ନୂଆଦିଲ୍ଲୀ,୧୯ା୪(ପି.ଟି.): ୨୦୨୪ ଲୋକ ସଭା ନିର୍ବାଚନ ପାଇଁ ବିରୋଧୀ ଦଳଗୁଡ଼ିକର ମେଣ୍ଟ ଏପର୍ଯ୍ୟନ୍ତ ସ୍ଥିର ହୋଇ ନାହିଁ। ତେବେ ଭାଜପାକୁ କ୍ଷମତାରୁ ହଟାଇବାକୁ ଜାତିଭିତ୍ତିକ ଜନଗଣନା ଏବଂ ସ୍ଥାନ ସଂରକ୍ଷଣ ସୀମା ହ୍ରାସ ଦାବି ଲାଗି ବିରୋଧୀଙ୍କ ମିଳିତ ଦାବି ସେମାନଙ୍କୁ ଏକାଠି ରଖିବାରେ ସହାୟକ ହୋଇପାରେ। ଉପରୋକ୍ତ ଦାବି ସେମାନଙ୍କ ପାଇଁ ଭାଜପା ଏବଂ ହିନ୍ଦୁତ୍ୱ ବିରୋଧରେ ବ୍ରହ୍ମାସ୍ତ୍ର ହେବ ବୋଲି କେତେଜଣ ନେତା ଅନୁଭବ କରୁଥିବା କହିଛନ୍ତି। ଜାତି ଜନଗଣନା ଏବଂ ସଂରକ୍ଷଣ ପ୍ରସଙ୍ଗ କେବଳ ବିରୋଧୀ ଦଳଗୁଡ଼ିକୁ ଏକାଠି କରିବ ନାହିଁ ବରଂ ବହୁ ପଛୁଆ ବର୍ଗଙ୍କୁ ନିଜ ଆଡ଼କୁ ଆକୃଷ୍ଟ କରିବାରେ ସହାୟକ ହେବ। ଏହି ବର୍ଗ କିଛିବର୍ଷ ହେଲା ଭାଜପା ଆଡ଼କୁ ଢଳିଥିଲେ। ନିକଟରେ ଡିଏମ୍କେ ପକ୍ଷରୁ ଡକାଯାଇଥିବା ବିରୋଧୀ ନେତାମାନଙ୍କ ବୈଠକରେ ବିହାର ଉପମୁଖ୍ୟମନ୍ତ୍ରୀ ତଥା ଆର୍ଜେଡି ନେତା ତେଜସ୍ବୀ ଯାଦବ କହିଥିଲେ, ଭାଜପାର ଧ୍ରୁବୀକରଣ ରାଜନୀତିକୁ ପ୍ରତିହତ କରିବାକୁ ହେଲେ ସାମାଜିକ ନ୍ୟାୟଭିତ୍ତିକ ରାଜନୀତି ସର୍ବଶ୍ରେଷ୍ଠ ଉପାୟ। କଂଗ୍ରେସ ସେହି ସୂତ୍ରକୁ ଆପଣାଇଛି। କଂଗ୍ରେସ ନେତା ରାହୁଲ ଗାନ୍ଧୀ କର୍ନାଟକର କୋଲାରରେ ନିର୍ବାଚନ ପ୍ରଚାର ବେଳେ ଜାତିଭିତ୍ତିକ ଜନଗଣନା ପ୍ରସଙ୍ଗ ଉଠାଇବା ସହ ସ୍ଥାନ ସଂରକ୍ଷଣ ଲାଗି ରହିଥିବା ୫୦ ପ୍ରତିଶତ କୋଟା ସୀମାକୁ ହଟାଇଦେବାକୁ ଦାବି କରିଥିଲେ। ଭାଜପା ଅନ୍ୟାନ୍ୟ ପଛୁଆ ବର୍ଗ (ଓବିସି)ଙ୍କୁ ଅପମାନିତ କରିଥିବା ରାହୁଲ ଅଭିଯୋଗ କରିଥିଲେ।
ଦରଦାମ୍ ବୃଦ୍ଧି, ବେରୋଜଗାରୀ ଆଦି ସାଧାରଣ ପ୍ରସଙ୍ଗରେ ବିରୋଧୀ ଏକାଠି ସ୍ବର ଉଠାଉଥିବାବେଳେ ଆଦାନୀ ଭଳି କେତେକ ନିର୍ଦ୍ଦିଷ୍ଟ ପ୍ରସଙ୍ଗରେ ସେମାନଙ୍କ ମଧ୍ୟରେ ସାମଞ୍ଜସ୍ୟ ରହୁନାହିଁ। ତେବେ ଜାତି ଜନଗଣନା ଓ କୋଟା ଉଚ୍ଛେଦ ପ୍ରସଙ୍ଗରେ ବିରୋଧୀ ଦଳଗୁଡ଼ିକ ଏଭଳି ଅସ୍ତ୍ର ପାଇଛନ୍ତି, ଯାହାକୁ ଏକାଥରକେ ଏକାଧିକ ଟାର୍ଗେଟକୁ ଲକ୍ଷ୍ୟଭେଦ କରାଯାଇପାରିବ ବୋଲି କୁହାଯାଉଛି। କଂଗ୍ରେସ ଏହି ପ୍ରସଙ୍ଗକୁ ଜୋର୍ଦାର କରିଥିବାବେଳେ ଏହାଦ୍ୱାରା ଆଞ୍ଚଳିକ ଦଳଗୁଡ଼ିକୁ ନିକଟତର କରାଇପାରିବ। ଅନ୍ୟ ପକ୍ଷରେ ବିରୋଧୀ ମେଣ୍ଟରେ କଂଗ୍ରେସ ବଡ଼ଭାଇ ଭୂମିକା ନେଇପାରେ ବୋଲି ଆଞ୍ଚଳିକ ଦଳଗୁଡ଼ିକର ଆଶଙ୍କା ଥିବାରୁ ସେମାନଙ୍କ ନିଜସ୍ବ ଏଜେଣ୍ଡାକୁ ଗୁରୁତ୍ୱ ମିଳି ନ ପାରେ ବୋଲି ଭାବୁଛନ୍ତି। ବିହାରରେ ଶାସକ ମହାମେଣ୍ଟର ଅଂଶୀଦାର ଥିବା ଜେଡିୟୁ ଏବଂ ଆର୍ଜେଡି ସମେତ ସମାଜବାଦୀ ପାର୍ଟି ଏବଂ ବହୁଜନ ସମାଜ ପାର୍ଟି (ବିଏସ୍ପି) ଜାତି ଜନଗଣନା ଲାଗି ଦୀର୍ଘଦିନ ହେଲା ଦାବି କରିଆସୁଛନ୍ତି।