ଚଳିତ ଶତାବ୍ଦୀରେ ଆସିବ ପ୍ରଳୟ, ଧ୍ୱଂସ ହେବ ପୃଥିବୀ, ୨୩୪ ବୈଜ୍ଞାନିକଙ୍କ ଚେତାବନୀ…

ଓ୍ବାଶିଂଟନ/ନୂଆଦିଲ୍ଲୀ,୪।୧୧: ବୈଜ୍ଞାନିକମାନେ ଚେତାବନୀ ଦେଇଛନ୍ତି। ଚଳିତ ଶତାବ୍ଦୀର ଶେଷ ସୁଦ୍ଧା ପ୍ରଳୟ ଆସିବ। ଏଥିରେ ପୃଥିବୀ ଧ୍ୱଂସ ପାଇଯିବ। ଏହାକୁ ନେଇ ବୈଜ୍ଞାନିକମାନେ ଚିନ୍ତିତ ଅଛନ୍ତି। ଏସମ୍ପର୍କିତ ତଥ୍ୟ ନେଚର ପତ୍ରିକାରେ ପ୍ରକାଶ ପାଇଛି। ଏହି ରିପୋର୍ଟକୁ ଆଇପିସିସିର ବୈଜ୍ଞାନିକମାନେ ପ୍ରସ୍ତୁତ କରିଛନ୍ତି।

୨୧୦୦ ସୁଦ୍ଧା ସୁଦ୍ଧା ପୃଥିବୀରେ ଭୟଙ୍କର ପରିବର୍ତ୍ତନ ଆସିବ। ଏଭଳି ପ୍ରଳୟ ଯୋଗୁ ବିପର୍ଯ୍ୟୟ ଘଟିବାର ଆଶଙ୍କା ରହିଛି। ଆଇପିସିସିର ଏହି ଜଳବାୟୁ ରିପୋର୍ଟକୁ ପୃଥିବୀର ୨୩୪ ବୈଜ୍ଞାନିକ ପ୍ରସ୍ତୁତ କରିଛନ୍ତି। ରିପୋର୍ଟ ସମ୍ପର୍କରେ କଲମ୍ବିଆର ମେଡେଲିନରେ ଅବସ୍ଥିତ ଆଣ୍ଟିକୋୟା ବିଶ୍ୱବିଦ୍ୟାଳୟର ବୈଜ୍ଞାନିକ ପାଓଲା ଆରିୟାସ କହିଛନ୍ତି ଯେ, ବିଶ୍ୱ ଯେତେ ଶୀଘ୍ର ବଦଳୁଛି ସେହି ଅନୁସାରେ ଆବଶ୍ୟକତାରେ ମଧ୍ୟ ପରିବର୍ତ୍ତନ ଘଟୁଛି। ଫଳରେ ପ୍ରାକୃତିକ ସମ୍ପଦ ଉପରେ ଚାପ ପଡୁଛି। ଏହାଯୋଗୁ ପ୍ରଦୂଷଣ ଏବଂ ବିଶ୍ୱତାପନ ବୃଦ୍ଧି ପାଉଛି। ଏହା ଅନୁସାରେ ବଞ୍ଚିବା କଷ୍ଟକର ହେବାରେ ଲାଗିଛି। ବଦଳୁଥିବା ବର୍ଷା ସ୍ଥତି ଯୋଗୁଁ ଜଳର ଅଭାବ ବୃଦ୍ଧି ପାଉଛି।

ଆଗାମୀ ଦିନରେ ପରିସ୍ଥିତି ଅଧିକ ଭୟଙ୍କର ହେବ। ପାଓଲା ଚେତାବନୀ ଦେଇଛନ୍ତି ଯେ ବିଶ୍ୱତାପନ ଯେପରି ବଢୁୁଛି, ସମୁଦ୍ର ପତ୍ତନ ମଧ୍ୟ ସେହି ଅନୁସାରେ ବୃଦ୍ଧି ପାଉଛି। ଗ୍ଲୋବାଲ ୱାର୍ମିଂକୁ ନେଇ ଅନ୍ତର୍ଜାତୀୟ ନେତାମାନେ ସକ୍ରିୟ ଥିବା ଅନୁମାନ କରିହେଉନାହିଁ ବୋଲି ସେ କହିଛନ୍ତି। ସେମାନେ ଧୀର ଗତିରେ କାମ କରୁଛନ୍ତି। ଏଭଳି କାର୍ଯ୍ୟ ଗତି ସହିତ ପୃଥିବୀକୁ ରକ୍ଷା କରାଯାଇପାରିବ ନାହିଁ। ପ୍ରାକୃତିକ ବିପର୍ଯ୍ୟୟ ହେତୁ ଲୋକମାନେ ବିସ୍ଥାପିତ ହେବାରେ ଲାଗିଛନ୍ତି। ଆଇପିସିସିର ଜଳବାୟୁ ରିପୋର୍ଟରେ କୁହାଯାଇଛି, ପୃଥିବୀକୁ ବଞ୍ଚାଇବା ପାଇଁ ମଣିଷ ପାଖରେ ଅଧିକ ସମୟ ବାକି ନାହିଁ। ଅନ୍ୟ ବୈଜ୍ଞାନିକମାନେ ମଧ୍ୟ ପାଓଲା ଆରିୟାସଙ୍କ ସହିତ ସହମତ ହୋଇଛନ୍ତି।

୪୦ ପ୍ରତିଶତ ବୈଜ୍ଞାନିକ ସ୍ପଷ୍ଟ ଭାବରେ କହିଛନ୍ତି ଯେ ୨୧୦୦ ସୁଦ୍ଧା ପୃଥିବୀରେ ବହୁ ସମସ୍ୟା ଦେଖାଯିବ। ଏହା ଯୋଗୁ ପୃଥିବୀ ଧ୍ୱଂସ ମୁହାଁ ହେବ। ବର୍ଷାରେ ଅନିୟମିତତା, ବାଦଲ ଫାଟିବା, ସୁନାମି, ତାପମାତ୍ରା ବୃଦ୍ଧି,ବନ୍ୟା, ମରୁଡ଼ି ଯୋଗୁଁ ମଣିଷ ସଭ୍ୟତା ଅସୁବିଧାରେ ପଡ଼ିବାର ଆଶଙ୍କା ରହିଛି। ସେହିପରି ୬୦ ପ୍ରତିଶତ ବୈଜ୍ଞାନିକ ଶତାବ୍ଦୀର ଶେଷ ସୁଦ୍ଧା ପୃଥିବୀର ହାରାହାରି ତାପମାତ୍ରା ୩ ଡିଗ୍ରୀ ସେଲସିୟସ ବୃଦ୍ଧି ପାଇବାର ଆଶଙ୍କା ଥିବା କହିଛନ୍ତି। ପ୍ୟାରିସ ଚୁକ୍ତିନାମା ସ୍ଥିର ହୋଇଥିବା୧.୫ ରୁ ୨ ଡିଗ୍ରୀ ସେଲସିୟସ ତାପମାତ୍ରା ଠାରୁ ଏହା ବହୁତ ଅଧିକ। ୮୮ ପ୍ରତିଶତ ବୈଜ୍ଞାନିକ କହିଛନ୍ତି ଯେ ବିଶ୍ୱତାପନ ବୃଦ୍ଧି ଯୋଗୁ ଜଳ ପ୍ରଳୟ ଭଳି ବିପର୍ଯ୍ୟୟ ଆସିବ। ଜଳବାୟୁ ପରିବର୍ତ୍ତନ ଭବିଷ୍ୟତ ପିଢ଼ିଙ୍କୁ ହନ୍ତସନ୍ତ କରିବ ବୋଲି ଏହି ରିପୋର୍ଟରେ ପ୍ରକାଶ ପାଇଛି।

ଗତ ମାସରେ ନେଚର ପତ୍ରିକାର ସର୍ଭେରେ ୨୩୩ ବୈଜ୍ଞାନିକଙ୍କୁ ସାମିଲ କରାଯାଇଥିଲା। ୯୨ ଜଣ ବୈଜ୍ଞାନିକ ଏହାର ଉତ୍ତର ପ୍ରଦାନ କରିଛନ୍ତି।