କେନ୍ଦ୍ରାପଡ଼ା ଅଫିସ,୩୦ା୩: ଭାରତୀୟ ତୈଳ ନିଗମର ପାରାଦୀପ-ହଳଦିଆ ପାଇପ୍ ଲାଇନ ପାଇଁ କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ତନ୍ତିଆପାଳ ସାମୁଦ୍ରିକ ଥାନା ଅଧୀନ ଗଗୁଆସ୍ଥିତ କାର୍ଯ୍ୟାଳୟ ପରିସରରେ ୨୦୨୧ ଜାନୁୟାରୀ ୫ରେ କାର୍ଯ୍ୟରତ ଶ୍ରମିକଙ୍କ ମୃତ୍ୟୁ ହୋଇଥିଲା। ଧରିତ୍ରୀରେ ବିସ୍ତୁତ ଭାବେ ଏହି ଖବର ପ୍ରକାଶ ପାଇବା ପରେ ଶ୍ରମିକଙ୍କ ପରିବାରକୁ ୨୦ ଲକ୍ଷ ଟଙ୍କା କ୍ଷତିପୂରଣ ପାଇଁ କେନ୍ଦ୍ରାପଡ଼ା ବ୍ଲକ ଏଣ୍ଡର ଗ୍ରାମର ମାନବାଧିକାର କର୍ମୀ ସାଗର ଜେନା ଜାତୀୟ ମାନବାଧିକାର କମିଶନରେ ମାମଲା (ନଂ. ୮୭/୨୧) ରୁଜୁ କରିଥିଲେ। ଏସମ୍ପର୍କରେ ଗତ ୨୩ରେ ତର୍ଜମା କରାଯାଇ କମିଶନର ଆଇନ ବିଭାଗ ଡେପୁଟି ରେଜିଷ୍ଟର ଆସନ୍ତା ୪ ସପ୍ତାହ ମଧ୍ୟରେ ତନ୍ତିଆପାଳ ଥାନାର ଉକ୍ତ ମାମଲା (ନଂ- ୩/୨୧)ର ସବିଶେଷ ତଥ୍ୟ ଦେବାକୁ ଏସ୍ପିଙ୍କୁ ନିର୍ଦ୍ଦେଶ ଦେଇଛନ୍ତି। ଏ ସମ୍ପର୍କରେ ଅଭିଯୋଗକାରୀ ସାଗର କହିଛନ୍ତ, ତୈଳ ନିଗମ କାର୍ଯ୍ୟାଳୟ ପରିସରରେ ୬ ଜଣ ଶ୍ରମିକ ଗାତ ଖୋଳୁଥିଲେ। ଉପର ମୁଣ୍ଡରୁ ଅତଡା ଖସିବା ପରେ ସ୍ଥାନୀୟ ଗୁଳୁଦିଆ ଗ୍ରାମର ଖଗେନ ମଣ୍ଡଳ (୫୫)ଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ୫ ଜଣ ମୃତ୍ୟୁ ମୁଖରୁ ଅଳ୍ପକେ ବର୍ତ୍ତି ଯାଇଥିଲେ। ମୃତକ ଖଗେନଙ୍କ ପୁଅ ବିଷ୍ଣୁପଦ ଥାନାରେ ଅଭିଯୋଗ କରିଥିଲେ। ତେବେ କାମରେ ନିୟୋଜିତ ଶ୍ରମିକଙ୍କୁ ହେଲମେଟ, ସୁରକ୍ଷା ଜୋତା, ଜୀବନ ରକ୍ଷକ ଜ୍ୟାକେଟ ଆଦି ସାମଗ୍ରୀ ଯୋଗାଇ ଦିଆଯାଇ ନ ଥିଲା। ଯାହା କାର୍ଯ୍ୟରତ ଶ୍ରମିକଙ୍କ ପାଇଁ ଘାତକ ସାବ୍ୟସ୍ତ ହେବା ସହ ଜଣେ ଶ୍ରମିକଙ୍କ ମୃତ୍ୟୁ ଘଟିଥିଲା। ପରିବାର ବର୍ଗଙ୍କୁ ଅନୂନ୍ୟ ୨୦ ଲକ୍ଷ ଟଙ୍କା କ୍ଷତିପୂରଣ ପାଇଁ ଏହି ମାମଲା ହୋଇଥିଲା। କମ୍ପାନୀ ପକ୍ଷରୁ ମାତ୍ର ୨ ଲକ୍ଷ ଟଙ୍କା କ୍ଷତିପୂରଣ ବାବଦରେ ଦିଆଯାଇଛି। ତେବେ ମାମଲାର ଗୁରୁତ୍ୱ ଦୃଷ୍ଟିରୁ ଦାବି ଅର୍ଥ ଦେବାକୁ ଆବେଦନ କରାଯାଇଛି। ଏନେଇ ଆସନ୍ତା ଏପ୍ରିଲ ୩୦ରେ ଶୁଣାଣି ହେବ ବୋଲି ସେ ପ୍ରକାଶ କରିଛନ୍ତି।