ଭୁବନେଶ୍ୱର,୪।୪(ସତ୍ୟଜିତ୍ ରାଉତ)ନବୀନ ଓଡ଼ିଶା ଓ ୫-ଟି ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ୍ଙ୍କ ସୁରକ୍ଷା ସମ୍ପର୍କିତ ମିଥ୍ୟା ତଥ୍ୟ ପ୍ରଘଟ ଅଭିଯୋଗକୁ କମିଶନରେଟ୍ ପୋଲିସ ଗୁରୁତ୍ୱର ସହ ନେଇଛି। ପାଣ୍ଡିଆନ୍ଙ୍କ ସୁରକ୍ଷାରେ ୭୪ ପୋଲିସ ନିୟୋଜିତ ହୋଇଥିବା ନେଇ ସୂଚନା ଅଧିକାରୀ ଆଇନ ବଳରେ କମିଶନରେଟ୍ ପୋଲିସର ରିଜର୍ଭ ପୋଲିସ ଅଫିସ୍ ପକ୍ଷରୁ ଚିଠି ଦ୍ୱାରା ତଥ୍ୟ ମିଳିଥିବା ଓଡ଼ିଶା ସୂଚନା ଅଧିକାର ଅଭିଯାନ (ଓସା) ପକ୍ଷରୁ କୁହାଯାଇଥିଲା। ତେବେ କମିଶନରେଟ୍ ପୋଲିସ ପକ୍ଷରୁ ଏହାକୁ ମିଛ ଚିଠି ବୋଲି ଅଭିଯୋଗ କରାଯାଇଛି। ଏ ସଂକ୍ରାନ୍ତରେ ରିଜର୍ଭ ଇନ୍ସପେକ୍ଟର ଭଗବାନ ପାଣିଗ୍ରାହୀ ଶହୀଦନଗର ଥାନାରେ ଏତଲା ଦେଇଛନ୍ତି। ପୋଲିସ ଉକ୍ତ ଏତଲାକୁ ଆଧାର କରି ଆଇପିସି ଦଫା ୪୧୯, ୪୨୦, ୪୬୫, ୪୬୮, ୪୬୯, ୪୭୧, ୫୦୫, ୩୪ ସହ ୬୬ଡି ଆଇଟି ଆକ୍ଟରେ ଏକ ମାମଲା (ନଂ.୧୯୩/୨୦୨୪) ରୁଜୁ କରି ତଦନ୍ତ ଜାରି ରଖିଛି। ଏହି ମାମଲାରେ ପୋଲିସ ୩ଜଣ ସୂଚନା ଅଧିକାର କର୍ମୀଙ୍କୁ ଅଭିଯୁକ୍ତ ଦର୍ଶାଯାଇଛି। ସେମାନେ ହେଲେ ପ୍ରଦୀପ ପ୍ରଧାନ, ପ୍ରକାଶ ଚନ୍ଦ୍ର ଦାସ ଓ ଶ୍ରୀକାନ୍ତ ପାକଳ। ତେବେ ଏହି ମାମଲାରେ ଅଧିକ ତଦନ୍ତ କରାଯାଉଥିବା ନେଇ ଶହୀଦନଗର ଥାନାଧିକାରୀ ଅଶୋକ ନାୟକ ସୂଚନା ଦେଇଛନ୍ତି।
ଗତ ମାର୍ଚ୍ଚ ୨୯ରେ ଓସା ପକ୍ଷରୁ ଏହି ତଥ୍ୟ ସମ୍ବଳିତ ଚିଠି ସମ୍ବନ୍ଧରେ ଖବରଦାତା ସମ୍ମିଳନୀ କରି ଗଣମାଧ୍ୟମକୁ ସୂଚନା ଦିଆଯାଇଥିଲା। ରାଜ୍ୟ ରାଜକୋଷରୁ ଖର୍ଚ୍ଚ କରାଯାଇ ପାଣ୍ଡିଆନଙ୍କ ସୁରକ୍ଷାରେ ନିୟୋଜିତ ହୋଇଥିବା ପୋଲିସ କର୍ମୀଙ୍କୁ ପ୍ରତ୍ୟାହାର କରିବାକୁ ଓସା ଦାବି କରିଥିଲା। ଏହା ପରେ ଏହି ପ୍ରସଙ୍ଗରେ ଭାଜପା ପକ୍ଷରୁ ମଧ୍ୟ ନିର୍ବାଚନ କମିଶନଙ୍କୁ ଭେଟି ଏନେଇ ଅଭିଯୋଗ କରାଯାଇଥିଲା। ତେବେ ଓସା ପକ୍ଷରୁ ଏହି ତଥ୍ୟ ଆର୍ଟିଆଇ ଆଇନ ବଳରେ ରିଜର୍ଭ ପୋଲିସ ଅଫିସରୁ ମିଳିଥିବା ନେଇ ଦାବି କରୁଥିବାବେଳେ କମିଶନରେଟ ପୋଲିସ ଏହାକୁ ମିଛ ଚିଠି କହି ଏତଲା ଦେବା ପରେ ଏବେ ଏହା ଏକ ଭିନ୍ନ ପ୍ରସଙ୍ଗ ହୋଇଛି। ପୋଲିସ ମାମଲା ରୁଜୁ କରି ତଦନ୍ତ କରୁଥିବାରୁ ଆର୍ଟିଆଇ କର୍ମୀଙ୍କ ପାଇଁ ଅଡୁଆ ସୃଷ୍ଟି ହୋଇଛି। ଏ ସମ୍ପର୍କରେ ସୂଚନା ଅଧିକାର କର୍ମୀ ପ୍ରଦୀପ ପ୍ରଧାନ କହିଛନ୍ତି, ଏହି ତଥ୍ୟ ସମ୍ବଳିତ ଚିଠି ଆମେ ତିଆରି କରିନାହୁଁ। ଏହି ଚିଠି ସରକାରୀ ଦସ୍ତାବିଜ୍ରୁ ଆମ ପାଖରୁ ଆସିଛି। ତେଣୁ ଏହି ଚିଠି କେଉଁଠି ପ୍ରସ୍ତୁତ ହୋଇଛି ତାହାର ଫୋରେନ୍ସିକ୍ ଯାଞ୍ଚ୍ ହେଉ ବୋଲି ସେ ଦାବି କରିଛନ୍ତି।