ସମ୍ବଲପୁର,୧୯।୫(ଭବାନୀ ଶଙ୍କର ଭୋଇ)ଶିକ୍ଷା କ୍ଷେତ୍ରରେ ମିଳୁଥିବା ବିଭିନ୍ନ ସରକାରୀ ସୁବିଧା ପାଇବା ପାଇଁ ଅନୁସୂଚିତ ଜାତି ଏବଂ ଜନଜାତ ଛାତ୍ରୀଛାତ୍ରଙ୍କ ପାଇଁ ଜାତି ପ୍ରମାଣ ପତ୍ରର ଆବଶ୍ୟକତା ପଡିଥାଏ। ଯାହାକୁ ନିର୍ଦ୍ଧାରିତ ପ୍ରକ୍ରିୟାରେ ଆବେଦନ କରିବା ପରେ ସ୍ଥାନୀୟ ତହସିଲଦାର ପ୍ରଦାନ କରିଥାନ୍ତି। ହେଲେ ସମ୍ବଲପୁର ତହସିଲ ଅଫିସରେ ଅନୁସୂଚିତ ଜାତି ଏବଂ ଜନଜାତି ଛାତ୍ରୀଛାତ୍ରମାନେ ଜାତି ପ୍ରମାଣପତ୍ର ପାଇବାକୁ ନାକେଦମ ହେଉଛନ୍ତି। ଜମିପଟ୍ଟା ନ ଥିବା ପରିବାରର ପିଲାମାନେ ଜାତି ପ୍ରମାଣପତ୍ର ପାଇବାରୁ ବଞ୍ଚିତ ହେଉଛନ୍ତି। ଏଭଳି ଅନେକ ଅଭିଯୋଗ ସମାନାକୁ ଆସୁଛି।
ସମ୍ବଲପୁର ମହାନଗର ନିଗମ ଅଞ୍ଚଳରେ ୧୭୦ରୁ ଅଧିକ ବସ୍ତି ରହଛି। ସେଥି ମଧ୍ୟରୁ ଅଧିକାଂଶ ସରକାରୀ ଜମିରେ ରହିଛି। ସେଠାରେ ଲକ୍ଷାଧିକ ଲୋକ ବସବାସ କରୁଥିବା ବେଳେ ଅଧିକାଂଶ ଜନଜାତି ଏବଂ ଅନୁସୂଚିତ ଜାତିର। ତେବେ ସେମାନେ ସମ୍ବଲପୁର ତହସିଲଦାରଙ୍କଠାରେ ନିଜ ଝିଅପୁଅଙ୍କ ଶିକ୍ଷା ପାଇଁ ଜାତି ପ୍ରମାଣପତ୍ର ଆବେଦନ କରିବା ସମୟରେ ସ୍ଥାନୀୟ ବାସିନ୍ଦା ଏବଂ ଆଙ୍ଗନବାଡି କର୍ମୀଙ୍କ ଦସ୍ତଖତ ଏବଂ ସତ୍ୟପାଠ ଦାଖଲ କରି ଆବେଦନ କରୁଥିଲେ। ତେବେ ତାହା ଗ୍ରହଣୀୟ ହେଉ ନ ଥିବା ଅଭିଯୋଗ ହୋଇଛି। ଏପରିକି ଜନସେବା କେନ୍ଦ୍ରଗୁଡିକ ମଧ୍ୟ ଆବେଦନ ସମୟରେ ଜମିପଟ୍ଟା ନଦେଲେ ଜାତି ପ୍ରମାଣପତ୍ର ମିଳିବ ନାହିଁ ବୋଲି କହି ଆବେଦନକାରୀଙ୍କୁ ଫେରାଇ ଦେଉଛନ୍ତି। ନିଜେ ସିଧାସଳଖ ଅନ୍ଲାଇନ ଆବେଦନ କରିବାରେ ଅସମର୍ଥ ଗରିବ ପରିବାରଗୁଡିକ ଆଇନଜୀବୀଙ୍କ ସହଯୋଗ ନେଇ ପଞ୍ଚନାମା ସହ କରିଥିବା ଆବେଦନ ଗ୍ରହଣୀୟ ନହେବା ଯୋଗୁଁ ଆହୁରି ଅଧିକ ଖର୍ଚ୍ଚାନ୍ତ ହେଉଛନ୍ତି। କିଛିଦିନ ପୂର୍ବରୁ ଚାରଭାଟି ଅଞ୍ଚଳର ରିକିତା ଓରାମ ନାମକ ପିଲାର ସ୍କୁଲରେ ନାମଲେଖା ପାଇଁ ତାଙ୍କ ମା’ ଜାତି ପ୍ରମାଣପତ୍ର ଆବେଦନ କରିଥିଲେ। ହେଲେ ସମ୍ବଲପୁରରେ ତାଙ୍କର ନିଜସ୍ବ ଜମି ନ ଥିବା କାରଣରୁ ଜମିପଟ୍ଟା ଦେଇ ପାରଲେ ନାହିଁ। ଏଥିରେ ତାଙ୍କର ଜାତି ପ୍ରମାଣପତ୍ର ଆବେଦନ ଖାରଜ ହୋଇଯାଇଥିଲା। ଏହା ଏକ ଉଦାହରଣ ମାତ୍ର ନିୟମିତ ଏଭଳି ଆବେଦନ ସମ୍ବଲପୁରରେ ଖରଜ ହେଉଥିବା ଦେଖିବାକୁ ମିଳୁୁଛି। ଏନେଇ ଆଇନଜୀବୀ ଶେଷଦେବ ମିଶ୍ର କୁହନ୍ତି, ଆଗରୁ ପଞ୍ଚନାମା ଜରିଆରେ ଆବେଦନ କଲେ ସ୍ଥାନୀୟ ରାଜସ୍ବ ଅଧିକାରୀ ତଦନ୍ତ କରି ରିପୋର୍ଟ ଦେବାପରେ ଜାତି ପ୍ରମାଣପତ୍ର ମିଳିପାରୁଥିଲା। ହେଲେ ବିଗତ କିଛି ମାସ ହେବ ତହସିଲଦାର ଏଭଳି ଆବେଦନଗୁଡିକ ଖାରଜ କରି ଦେବା ଦ୍ୱାରା ବହୁ ଛାତ୍ରୀଛାତ୍ର ଜାତି ପ୍ରମାଣପତ୍ର ପାଇବାରୁ ବଞ୍ଚିତ ହେଉଛନ୍ତି। ଏନେଇ ତହସିଲଦାର ମନୋଜ ପ୍ରଭାକର କୁଜୁରଙ୍କୁ ପଚାରିବାରୁ କହିଛନ୍ତି, ଯେହେତୁ ସମ୍ବଲପୁରକୁ ବିଭିନ୍ନ ଅଞ୍ଚଳରୁ ଲୋକେ ଆସି ରହୁଛନ୍ତି ସେମାନଙ୍କ ପ୍ରକୃତ ଜାତି କ’ଣ ସ୍ଥାନୀୟ ଲୋକେ ଜାଣିନଥାନ୍ତି। ତେଣୁ ସେମାନଙ୍କର ଯଦି ସମ୍ବଲପୁରରେ ସ୍ଥାୟୀ ପଟା ନାହିଁ ତେବେ ଯେଉଁଠାରୁ ଆସିଛନ୍ତି ସେଠାରେ ଜାତି ପ୍ରମାଣପତ୍ର ଆବେଦନ କରନ୍ତୁ ବୋଲି କହିଥିଲେ। ତେବେ ସମ୍ବଲପୁରରେ ରହୁଥିବା ଜନଜାତି ଏବଂ ଅନୁସୁଚିତ ଜାତିର ଛାତ୍ରୀଛାତ୍ର କିଭଳି ଜାତି ପ୍ରମାଣପତ୍ର ସହଜରେ ପାଇପାରିବେ ତାର ବିକଳ୍ପ ବ୍ୟବସ୍ଥା କରାଯିବାର ଆବଶ୍ୟକତା ରହିଛି ବୋଲି ସାଧାରଣରେ ମତପ୍ରକାଶ ପାଇଛି।