ଭୁବନେଶ୍ୱର,୮।୧୨: ଶନିବାର ଭୁବନେଶ୍ୱରରେ ଏକ ବିଳାସପୂର୍ଣ୍ଣ ଗାଡିରୁ ନଗଦ ଟଙ୍କା ଜବତ ଘଟଣାରେ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ରବିବାର ତିନି ଜଣଙ୍କୁ ଗିରଫ କରିଛି। ସିବିଆଇ ଅଧିକାରୀମାନେ ବିଳାସପୂର୍ଣ୍ଣ (ମର୍ସିଡିଜ୍) ଓଡି-୦୫-ବିଭି-୯୯୯୯ ଗାଡିରୁ ପ୍ରାୟ ୧୦ ଲକ୍ଷ ଟଙ୍କା ଜବତ କରିଥିଲେ। ଟଙ୍କା ଜବତ ପରେ ପଚରାଉଚରା ପାଇଁ ସିବିଆଇ ଟିମ୍ କାରରେ ଥିବା ଲୋକଙ୍କୁ ଅଟକ ରଖିଥିଲା।
ତେବେ ଏହି ନଗଦ ଟଙ୍କା ଜବତ ମାମଲାରେ ସିବିଆଇ ରବିବାର ସ୍ପେସିଆଲ କ୍ଳାସ କଣ୍ଟ୍ରାକ୍ଟର ଦେବଦତ୍ତ ମହାପାତ୍ର, କଣ୍ଟ୍ରାକ୍ଟର ସାନ୍ତୋଶ ମହାରାଣା ଏବଂ ବ୍ରିଜ ଏବଂ ରୂଫ୍ କମ୍ପାନୀ (ଇଣ୍ଡିଆ) ଲିମିଟେଡର ଗ୍ରୁପ ଜେନେରାଲ ମ୍ୟାନେଜର ଚଞ୍ଚଲ ମୁଖାର୍ଜୀଙ୍କୁ ଗିରଫ କରିଛି। ସୂଚାନୁସାରେ ଏହି ତିନିଜଣ ଟେଣ୍ଡର ଫିକ୍ସିଂ ଏବଂ ଅନିୟମିତତାରେ ସମ୍ପୃକ୍ତ ଥିଲେ।
ସିବିଆଇ ଅନୁଯାୟୀ ମୁଖାର୍ଜୀ ମହାପାତ୍ରଙ୍କଠାରୁ ଲାଞ୍ଚ ହିସାବରେ ୧୦ ଲକ୍ଷ ଟଙ୍କା ମାଗିଥିଲେ। ଲାଞ୍ଚ ଟଙ୍କା ଗ୍ରହଣ କରୁଥିବାବେଳେ ମୁଖାର୍ଜୀଙ୍କୁ ରେଡ୍ ହ୍ୟାଣ୍ଡେଡ ଧରିବା ପାଇଁ କେନ୍ଦ୍ରୀୟ ଏଜେନ୍ସି ଏକ ଜାଲ ବିଛାଇଥିଲା।
ଶନିବାର ସନ୍ଧ୍ୟାରେ ମହାପାତ୍ର ଏବଂ ମହାରଣା ମୁଖାର୍ଜୀଙ୍କୁ ଲାଞ୍ଚ ଦେବା ପାଇଁ ନଗଦ ଟଙ୍କା ଆଣିଥିଲେ। ସିବିଆଇ ଏକ ବିବୃତ୍ତିରେ କହିଛି ଯେ ଅଭିଯୁକ୍ତଙ୍କଠାରୁ ସମ୍ପୂର୍ଣ୍ଣ ଲାଞ୍ଚ ଟଙ୍କା ଉଦ୍ଧାର କରାଯାଇଛି।
ପରେ ଏହି ତିନି ଅଭିଯୁକ୍ତଙ୍କୁ ଏଠାରେ ଏକ ସ୍ୱତନ୍ତ୍ର ସିବିଆଇ କୋର୍ଟରେ ହାଜର କରାଯାଇଥିଲା। ଅଭିଯୁକ୍ତଙ୍କୁ ତିନି ଦିନ ପାଇଁ ରିମାଣ୍ଡରେ ନେବାକୁ କୋର୍ଟ ଅନୁମତି ଦେଇଛନ୍ତି।
ସମ୍ପୃକ୍ତ ଘଟଣାରେ, କେନ୍ଦ୍ରୀୟ ପିଏସୟୁ ବ୍ରିଜ୍ ଏବଂ ରୁଫ୍ କମ୍ପାନୀ (ଇଣ୍ଡିଆ) ଲିମିଟେଡ୍ ରେ ଟେଣ୍ଡର ଫିକ୍ସିଂ ଏବଂ ଅନ୍ୟାନ୍ୟ ଅନିୟମିତତା ସଂପର୍କରେ ଦିଲ୍ଲୀ, କୋଲକାତା ଏବଂ ଭୁବନେଶ୍ୱର ସମେତ ଦେଶର ୧୧ ଟି ସ୍ଥାନରେ ସିବିଆଇ ଏକକାଳୀନ ଚଢ଼ାଉ କରିଥିଲା।
ସୂଚାନଯୋଗ୍ୟ ସିବିଆଇ ମହାପାତ୍ରଙ୍କ ବାସଭବନରେ ଚଢ଼ାଉ କରି ନଗଦ ଟଙ୍କା, ସୁନା ଏବଂ କିଛି ଅପରାଧୀ ଦସ୍ତାବିଜ ଜବତ କରିଛି।