ଅହମଦାବାଦ,୨୯।୧୧ : ମସଜିଦରେ ଲାଉଡ ସ୍ପିକର ଉପରେ ପ୍ରତିବନ୍ଧକ ଲଗାଇବାକୁ କରାଯାଇଥିବାଆବେଦନକୁ ଗୁଜରାଟ ହାଇକୋର୍ଟ ଖାରଜ କରିଛନ୍ତି। ମସଜିଦରୁ ଆଜାନ ପାଇଁ ଲାଉଡ ସ୍ପିକର ବ୍ୟବହାର ଉପରେ ପ୍ରତିବନ୍ଧକ ଲଗାଇବାକୁ କୋର୍ଟରେ ଏକ ଜନସ୍ବାର୍ଥ ମାମଲା(ପିଆଇଏଲ) ଦାଖଲ କରାଯାଇଥିଲା। କୋର୍ଟ ଏହି ଆବେଦନକୁ ସମ୍ପୂର୍ଣ୍ଣ ଭୁଲ ବୋଲି ଘୋଷଣା କରିଛନ୍ତି। ମନ୍ଦିରରେ ଆରତି ସମୟରେ କୌଣସି ଶବ୍ଦ ହେଉ ନାହିଁ ବୋଲି ଆବେଦନକାରୀ ଦାବି କରିପାରିବେ କି ବୋଲି କୋର୍ଟ ପ୍ରଶ୍ନ କରିଛନ୍ତି। ଏକ ଭୁଲ ଧାରଣା ସହିତ ଏହା ଦାଖଲ ହୋଇଥିବା ଆବେଦନ ବୋଲି କୋର୍ଟ କହିଛନ୍ତି।
ମନ୍ଦିରରେ ଘଣ୍ଟି ଧ୍ୱନି ଉପରେ ମଧ୍ୟ କୋର୍ଟ ପ୍ରଶ୍ନ ଉଠାଇଥିଲେ । ଆରତି ସମୟରେ ଭୋର ୩ ଟାରେ ମନ୍ଦିରରେ ବାଦ୍ୟଯନ୍ତ୍ର ବଜାଯାଇଥାଏ।ନ୍ତଏହି ସମୟରେ ଶୋଇଥିବା ଲୋକଙ୍କ ପାଇଁ ଏହା ଅସୁବିଧା ସୃଷ୍ଟି କରେ ନାହିଁ କି? ମୁଖ୍ୟ ବିଚାରପତି ସୁନୀତା ଅଗ୍ରୱାଲ ଏବଂ ଜଷ୍ଟିସ ଅନିରୁଦ୍ଧ ପି ମାୟୀଙ୍କ ଏକ ଡିଭିଜନ ବେଞ୍ଚ ଏହି ଆବେଦନ ଉପରେ ଶୁଣାଣି କରିଥିଲେ। ଏହା ସହିତ କୋର୍ଟ ଏଭଳି ପିଆଇଏଲଉପରେ ବିଚାର କରିବାକୁ ମନା କରିଦେଇଛନ୍ତି। କୋର୍ଟ କହିଛନ୍ତି ଏହା ଆଜାନ ଏକ ପରମ୍ପରା ବର୍ଷ ବର୍ଷ ଧରି ଚାଲି ଆସିଛି ଏବଂ କେବଳ ୫-୧୦ ମିନିଟ ପର୍ଯ୍ୟନ୍ତ ଏହା ହୋଇଥାଏ।
ଏହି ଆବେଦନ ବଜରଙ୍ଗ ଦଳର ନେତା ଶକ୍ତି ସିଂ ଜାଲାଙ୍କ ଦ୍ୱାରା ଦାଖଲ କରାଯାଇଥିଲା। କୁହାଯାଇଥିଲା ଆଜାନରେ ଲାଉଡ ସ୍ପିକର ବ୍ୟବହାର ଶବ୍ଦ ପ୍ରଦୂଷଣର କାରଣ ହୋଇଥାଏ, ଯାହା ଲୋକଙ୍କ ସ୍ବାସ୍ଥ୍ୟ ଉପରେ ପ୍ରତିକୂଳ ପ୍ରଭାବ ପକାଇଥାଏ ଏବଂ ସମସ୍ୟା ସୃଷ୍ଟି କରିଥାଏ। ବିଶେଷକରି ପିଲାମାନଙ୍କର ସ୍ବାସ୍ଥ୍ୟ ପ୍ରଭାବିତ ହୋଇଥାଏ।ଏହି ଦାବି ପଛରେ କୌଣସି ବୈଜ୍ଞାନିକ ଆଧାର ନାହିଁ ବୋଲି କୋର୍ଟ କହିଛନ୍ତି।
ମସଜିଦଗୁଡିକରେ ଆଜାନ ସମୟରେ ଲାଉଡ ସ୍ପିକର ବ୍ୟବହାର କରାଯାଇପାରିବ। ମନ୍ଦିରଗୁଡ଼ିକରେ ଲାଉଡ ସ୍ପିକରରେ ଆରତି ମଧ୍ୟ କରାଯାଏ। କୋର୍ଟ କହିଛନ୍ତି ଯଦି ଆଜାନ ଶବ୍ଦ ପ୍ରଦୂଷଣର କାରଣ ହୁଏ ତେବେ ଆରତି ସମୟରେ ବାଦ୍ୟଯନ୍ତ୍ର କାହିଁକି ବ୍ୟବହୃତ କରାଯାଉଛି? ଆଜାନ କେବଳ ୧୦ ମିନିଟ ପର୍ଯ୍ୟନ୍ତ ରହିଥାଏ, ଏହା ଦ୍ୱାରା ଶବ୍ଦ ପ୍ରଦୂଷଣ କିପରି ହେବ?