ଝାରସୁଗୁଡା ଅଫିସ,୧୦।୫: ଝାରସୁଗୁଡା ଜିଲା ମୁଖ୍ୟ ଚିକିତ୍ସାଳୟରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଜଣେ ଡାକ୍ତର ପ୍ରସୂତି ମହିଳାମାନଙ୍କୁ ଚିକିତ୍ସା କରିବା ବେଳେ ଅମାନୁଷିକ ଭାବେ ଗାଳିଗୁଲଜ କରିବା ସହିତ ମାଡ଼ ମାରିଥିବା ଅଭିଯୋଗ ହୋଇଛି। ଏହି ଘଟଣାକୁ ବିଭିନ୍ନ ମହଲରେ ନିନ୍ଦା କରାଯିବା ସହ ଏହାର ତଦନ୍ତ କରାଯାଇ ସମ୍ପୃକ୍ତ ଡାକ୍ତରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଦାବି କରାଯାଇଛି। ଏଭଳି ଅଭାବନୀୟ ଘଟଣା ଘଟିଛି ଖୋଦ ସ୍ବାସ୍ଥ୍ୟମନ୍ତ୍ରୀଙ୍କ ଜିଲାରେ। ଏନେଇ ପୀଡିତା ପ୍ରସୂତି ମହିଳାଙ୍କ ସ୍ବାମୀ ବ୍ରଜରାଜନଗର ଗଙ୍ଗାନଗର ନିବାସୀ ବିଶାଳ ସିଂହ ସମ୍ପୃକ୍ତ ଡାକ୍ତର ସଚ୍ଚିଦାନନ୍ଦ ଦନ୍ତାଙ୍କ ନାମରେ ଲିଖିତ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତିକରି ଝାରସୁଗୁଡା ଟାଉନ ଥାନା ପୋଲିସ କେଶ ନଂ୨୪୭/୨୨ରେ ଏକ ମାମଲା ରୁଜୁକରି ତଦନ୍ତ ଚଳାଇଛି। ଅନ୍ୟପଟେ ଆଉ ଜଣେ ପ୍ରସୂତି ମହିଳାଙ୍କ ବାପା ଝାରସୁଗୁଡାର ମୋଭିନ ଖାନ ମଧ୍ୟ ଏହି ଘଟଣାକୁ ନେଇ ଥାନାରେ ଅଭିଯୋଗ କରିଛନ୍ତି। ତେବେ ସମସ୍ତ ଅଭିଯୋଗକୁ ଭିତ୍ତିକରି ହସ୍ପିଟାଲର ସିଡିଏମ୍ଓ ଡା.ଡୋଲାମଣି ପଟେଲଙ୍କ ନିର୍ଦ୍ଦେଶକ୍ରମେ ଏକ ୩ ଜଣିଆ କମିଟି ଗଠନ କରାଯାଇ ଏହାର ବିଭାଗୀୟ ତଦନ୍ତ ଆରମ୍ଭ ହୋଇଛି। ସୂଚନାଯୋଗ୍ୟ, କେତେକ ମହିଳାମାନେ ଜିଲା ମୁଖ୍ୟ ଚିକିତ୍ସାଳୟକୁ ପ୍ରସୂତି ପାଇଁ ଆସିଥିବା ବେଳେ ସେଠାରେ ଉପସ୍ଥିତ ଥିବା ଆନେଥେସିଆ ଡା.ଦନ୍ତା ସେମାନଙ୍କୁ ଦୁର୍ବବ୍ୟହାର କରିଥିଲେ। ଚିକିତ୍ସା ସମୟରେ ସେମାନଙ୍କୁ ଗାଳିଗୁଲଜ ସହିତ ମୁଣ୍ଡର କେଶକୁ ଟଣାଓଟରା କରିଥିଲେ। ଏଥିସହ ମାଡ଼ ମାରିବା ସହ ଧମକ ଦେଇଥିଲେ।