ଜୟପୁର,୭ା୬: ଅଭିନବ ଉପାୟରେ ମୁଢ଼ି ବସ୍ତା ଭିତରେ ଗଞ୍ଜେଇ ଚାଲାଣ ବେଳେ କୋରାପୁଟ ଜିଲା ଜୟପୁର ସଦର ପୋଲିସ ଚଢାଉ କରି ଏହାକୁ ଧରିଛି। ପ୍ରାୟ ୧ ଟନ ଗଞ୍ଜେଇ ଜବତ ହୋଇଛି। ଘଟଣାରେ ସମ୍ପୃକ୍ତ ୨ ଜଣଙ୍କୁ ଅଟକ ରଖି ପଚରାଉଚୁରା କରୁଛି। ଏକ ଟ୍ରକ୍ରେ ଗଞ୍ଜେଇ ମହାରାଷ୍ଟ୍ର ଚାଲାଣ ହେଉଥିବା ଖବର ପାଇ ଥାନା ଅଧିକାରୀ ଆଦିତ୍ୟ ମହାକୁଡ କୋରାପୁଟ ଘାଟିରେ ଜଗି ରହିଥିଲେ। ଟ୍ରକ୍ (ନଂ.ଏମ୍ଏଚ୍ ୧୮ ବିଜି- ୫୫୪୧) ଘାଟିରେ ପହଞ୍ଚିବା ପରେ ଅଟକାଇ ଯାଞ୍ଚ କରାଯାଇଥିଲା। ଏହି ସମୟରେ ମୁଢି ବସ୍ତା ଭିତରୁ ଗଞ୍ଜେଇ ମିଳିଥିଲା। ଘଟଣାର ଅଧିକ ତଦନ୍ତ ଚାଳିଥିବା ଥାନା ଅଧିକାରୀ ମହାକୁଡ କହିଛନ୍ତି। ସୂଚନାଯୋଗ୍ୟ, ପୂର୍ବରୁ ଗଞ୍ଜେଇ ଚାଲାଣକାରୀମାନେ ପରିବା ବସ୍ତା, ପଣସ ବସ୍ତା ଭିତରେ ଗଞ୍ଜେଇ ପୂରାଇ ନେଉଥିବା ବେଳେ ଧରାପଡିଥିଲେ। ଏବେ ପୋଲିସ ନଜର ହଟାଇବା ପାଇଁ ସେମାନେ ମୁଢ଼ି ବସ୍ତା ଭିତରେ ଗଞ୍ଜେଇ ନେଉଥିଲେ।