ ସିନେମାର ନିର୍ଦ୍ଦେଶକ ତଥା ଇଜିପ୍ଟ ସିନେ ଜଗତର ଜଣାଶୁଣା ବ୍ୟକ୍ତିତ୍ୱ ସାଦି ଆବ୍ଦେଲ୍ ସାଲାମଙ୍କ ସ୍ମୃତିରେ ଇଜିପ୍ଟ ସରକାରଙ୍କ ସଂସ୍କୃତି ବିଭାଗ ଆନୁକୂଲ୍ୟରେ ଆୟୋଜିତ ଏହି ପ୍ରଦର୍ଶନୀକୁ ଇଜିପ୍ଟ କ୍ୟାରିକେଚର ଆସୋସିଏଶନର ମୁଖ୍ୟ ମୁସ୍ତାଫା ଅଲ୍ ଶେଖ୍ ଗତ ଡିସେମ୍ବର ୧୧ରେ ଉଦ୍ଘାଟନ କରିଥିଲେ। ଏହି ଅବସରରେ ଇଜିପ୍ଟର କାଏରୋଠାରେ ଅବସ୍ଥାପିତ ଗ୍ରୀସ୍, ମାଲ୍ଟା ଏବଂ ପର୍ତ୍ତୁଗାଲର ରାଷ୍ଟ୍ରଦୂତଗଣ, କର୍ମା ଇବନ୍ ହେନୀ ସଂସ୍କୃତି କେନ୍ଦ୍ରର ଡାଇରେକ୍ଟର ହେସାମ ଆବୁ ଅଲ୍ ଫୋତୋ ଏବଂ ଆୟୋଜକ ତଥା ଇଜିପ୍ଟ କ୍ୟାରିକେଚର ଆସୋସିଏଶନର ସେକ୍ରେଟେରି ଜେନେରାଲ ଫୌଜି ମର୍ସୀ ଉପସ୍ଥିତ ଥିଲେ। ଏଥିରେ ଭାରତ ସମେତ ବ୍ରାଜିଲ, ରୋମାନିଆ, ଇଟାଲି, ସୁଇଡେନ୍, ସାଉଦି ଆରବ ପରି ବିଶ୍ୱର କୋଣ ଅନୁକୋଣରୁ ପ୍ରାୟ ୧୦୦ଟି କାର୍ଟୁନ୍କୁ ପ୍ରଦର୍ଶନୀ ପାଇଁ ନିର୍ବାଚିତ କରାଯାଇଥିଲା।
ପ୍ରକାଶଯୋଗ୍ୟ, ନିକଟ ଅତୀତରେ ‘ରାମ ଆଏଙ୍ଗେ’ ବିଷୟକ ଏକ ସର୍ବଭାରତୀୟ କାର୍ଟୁନ୍ ପ୍ରତିଯୋଗିତାରେ ଅଶ୍ୱିନୀ-ଅବନୀଙ୍କ କାର୍ଟୁନ୍ ପୁରସ୍କୃତ ତଥା ପ୍ରକାଶିତ ହେବାର ସୌଭାଗ୍ୟ ଲାଭ କରିଥିଲା। ଏହାସହ କାଏରୋଠାରେ ଆୟୋଜିତ ‘ସ୍ପିରିଟ୍ ଅଫ୍ ଗାନ୍ଧୀ’ ଇଣ୍ଟରନ୍ୟାଶନାଲ ଏକ୍ଜିବିଶନରେ ମଧ୍ୟ ଏମାନଙ୍କ କୃତି ସ୍ଥାନ ପାଇଥିଲା। ସୂଚନାଯୋଗ୍ୟ, ଦୀର୍ଘ ୩୫ ବର୍ଷରୁ ଅଧିକ ସମୟ ଧରି କାର୍ଟୁନ୍ର ଧାରାକୁ ପ୍ରବହମାନ କରିବାରେ ଯୋଗଦାନ କରିଆସୁଥିବା ଓଡ଼ିଶାର ଏହି ଭ୍ରାତୃଦ୍ୱୟ ବିଶ୍ୱ ବ୍ୟଙ୍ଗଚିତ୍ର ଜଗତରେ ବେଶ୍ ପ୍ରତିଷ୍ଠିତ। ପୂର୍ବରୁ ୨୦୧୪ ମସିହାରୁ ଲିମ୍କା ବୁକ୍ ଅଫ୍ ରେକର୍ଡରେ ସ୍ଥାନ ପାଇ ସାରିଥିବା ଅଶ୍ୱିନୀ-ଅବନୀ ଅନେକ ଥର ଅନ୍ତର୍ଜାତୀୟ ତଥା ଜାତୀୟ ସ୍ତରରେ ପୁରସ୍କୃତ ଓ ସମ୍ବର୍ଦ୍ଧିତ ହୋଇସାରିଛନ୍ତି। ଭ୍ରାତୃଦ୍ୱୟଙ୍କ ଦ୍ୱାରା ଆୟୋଜିତ ପି.ସି. ରଥ ମେମୋରିଆଲ ଇଣ୍ଟରନ୍ୟାଶନାଲ ୱେବ୍ କାର୍ଟୁନ୍ କଣ୍ଟେଷ୍ଟ ବିଶ୍ୱସ୍ତରରେ ବେଶ୍ ପ୍ରସିଦ୍ଧି ଲାଭ କରିଛି।
