କଟକ ଅଫିସ,୧୩ା୬: କେତୋଟି ଓଡ଼ିଆ ଚଳଚ୍ଚିତ୍ରର ଲୋକପ୍ରିୟ ଗୀତରେ କଣ୍ଠଦାନ କରିଥିବା ବଲିଉଡ୍ ଗାୟକ ସୌରିନ୍ ଭଟ୍ଟଙ୍କ ନାଁରେ କଟକ ମହିଳା ଥାନାରେ ସୋମବାର ଅଭିଯୋଗ ହୋଇଛି। ସେ ବିବାହ ପ୍ରତିଶ୍ରୁତି ଦେଇ ଯୌନ ଶୋଷଣ, ପ୍ରତାରଣା କରିବା, ନିର୍ଯାତନା ଦେଇଥିବା ନେଇ ଜଣେ ଓଡ଼ିଆ ଗାୟିକା ଥାନାରେ ଏତଲା ଦେଇଛନ୍ତି। ଏ ନେଇ ପୋଲିସ ଦଫା ୩୭୬, ୪୯୩, ୩୪୧, ୨୯୪, ୪୧୭, ୫୦୬ରେ ଏକ ମାମଲା(ନଂ.୭୮/୨୩) ରୁଜୁ କରି ତଦନ୍ତ ଆରମ୍ଭ କରିଛି।
ମିଳିଥିବା ସୂଚନା ଅନୁସାରେ, ୨୦୧୫ରେ କଟକ କଲେଜ ଛକସ୍ଥିତ ଏକ ବ୍ୟାଙ୍କରେ ଯୁବତୀ ଜଣଙ୍କ ଚାକିରି କରିବାବେଳେ ସୌରିନଙ୍କ ସହ ବନ୍ଧୁତା ହୋଇଥିଲା। ସୌରିନ ଉକ୍ତ ବ୍ୟାଙ୍କକୁ ମଧ୍ୟ ଯିବାଆସିବା କରୁଥିଲେ। ପରବର୍ତ୍ତୀ ସମୟରେ ଅର୍ଥାତ୍ ୨୦୧୭ରେ ଯୁବତୀ ଜଣଙ୍କ ମୁମ୍ବାଇର ଏକ ବ୍ୟାଙ୍କରେ ଚାକିରି କରିଥିଲେ। ସେଠାରେ ସୌରିନଙ୍କ ସହ ଭଲ ବନ୍ଧୁତା ହୋଇଥିଲା। ଦୁହିଙ୍କ ମଧ୍ୟରେ ବନ୍ଧୁତା ବଢ଼ିବା ସହ ପ୍ରେମସମ୍ପର୍କ ଗଢ଼ି ଉଠିଥିଲା। ସୌରିନ୍ ଯୁବତୀଙ୍କ ସହ ଶାରୀରିକ ସମ୍ପର୍କ ରଖିଥିଲେ। ଫଳରେ ଯୁବତୀ ସୌରିନଙ୍କୁ ବିବାହ ପ୍ରସ୍ତାବ ଦେଇଥିଲେ। ହେଲେ ପରବର୍ତ୍ତୀ ସମୟରେ ସୌରିନ ବିବାହିତ ଓ ତାଙ୍କର ଏକ ପିଲା ଥିବା ସମ୍ପୃକ୍ତା ଯୁବତୀ ଜାଣିବାକୁ ପାଇଥିଲେ। ସେହିଦିନଠାରୁ ସେ ତାଙ୍କଠାରୁ ଦୂରେଇବାକୁ ଆରମ୍ଭ କରିଥିଲେ। ହେଲେ ସୌରିନ ଉଭୟଙ୍କ ମଧ୍ୟରେ ଥିବା ଅନ୍ତରଙ୍ଗ ମୁହୂର୍ତ୍ତର କିଛି ଫଟୋ, ଭିଡିଓ ନିଜ ପାଖରେ ରଖିଥିଲେ ଯାହାକୁ ନେଇ ସେ ଯୁବତୀଙ୍କୁ ବ୍ଲାକମେଲିଂ କରିବା ସହ ଜବରଦସ୍ତ ଶାରୀରିକ ସମ୍ପର୍କ ରଖିଥିଲେ। କେବଳ ଏହି ଯୁବତୀ ନୁହନ୍ତି, ଆଉ ଜଣେ ଯୁବତୀ ମଧ୍ୟ ସୌରିନଙ୍କ ଦ୍ୱାରା ପ୍ରତାରିତ ହୋଇଛନ୍ତି। ଏ ବାବଦରେ ଯୁବତୀ ଜଣଙ୍କ ଜାଣିବା ପରେ ତା’ର ପ୍ରମାଣ ମଧ୍ୟ ନିଜ ପାଖରେ ରଖିଛନ୍ତି। ତେବେ ସେ ସିଡିଏରେ ରହୁଥିବାବେଳେ ସୌରିନ ସେଠାକୁ ଆସି ଧମକାଇଥିଲେ। ଯୁବତୀଙ୍କ ମାଆଙ୍କୁ ମଧ୍ୟ ଧମକ ଦେଇ କହିଥିଲେ, ତୁମେ ଏ ବିଷୟରେ କାହାକୁ କହିଲେ ତୁମ ପରିବାରର ସମସ୍ତଙ୍କୁ ମାରିଦେବି। ଏହାପରେ ଲୋକଲଜ୍ଜାକୁ ଡରି ଯୁବତୀ କାହାକୁ କିଛି କହୁ ନ ଥିଲେ। ଫଳରେ ବାରମ୍ବାର ସୌରିନ ତାଙ୍କୁ ହଇରାଣ କରୁଥିଲେ। ଏପରି କି ବିଭିନ୍ନ ପର୍ଯ୍ୟାୟରେ ସୌରିନ୍ ୬ରୁ ୭ ଲକ୍ଷ ଟଙ୍କା ଯୁବତୀଙ୍କଠାରୁ ନେଇଛନ୍ତି। କିଛିଦିନ ତଳେ ଏନେଇ ଏକ ଫଇସଲା କରିବାକୁ ଯୁବତୀ ଚାହିଁଥିଲେ। ହେଲେ ସୌରିନ ଏଥିରେ ରାଜି ନ ହେବା ସହ କାରରୁ ଧକ୍କା ଦେଇ ତଳେ ପକାଇ ଦେଇଥିଲେ। ତେଣୁ ଜଗତପୁର ଥାନାରେ ଏତଲା ଦେବାକୁ ଯାଇଥିଲି। ହେଲେ ସେମାନେ ମହିଳା ଥାନାରେ ଅଭିଯୋଗ କରିବାକୁ କହିଥିଲେ। ପରେ ମହିଳା ଥାନାରେ ଅଭିଯୋଗ କରିଛି। ଏ ସମ୍ପର୍କରେ ଡିସିପି ପିନାକ ମିଶ୍ର କହିଛନ୍ତି, ଏତଲାରେ ଥିବା ଅଭିଯୋଗ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏଥିସହ ସୌରିନ୍ଙ୍କୁ ଜେରା ପାଇଁ ଥାନାକୁ ଡକାଯିବ।