ଢେଙ୍କାନାଳ ଅଫିସ,୧୪ା୩: ଢେଙ୍କାନାଳ ସହରସ୍ଥିତ ଏକ ବ୍ୟାଙ୍କରେ ଥିବା ଟାଉନ ପ୍ଲାନିଂ ଅଞ୍ଚଳର ଶୁକଦେବ ନାୟକଙ୍କ ଫିକ୍ସଡ୍ ଡିପୋଜିଟ୍କୁ ଚଞ୍ଚକତା କରି ଭାଙ୍ଗି ୩୭ ଲକ୍ଷ ଟଙ୍କା ଉଠାଇ ନିଆଯାଇଥିବା ଘଟଣାରେ କଟକ ଜିଲା ଆଠଗଡ ଥାନା ଅଞ୍ଚଳର ମନୋଜ କୁମାର ସାହୁ ଓ ତାଙ୍କ ସ୍ତ୍ରୀଙ୍କ ନାମରେ ଢେଙ୍କାନାଳ ଟାଉନ ଥାନାରେ ଏକ ମାମଲା ରୁଜୁ ହୋଇଛି। ପୋଲିସ ତଦନ୍ତ କରି ଅଭିଯୁକ୍ତ ମନୋଜଙ୍କୁ ସୋମବାର ଗିରଫ କରି କୋର୍ଟଚାଲାଣ କରିଛି। ତାଙ୍କ ସ୍ତ୍ରୀ ଅସୁସ୍ଥ ଥିବାରୁ ତାଙ୍କୁ ଗିରଫ କରାଯାଇ ନ ଥିବା ଜଣାପଡିଛି।
ପୋଲିସ କହିଛି, ମନୋଜଙ୍କ ସ୍ତ୍ରୀ ପୂର୍ବରୁ ଢେଙ୍କାନାଳର ଉକ୍ତ ବ୍ୟାଙ୍କ ଶାଖାରେ ସହକାରୀ ମ୍ୟାନେଜର ଭାବେ କାର୍ଯ୍ୟ କରୁଥିଲେ। ବର୍ତ୍ତମାନ ସେ ଆଉ ଉକ୍ତ ପଦବୀରେ ନାହାନ୍ତି। ସେହି ବ୍ୟାଙ୍କରେ ଶୁକଦେବ ନାୟକଙ୍କ ୩୭ ଲକ୍ଷ ଟଙ୍କା ଫିକ୍ସଡ୍ ଡିପୋଜିଟ୍ ରହିଥିଲା। ଏହି ଫିକ୍ସଡ୍ ଡିପୋଜିଟକୁ ଭାଙ୍ଗି ମନୋଜ ଓ ତାଙ୍କ ସ୍ତ୍ରୀ ୩୭ ଲକ୍ଷ ଟଙ୍କା ନେଇଯାଇଥିଲେ। ଏଥିସହିତ ଅନ୍ଲାଇନରେ ମଧ୍ୟ ଠକେଇ କରି ୩୦ ଲକ୍ଷ ଟଙ୍କା ଋଣ ନେଇଥିଲେ। ଏହି ଋଣ ବାବଦକୁ ୨୬ଲକ୍ଷ ଟଙ୍କା ଶୁଝିବା ପରେ ୨ମାସ ହେଲା ଉଭୟଙ୍କ ପତ୍ତା ମିଳୁ ନ ଥିଲା। ଏ ସଂକ୍ରାନ୍ତରେ ଟାଉନ ଥାନାରେ ନଂ. ୧୩୮ା୨୩ରେ ମାମଲା ରୁଜୁ କରାଯାଇଛି।
