ରାଉରକେଲା,୧୨।୧୧(ବିପ୍ଳବ ରଞ୍ଜନ ଦାଶ)ରାଉରକେଲା ସହରରେ ଦୁଗ୍ଧ ଉପତ୍ାଦନ ହ୍ରାସ ପାଉଥିବା ବେଳେ ଗାଇଗୋରୁ ଓ ଗୋପାଳକଙ୍କ ସଂଖ୍ୟା ମଧ୍ୟ କମିବାରେ ଲାଗିଛି। ୫ବର୍ଷ ତଳେ ସହରରେ ଗୋରୁଙ୍କ ସଂଖ୍ୟା ୧୦ହଜାରରୁ ଊର୍ଦ୍ଧ୍ୱ ଥିବାବେଳେ ବର୍ତ୍ତମାନ ୩୮ଶହରେ ସୀମିତ ରହିଛି। ସହରର ବାସନ୍ତୀ କଲୋନୀ, ସିଭିଲଟାଉନଶିପ୍, ୨୦ ନମ୍ବର ଖଟାଲ ବସ୍ତି ସହ ଶିଳ୍ପାଞ୍ଚଳରେ ରହୁଥିବା ୪ଶହ ଗୋପାଳକ ଦୁଗ୍ଧ ଉପତ୍ାଦନ କରୁଛନ୍ତି। ଆଗରୁ ଦୈନିକ ୩୦ହଜାର ଲିଟରରୁ ଊର୍ଦ୍ଧ୍ୱ ଦୁଗ୍ଧ ଉତ୍ପାଦନ ହେଉଥିବା ବେଳେ ବର୍ତ୍ତମାନ ଦୈନିକ ୧୨ହଜାର ଲିଟର ଉପତ୍ାଦନ ହେଉଥିବା ରାଉରକେଲା ପ୍ରାଣୀଧନ ବିଭାଗ ସୂତ୍ରରୁ ଜଣାପଡିଛି। ସହରରେ ଗୋରୁଗାଈଙ୍କ ସଂଖ୍ୟା ହ୍ରାସ ପାଇବା ପଛରେ ପ୍ରଶାସନିକ ଉଦାସୀନତା, ବେଆଇନ ଗୋରୁଚାଲାଣ ଓ ମାନବିକତାର ଅଭାବ ବୋଲି ସହରର ବୁଦ୍ଧିଜୀବୀ ମହଳରେ ଚର୍ଚ୍ଚା ହେଉଛି।
ହକି ବିଶ୍ୱକପ୍ ଆୟୋଜନ ପୂର୍ବରୁ ସହରର ବିଭିନ୍ନ ରାସ୍ତାରୁ ଶହ ଶହ ବୁଲା ଗାଈଗୋରୁ ଉଦ୍ଧାର କରି ଗୋଟିଏ ସ୍ଥାନରେ ଥଇଥାନ ପାଇଁ ସେକ୍ଟର-୧୪ ସ୍ଥିତ ୩ ଏକର ବିଶିଷ୍ଟ ଜମିରେ ନିର୍ମିତ ନିରୋଧଶାଳା କେନ୍ଦ୍ରରେ ରଖାଗଲା। ମାତ୍ର ହକି ବିଶ୍ୱକପ୍ ପରେ ନିରୋଧଶାଳାରୁ ଗାଈଗୋରୁ ଉଭାନ ହୋଇଗଲେ। ଏଭଲି ଭାବେ ପ୍ରତ୍ୟେହ ବିଳମ୍ବିତ ରାତିରେ ଦାଣ୍ଡିଆପାଲି, ଗର୍ଜନ, ତୁମରନ, ବିରକେରା ଏବଂ ଗୁରୁଣ୍ଡିଆ ଆଦି ଅଞ୍ଚଳ ରାସ୍ତା ଦେଇ ବିଭିନ୍ନ ସ୍ଥାନକୁ ବେଆଇନ ଗୋଚାଲାଣ ହେବା ଘଟଣା ନିତିଦିନିଆ ହେଲାଣି। ଏହାସହ ଗୋଟିଧର-କଲୁଙ୍ଗା-ବେଦବ୍ୟାସ ଦେଇ ମଧ୍ୟ ଗୋରୁଚାଲାଣ ବୃଦ୍ଧି ପାଉଛି। ଏ ନେଇ କୌଣସି ବିହିତ ପଦକ୍ଷେପ ଗ୍ରହଣ କରାଯାଉନାହିଁ। ଆଶ୍ଚର୍ଯ୍ୟର କଥା, ଗୋଟିଏ ବର୍ଷ ମଧ୍ୟରେ ପୋଲିସ ପ୍ରଶାସନ ଜଣେ ମଧ୍ୟ ଗୋଚାଲାଣକାରୀଙ୍କୁ ଧରିବାରେ ସଫଳ ହୋଇନି। କେବଳ ଗାଈଗୋରୁଙ୍କୁ ଉଦ୍ଧାର ସହ ଗାଡି ଜବତ ହେଉଛି। ମାତ୍ର ଗୋରୁ ବୋଝେଇ ଗାଡି କେଉଁଠୁ ଆସିଲା, କେଉଁ ସ୍ଥାନକୁ ଚାଲାଣ ହେଉଥିଲା ଏସବୁ ବିଷୟ ରହସ୍ୟ ହୋଇ ରହିଯାଉଛି। ଏପରିକି ଉଦ୍ଧାର ହୋଇଥିବା ଗୋରୁ ସଂଖ୍ୟା, ସେମାନଙ୍କ ସ୍ଥିତି ଓ କାହା ପାଖରେ ଜିମା ଦିଆଯାଇଛି ସେ ନେଇ ମଧ୍ୟ ପ୍ରଶାସନ ପାଖରେ କୌଣସି ଖବର ରହୁନାହିଁ। ଏଭଳି ଦିନକୁ ଦିନ ଗୋବଂଶ କମୁଥିବା ବେଳେ ଏହା ଉପରେ ବିହିତ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି ହେଉଛି। ଏ ନେଇ ରାଉରକେଲା ଆରକ୍ଷୀ ଅଧୀକ୍ଷକ ମିତ୍ରଭାନୁ ମହାପାତ୍ରଙ୍କୁ ପଚାରିବାରୁ ଏ ଦିଗରେ ଆଗକୁ ବିହିତ ପଦକ୍ଷେପ ନିଆଯିବ ବୋଲି ସେ କହିଥିଲେ। ଏ ସମ୍ପର୍କରେ ରାଉରକେଲା ପ୍ରାଣୀଧନ ଅଧିକାରୀ ପ୍ରସନ୍ନ କୁମାର ମହାରଣାଙ୍କୁ ପଚାରିବାରୁ ସେ କହିଲେ, ଗୋରୁ ସଂଖ୍ୟା ହ୍ରାସ ପାଇବା ପଛରେ କେବଳ ପ୍ରଶାସନିକ ଅବହେଳା ଦାୟୀ ନୁହେଁ। ଏଥିପାଇଁ ମାନବିକତାର ଘୋର ଅଭାବ ରହୁଛି ବୋଲି ସେ କହିଥିଲେ।