କଟକ ଅଫିସ,୧୩।୧୧: ଅବକାରୀ ବିଭାଗର ରାଜ୍ୟ ଫ୍ଲାଇଂ ସ୍କ୍ବାଡ୍ ଶନିବାର ଟାଙ୍ଗି ଛକ ନିକଟରୁ ୮୦ କେଜି ଗଞ୍ଜେଇ ଏବଂ ଚୋରା ଚାଲାଣରେ ବ୍ୟବହୃତ ଏକ କାରକୁ ଜବତ କରିଛି। ଘଟଣାରେ ସମ୍ପୃକ୍ତ ୩ ଜଣଙ୍କୁ ଅବକାରୀ ବିଭାଗ ଗରିଫ କରିଛି। ସେମାନେ ହେଲେ, ପଶ୍ଚିମବଙ୍ଗ ମୁର୍ଶିଦାବାଦ ଜିଲା ଜଳାଙ୍ଗି ଅଞ୍ଚଳର ଲାଲଚାନ୍ଦ ମୋଲା(୨୨), ମହମ୍ମଦ ମୋକଜୁଲ ହକ ମୁଲା(୩୨), ମାବୁଦ ମଣ୍ଡଳ(୨୦)।
ସୂଚନା ମୁତାବକ, ସ୍କ୍ବାଡକୁ କନ୍ଧମାଳରୁ ଏକ କାର ଯୋଗେ ପଶ୍ଚିମବଙ୍ଗ ଗଞ୍ଜେଇ ଚାଲାଣ ହେଉଥିବା ଖବର ମିଳିଥିଲା। ସ୍କ୍ବାଡର ଅଧୀକ୍ଷକ ଦେବାଶିଷ ପଟେଲଙ୍କ ନେତୃତ୍ୱରେ ଫ୍ଲାଇଂ ସ୍କ୍ବାଡ୍ ଟିମ୍ ଟାଙ୍ଗି ଛକରେ ଛକି ରହିଥିଲା। ଟାଙ୍ଗି ଛକରେ କାରଟି ପହଞ୍ଚିବା ପରେ ଅବକାରୀ ଟିମ୍ କାରକୁ ଅଟକାଇ ଯାଞ୍ଚ କରିଥିଲା। ଯାଞ୍ଚ ବେଳେ ୪ଟି ପଲିଥିନ ବସ୍ତାରେ ୮୦ କେଜି ଗଞ୍ଜେଇ ମିଳିଥିଲା। ଯାହାର ମୂଲ୍ୟ ପ୍ରାୟ ୧୦ ଲକ୍ଷ ହେବ ବୋଲି ଅଧୀକ୍ଷକ ପଟେଲ ସୂଚନା ଦେଇଛନ୍ତି। ଟିମ୍ରେ ଆଇଆଇସି ସରୋଜ କୁମାର ପରିଡା, ଇନ୍ସପେକ୍ଟର ସଚିନ ବେହେରା, ଏଏସ୍ଆଇ ସକିର ଉଲ୍ଲା, ନଟବର ମଲ୍ଲିକ, ବ୍ରଜକିଶୋର ବିନ୍ଧାଣୀ, ମୋତିଲାଲ ମହାନ୍ତ ପ୍ରମୁଖ ସାମିଲ ଥିଲେ।
