ଜୁନାଗଡ଼,୨୦।୧୦(ଡି.ଏନ.ଏ.): କଳାହାଣ୍ଡି ଜିଲା ଜୁନାଗଡ଼ ବ୍ଲକ୍ ଅଧୀନ ଆଟିଗାଁରେ ବିଦ୍ୟତ୍ ଆଘାତରେ ଗୋଟିଏ ବଳଦର ମୃତ୍ୟୁ ଓ ମାଲିକ ଆହତ ଘଟଣାରେ ଜାତୀୟ ମାନବାଧିକାର କମିଶନ ହସ୍ତକ୍ଷେପ କରିଛନ୍ତି। ବିଦ୍ୟୁତ୍ ବିଭାଗକୁ କମିଶନ ରିପୋର୍ଟ ତଲବ କରିଛି। ଅକ୍ଟୋବର ୫ ତାରିଖ ଆଟିଗାଁର ନବୀନ ଦଣ୍ଡସେନା ତାଙ୍କ ବଳଦକୁ ନେଇ ଜମିକୁ ଯାଉଥିଲେ । ତେଲନଦୀ ନିକଟରେ ଛିଣ୍ଡି ପଡିଥିବା ବିଦ୍ୟୁତ୍ ତାର ସଂସ୍ପର୍ଶରେ ଆସି ଗୋଟିଏ ବଳଦର ମୃତ୍ୟୁ ଘଟିଥିଲା । ବଳଦକୁ ରକ୍ଷା କରିବାକୁ ଯାଇ ନିଜେ ନବୀନ ଆହତ ହୋଇଥିଲେ । ଏହି ଘଟଣାକୁ ନେଇ ମାନବାଧିକାର କର୍ମୀ ଦିଲ୍ଲୀପ କୁମାର ଦାସ ଜାତୀୟ ମାନବାଧିକାର କମିଶନଙ୍କ ନିକଟରେ ଅଭିଯୋଗ କରିବା ସହିତ ୨ ଲକ୍ଷ ଟଙ୍କା କ୍ଷତିପୂରଣ ଦେବାକୁ ଦାବି କରିଥିଲେ। ଶକ୍ତି ବିଭାଗର ତଦନ୍ତ ଅନୁଯାୟୀ ୱେସ୍କୋ କର୍ତ୍ତୃପକ୍ଷ ବିନା କିଟ୍କାଟ୍ ସଂଯୋଗ ଓ ବେନିୟମ ଭାବରେ ଗାଁର ଚାଷୀମାନଙ୍କୁ ବିଦ୍ୟୁତ ସଂଯୋଗ ଦେଉଥିଲେ। ତଦାରଖ ନ ହେବା ତଥା କାର୍ଯ୍ୟରେ ଅବହେଳା ହେତୁ ତାର ଛିଣ୍ଡି ପଡିଥିଲା । ଏହାକୁ ବିଚାରକୁ ନେଇ ଜାତୀୟ ମାନବାଧିକାର କମିଶନ କ୍ଷତିପୂରଣ ବାବଦକୁ ୨ ଲକ୍ଷ ଟଙ୍କା କାହିଁକି ଦିଆଯିବ ନାହିଁ ସେ ନେଇ ୬ ସପ୍ତାହ ମଧ୍ୟରେ ଜଣାଇବାକୁ ଶକ୍ତି ବିଭାଗକୁ ନିର୍ଦ୍ଦେଶ ଦେଇଛନ୍ତି । ସେହିଭଳି ସମ୍ପୃକ୍ତ ଚାଷୀଙ୍କ ଏଭଳି ଦୁର୍ଦ୍ଦଶା ପାଇଁ ଦାୟୀ ହୋଇଥିବା ୱେସ୍କୋ ଅଧିକାରୀଙ୍କ ବିରୋଧରେ କି ପ୍ରକାର ଆଇନଗତ କାର୍ଯ୍ୟାନୁଷ୍ଠାନ ନିଆଯାଇଛି ତାହା ମଧ୍ୟ ୬ ସପ୍ତାହ ମଧ୍ୟରେ ଜଣାଇବାକୁ ଶକ୍ତି ବିଭାଗକୁ ନିର୍ଦ୍ଦେଶ ଦେଇଛନ୍ତି।
