ଗୁଣପୁର,୨ା୧୨(ଡି.ଏନ୍.ଏ.):ଗୁଣପୁର ବ୍ଲକ କାର୍ଯ୍ୟାଳୟରୁ କେସ୍ ରେକର୍ଡ ନିଖୋଜ ଥିବା ନେଇ ବିଡିଓ ଆଦର୍ଶ ଥାନାରେ ଏତଲା ଦେଇଛନ୍ତି। ବିଡିଓଙ୍କ ଅଭିଯୋଗ କ୍ରମେ ପୋଲିସ ଏକ ମାମଲା ରୁଜୁ କରିଥିବା ଜଣାପଡ଼ିଛି। ବୁଧବାର ଉକ୍ତ ଘଟଣାରେ ଅଧ୍ୟକ୍ଷାଙ୍କ କାର୍ଯ୍ୟାଳୟକୁ ମାଜିଷ୍ଟ୍ରେଟ ଭାବେ ଗୁଣପୁର ତହସିଲଦାରଙ୍କ ଉପସ୍ଥିତିରେ ତଲାସି କରାଯାଇଥିଲା। ହେଲେ ସେଠାରୁ କୌଣସି କେସ୍ ରେକର୍ଡ ମିଳି ନ ଥିଲା। ଏହାପରେ ବିଡିଓ ଶାନ୍ତିପ୍ରଭା ପ୍ରଧାନ ବ୍ଲକ ଅଫିସରୁ କେସ୍ ରେକର୍ଡ ନିଖୋଜ ଥିବା ନେଇ ଥାନରେ ଅଭିଯୋଗ କରିଛନ୍ତି।
ସୂଚନାଯୋଗ୍ୟ, ଗତ ୨ ମାସ ହେଲା ୮ଟି କେସ୍ ରେକର୍ଡ କାଉଣ୍ଟର ସିଗ୍ନେଚର ପାଇଁ ଅଧ୍ୟକ୍ଷାଙ୍କ ନିକଟକୁ ଯାଇଥିଲା। ହେଲେ ସେହି ଫାଇଲ ଗୁଡ଼ିକ ସେ ଫେରାଇ ନ ଥିଲେ। ଫାଇଲ ଫେରାଇବାକୁ ତାଙ୍କୁ ଅନେକ ଥର କୁହାଯାଇଥିଲେ ମଧ୍ୟ ସେ ଫେରାଇ ନ ଥିଲେ। ଶେଷରେ ବିଡିଓ ଉପଜିଲାପାଳଙ୍କୁ ଘଟଣା ବିଷୟରେ ଅବଗତ କରିଥିଲେ। ଉପଜିଲାପାଳ ଗୁଣପୁର ତହସିଲଦାର ଏବଂ ପୋଲିସକୁ ନିର୍ଦ୍ଦେଶ ଦେଇ ଇନ୍ଭେନଟରି ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଥିଲେ। ଉପ ଜିଲାପାଳଙ୍କ ନିର୍ଦ୍ଦେଶ କ୍ରମେ ମାଜିଷ୍ଟ୍ରେଟ ଭାବେ ତହସିଲଦାର ଶରତ ଚନ୍ଦ୍ର ନାୟକ ଏବଂ ପୋଲିସ ଟିମ୍ ବ୍ଲକ ଅଫିସରେ ପହଞ୍ଚି ଅଧ୍ୟକ୍ଷାଙ୍କ କାର୍ଯ୍ୟାଳୟରେ ତଲାସି କରିଥିଲେ। ହେଲେ କୌଣସି ନଥିପତ୍ର ତଥା କେସ୍ ରେକର୍ଡ ମିଳି ନ ଥିଲା। ଖାଲିହାତରେ ତହସିଲଦାର ସେଠାରୁ ଫେରିଥିଲେ। ତେବେ ଅଧ୍ୟକ୍ଷାଙ୍କ କାର୍ଯ୍ୟାଳୟରୁ କେସ୍ ରେକର୍ଡ ନ ମିଳିବା ଘଟଣାକୁ ନେଇ ଏବେ ଲୋକଙ୍କ ମନରେ ପ୍ରଶ୍ନବାଚୀ ସୃଷ୍ଟି ହୋଇଛି। ବିଡିଓ ଅଧ୍ୟକ୍ଷାଙ୍କୁ କେସ୍ ରେକର୍ଡ ପ୍ରଦାନ କରିଥିବା କହୁଥିବାବେଳେ ଅଧ୍ୟକ୍ଷାଙ୍କ କାର୍ଯ୍ୟାଳୟରୁ କେସ୍ ରେକର୍ଡ ତଲାସି ସମୟରେ ବାହାରି ନ ଥିଲା। ତେଣୁ ଏହାକୁ ନେଇ ନାନା ସନ୍ଦେହ ପ୍ରକାଶ ପାଇଛି। ବ୍ଲକ ଅଫିସରୁ ଫାଇଲ କୁଆଡ଼େ ଗଲା ଏବଂ କାହା ପାଖରେ ଅଛି ତାହାର ତଦନ୍ତ କରିବା ପୋଲିସ ପାଇଁ ବଡ଼ ଚ୍ୟାଲେଞ୍ଜ ହୋଇଛି। ଅନ୍ୟପକ୍ଷରେ ବିଡିଓ ଏବଂ ଅଧ୍ୟକ୍ଷାଙ୍କ ମଧ୍ୟରେ ବିବାଦୀୟ ପରିସ୍ଥିତି ସହର ଠାରୁ ଗ୍ରାମାଞ୍ଚଳ ପର୍ଯ୍ୟନ୍ତ ଅଶାନ୍ତ ପରିବେଶ ସୃଷ୍ଟି କରିଛି। ମାମଲା ପ୍ରସମିତ ହେବା ବଦଳରେ ଦିନକୁ ଦିନ ଜଟିଳ ହେଉଛି। ଏହାର ପରିଣାଣ କ’ଣ ହେବ ତାହାକୁ ନେଇ ବୁଦ୍ଧିଜୀବୀ ଚିନ୍ତା ପ୍ରକଟ କରିଛନ୍ତି। କୌଣସି ଗୋଷ୍ଠୀ ପକ୍ଷରୁ ସାମାଧାନର ଉଦ୍ୟମ କରାଯାଉ ନାହିଁ। ଫଳରେ ମାମଲା ଦିନକୁ ଦିନ ବିବାଦୀୟ ହୋଇପଡ଼ୁଥିବା ମତପ୍ରକାଶ ପାଇଛି।
