ପାଟନା,୧୨।୧: ଜଣେ ମହିଳା ଆଇନଜୀବୀଙ୍କୁ ବନ୍ଧୁକ ମୁନରେ ଭୟଭୀତ କରାଇ ଗଣବଳାତ୍କାର କରିବା ଅଭିଯୋଗରେ ବିହାରର ବରିଷ୍ଠ ଆଇଏଏସ୍ ଅଫିସର ସଞ୍ଜୀବ ହଂସ ଏବଂ ପୂର୍ବତନ ଆର୍ଜେଡି ବିଧାୟକ ଗୁଲାବ ଯାଦବଙ୍କ ବିରୋଧରେ ମାମଲା ରୁଜୁ ହୋଇଛି। ଆଇନଜୀବୀ ବଳାତ୍କାର ସମ୍ପର୍କରେ ମୁହଁ ଖୋଲିଲେ ତାଙ୍କୁ ବ୍ଲାକ୍ମେଲ ଏବଂ ହତ୍ୟା କରାଯିବ ବୋଲି ସେମାନେ ଧମକ ଦେଇଥିଲେ। ଦାନାପୁର ସିଭିଲ କୋର୍ଟର ଅତିରିକ୍ତ ମୁଖ୍ୟ ବିଚାର ବିଭାଗୀୟ ମାଜିଷ୍ଟ୍ରେଟ୍ ନବୀନ କୁମାର ଶ୍ରୀବାସ୍ତବଙ୍କ ନିର୍ଦ୍ଦେଶକ୍ରମେ ମଙ୍ଗଳବାର ପାଟନାର ରୁପାସପୁର ଥାନାରେ ୧୯୯୭ ବ୍ୟାଚ୍ର ବିହାର କ୍ୟାଡର ଆଇଏଏସ୍ ଅଫିସର ଏବଂ ପୂର୍ବତନ ବିଧାୟକଙ୍କ ବିରୋଧରେ ମାମଲା ରୁଜୁ ହୋଇଛି।
ପାଟନା ମହିଳା ଥାନା ଅଭିଯୁକ୍ତଙ୍କ ବିରୋଧରେ ଏତଲା ଦାଏର ନ କରିବାରୁ ଆଇନଜୀବୀ ୨୦୨୧ ନଭେମ୍ବରରେ ଅଦାଲତଙ୍କ ଦ୍ୱାରସ୍ଥ ହୋଇଥିଲେ। ସଞ୍ଜୀବ ଏବେ ରାଜ୍ୟ ଶକ୍ତି ବିଭାଗ ପ୍ରମୁଖ ସଚିବ ଏବଂ ବିଏସ୍ପିଏଚ୍ସିଏଲ୍ର ସିଏମ୍ଡି ଅଛନ୍ତି। ଦଳ ବିରୋଧୀ କାର୍ଯ୍ୟ ଲାଗି ଗୁଲାବଙ୍କୁ ଗତବର୍ଷ ମାର୍ଚ୍ଚରେ ୬ ବର୍ଷ ପାଇଁ ଆର୍ଜେଡିରୁ ନିଲମ୍ବନ କରାଯାଇଥିଲା।
ଅଭିଯୋଗ ଅନୁଯାୟୀ ମହିଳା ଆଇନଜୀବୀ ରାଜ୍ୟ ମହିଳା କମିଶନ ସଦସ୍ୟ ହେବାକୁ ଚାହୁଁଥିବାରୁ ତତ୍କାଳୀନ ବିଧାୟକ ଗୁଲାବଙ୍କୁ ୨୦୧୬ରେ ଭେଟିଥିଲେ। ଗୁଲାବ ତାଙ୍କୁ ନିଜ ବାସଭବନକୁ ଡାକି ବନ୍ଧୁକ ଦେଖାଇ ବଳାତ୍କାର କରିଥିଲେ। ୨୦୧୭ରେ ବିଧାୟକ ପୀଡ଼ିତାଙ୍କୁ ପୁଣେରେ ସଞ୍ଜୀବଙ୍କ ସହ ପରିଚିତ କରାଇଥିଲେ। ସେଠାରେ ଗୁଲାବ ଓ ସଞ୍ଜୀବ ତାଙ୍କୁ ନିଶା ଦେଇ ଗଣବଳାତ୍କାର କରିବା ସହ ଭିଡିଓ ପ୍ରସ୍ତୁତ କରିଥିଲେ। ଉକ୍ତ ଭିଡିଓ ଦେଖାଇ ସେମାନେ ପୀଡ଼ିତାଙ୍କୁ ବ୍ଲାକ୍ମେଲ କରି ଅନେକ ଥର ବଳାତ୍କାର କରିଥିଲେ। ପ୍ରାଥମିକ ତଦନ୍ତରୁ ଅଭିଯୋଗ ସତ ପ୍ରମାଣିତ ହୋଇଥିବା ଏସ୍ଏସ୍ପି କହିଛନ୍ତି।
