କେନ୍ଦୁଝର, ୨୧ା୩(ସ୍ବ.ପ୍ର.):କେନ୍ଦୁଝର ଜିଲା ଚମ୍ପୁଆ ରେଞ୍ଜ ଅଧୀନ ବାମେବାରି ସେକ୍ସନ ନୟାଗଡ଼ ବିଟ୍ ଜଡ଼ିପଦା ସାହିରେ ବିଦ୍ୟୁତ୍ ସଂସ୍ପର୍ଶରେ ଆସି ଦନ୍ତାହାତୀ ମୃତ୍ୟୁ ଘଟଣାରେ ସୋମବାର ଡିଏଫ୍ଓ ଧନରାଜ ଏଚ.ଡି. କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ଟାଟା ପାଓ୍ବାର କନିଷ୍ଠଯନ୍ତ୍ରୀ ଇଂ. ଗୌରଗୋପାଳ ମହାନ୍ତି, ଲାଇନ୍ମ୍ୟାନ ବିଜୟ ମଲ୍ଲିକ ଓ ଦିବ୍ୟଜ୍ୟୋତି ବାରିକଙ୍କ ବିରୋଧରେ ବନ୍ୟଜନ୍ତୁ ସୁରକ୍ଷା ଆଇନ ଅନୁଯାୟୀ (ଓଆର କେସ୍ ନଂ. ୬୭/୨୦୨୨-୨୩ ରେ) ମାମଲା ରୁଜୁ ହୋଇଛି। ଏହାସହ ବାମେବାରୀ ଫରେଷ୍ଟର ରତ୍ନାକର ମହାନ୍ତ, ଚମ୍ପୁଆ ରେଞ୍ଜ ଅଧିକାରୀ ଅକ୍ଷୟ ଛତ୍ରିଆ ଓ ଯୋଡ଼ା ଟାଟା ପାୱାର ନିର୍ବାହୀଯନ୍ତ୍ରୀ ମନୋରଞ୍ଜନ ଜେନାଙ୍କୁ କାରଣ ଦର୍ଶାଅ ନୋଟିସ୍ କରାଯାଇଛି।
ସୂଚନା ଅନୁଯାୟୀ, ବସନ୍ତପୁର ଗ୍ରାମ ଜଡ଼ିପଦା ସାହିକୁ ଯାଇଥିବା ବିଦ୍ୟୁତ୍ ଲାଇନର ଇନସ୍ୟୁଲେଟର (ଶଙ୍ଖ) ଫାଟିଯାଇଥିଲା। ଫଳରେ ୧୧ କେଭି ଲାଇନ୍ ଖୁଣ୍ଟର ଷ୍ଟେ ସଂସ୍ପର୍ଶରେ ଆସି ଚାର୍ଚ୍ଚ ହୋଇଯାଇଥିଲା। ହାତୀଟି ଶନିବାର ରାତିରେ ଉକ୍ତ ଖୁଣ୍ଟ ଦେଇ ଯାଉଥିବା ବେଳେ ଗୋଡ଼ ବାଜିଯାଇଥିଲା। ଘଟଣାସ୍ଥଳରେ ହାତୀର ମୃତ୍ୟୁ ଘଟିଥିଲା। ସେଠାରେ ଅନ୍ୟ ୩ ହାତୀ ବୁଲୁଥିବା ବେଳେ ବର୍ତ୍ତି ଯାଇଥିଲେ। ରବିବାର ସକାଳେ ଗ୍ରାମବାସୀ ଦେଖି ବନ ଓ ବିଦ୍ୟୁତ୍ ବିଭାଗକୁ ସୂଚନା ଦେଇଥିଲେ। ଆଞ୍ଚଳିକ ମୁଖ୍ୟ ବନ ସଂରକ୍ଷକ (ଆର୍ସିସିଏଫ୍) ରାଉରକେଲା ଅରୁଣ ମିଶ୍ର, ଡିଏଫ୍ଓ କେନ୍ଦୁଝର ଏଚ୍.ଡି. ଧନରାଜ, ଚମ୍ପୁଆ ରେଞ୍ଜ ଅଧିକାରୀ ଅକ୍ଷୟ ଛତ୍ରିୟାଙ୍କ ସମେତ ବନ ବିଭାଗ କର୍ମଚାରୀ ଘଟଣାସ୍ଥଳକୁ ଯାଇ ଅନୁଧ୍ୟାନ କରିଥିଲେ। ସେହିପରି ଟାଟା ପାଓ୍ବାର ଅଧୀକ୍ଷଣ ଯନ୍ତ୍ରୀ ନାରାୟଣ ଦାସ, ଏସ୍ଡିଓ ଯୋଡ଼ା ଦିବ୍ୟରଞ୍ଜନ ସାହୁଙ୍କ ସମେତ ବିଦ୍ୟୁତ୍ ବିଭାଗର ବରିଷ୍ଠ ଅଧିକାରୀମାନେ ଘଟଣାସ୍ଥଳକୁ ଯାଇ ଅନୁଧ୍ୟାନ କରି ଫେରିଥିଲେ। ପରେ ହାତୀର ଦାନ୍ତ ଜବତ କରି ବନ ବିଭାଗ ମୃତଦେହ ବ୍ୟବଚ୍ଛେଦ ପରେ ପୋତି ଦେଇଥିଲା।